25
Anili tuŋki cafaƴƴi sabboo ya
1 Yéesú ɓaatte won tih : « Nguur ki sun-Koo ay made biti kúkëy cafaƴ sabboo këríɗ lampa yi wa, sayu téebílëh yíkëe kílëek nen. 2 Lahte iippi ñaañuy, iippa tas ɗa ñaañute. 3 Iippa ñaañuy ra, ɓeyuu wa lampa yi wa ra, nuffi wa paay kúrëelëh pitirol daaƴ, 4 ndaa iippi kayya ɓeyuu wa lampa yi wa ra, kúrëelúuté i bútéel pitirol. 5 Wa homu sehi yíkíi kílëegë níi wa ɓéeɓ pëníyúté, míllúutée neeꞌ. 6 Hom homo níi un ɗofohte leelii elga won tih : “Yíkíi kílëegë acce ! Tílí ɗon téebílée rí !” 7 Wa fi sabboo ya ɓéeɓ koluute, na waaƴu lampa yi wa. 8 Tígí daaha, ƴee ñaañuy ra wonu iippi kayya tih : “Ëní fun na pitiroli ron, lampa yi fun ee saañ ƴímé rë !” 9 Ƴee ñaañu ra wonu wa tih : “Baa mínéh hen ! Ƴee lahuu fun ra mínéh yen kúɗ ɓéeɓ. Pëyí ɗon lome !” 10 Wa koluu daaha sayute lom. Wahtaa sayuu wa ra, yíkíi kílëegë lahaꞌ na. Iippa wocu ra ñéerúuté a yíkíi kílëegë haalute faam fa, ílë wodute. 11 Hompe níi, ƴee payu lom pitirol ra namutee ac, wa ɓéyrúté unni wa na wonu tih : “Ɓahaa, kúnsíɗ fun !” 12 Ɗi won wa tih : “Wëerté sëꞌ biti mi yéeh rën !” » 13 Yéesú ɓaatte won tih : « Daa tah mi won ɗon tee : tëekí ɗon yeele, ndée ɗon yíih bisa a wahtaa nay mi nimile ra. »
Anili kélfëe déŋéen súrgë yí hélíis rë
(Saame Lúkkë 19.11-27)
14 Yéesú ɓaatte won tih : « Nguur ki sun-Koo mín mëllúu a biti ow koloh saañ ɓaaɓ, dëek súrgë yí, déŋéen wë alal mi nen. 15 Ɗi yeɗte ow yínë waa na hanjar úrís iip, ɓëyí ana fa ɗi yeɗte ri hanjar ana, ɗi yeɗte ɓëyí éeyë fë hanjar yínë bi yúh rí ow fi ow waa na ɓéeɓ. Ɗi antee koloh saañce. 16 Ɓëeꞌ yeru hanjarri iippa ra yíppée yam légéyë, úrísë na ɓaatoh níi wa límpé hanjar iip kay. 17 Bee yeru hanjar ana ra hente ɗaaha ɓal níi hanjara límpé ana kay. 18 Bee yeru hanjar yínë rë nék nampee pay hacce nuŋ, ɓekke hanjari kélfíi filiɓ, púuɓpé.
19 « Hompe níi filoon fe, kélfíi súrgë yë acce dëekké wë, wa léhín ɗí légéyí wë. 20 Ɓëeꞌ húmú yeru hanjar úrís iip ra, kúrëelëhté hanjar iippi kayya lah ri sun fi ƴín ɗë, won tih : “Ɓahaa, fu húmú yeɗ soꞌ hanjar úrís iip neh a ? Mi légéyté níi mi lahte iip sun aƴeh !” 21 Kélfëe won ɗi tih : “Eera ! Fu súrgíi wunte ! Ow mín ɗëe lekoh. Hém daa fu ñee woni soꞌ fu paŋke yii ƴutuudi baa raa, may roo déŋéen yii luk baa maanaa. Aye yen bok ndama.” 22 Bee húmú yeru hanjar úrís ana ra acce ɓal won tih : “Ɓahaa, fu húmú déŋéen sëꞌ hanjar úrís ana neh a ? Mi légéyté níi mi lahte ana kay sun aƴeh !” 23 Kélfëe won ɗi tih : “Eera ! Fu súrgíi wunte ! Ow mín ɗëe lekoh. Hém daa fu ñee woni soꞌ fu paŋke yii ƴutuudi baa raa, may roo déŋéen yii luk baa lah maanaa. Aye yen bok ndama !” 24 Míllëenë, bee húmú yeru hanjar úrís yínë rë nampee ac won tih : “Ɓahaa, mi yúhté biti fu ɓëyí súhté keeñ : fu lecaꞌ yii fu sohay ri, fu ɓeenaꞌ tígí fu ɓekay na tisoh, 25 daa tah mi kaañay ro, mi hacce nuŋ mi ɓekke hélsú feey. Ɓeye hélsú aƴeh !” 26 Kélfëe won ɗi tígí daaha tih : “Fu súrgíi ɓosse ! Fu ɗëpësíɗ ! Fu won neh mi lecaꞌ yii mi sohay ri, mi ɓeenaꞌ tígí mi ɓekay na tisoh a ? 27 Kon haalaꞌ yi níi fu wëtɗëey hélsí sëꞌ ? Tin bee nimilaꞌ mi bee ra mi laheh na yii tíkëh sun a ?” 28 Ɗi yíssëhté súrgë yí kayya na, won wa tih : “Nëefí bee ɗii na, ɗon yeɗ ɗi ɓëeꞌ lahaꞌ sabboo ra.” 29 Ahaŋkay ! Ɓëyí ham yee yeru ri ra a yaꞌ ana, ay ɓaatu níi keeña sos. Ɓëyí pagay yii baaha raa nék, yii ƴutuuda lahaꞌ ri ra sah ay naafu. 30 Ɗi fi bee lahay njiriñ bee ra, bétí rí ñúusë ëssín, ɗi looye dín fë ŋafee níi tíñë lec. »
Bis-këem
31 Yéesú ɓaatte won tih : « Yiin nay mii nimile soꞌ mi Koy-ɓëeꞌ mi ayee a ndami soꞌ, mi ñéerëꞌ a malaaka ya ɓéeɓ rë, may tooke ñaani Nguur ki gaani soꞌ na. 32 Tígí daaha, heetti ɓëewë feey fa ɓéeɓ ay teyaꞌ fíi sëꞌ, mi ɓísëꞌ wë goomal ana ti di na ɓísëꞌ níirëh harri a peꞌ yi. 33 Ti ɗaaha nen, may tík ɓëewë júɓú rë yaꞌi ñamaa fi soꞌ, mi tík ƴee júɓúy rë yaꞌi sugu fi soꞌ. 34 Bín fë rëe, soꞌ mi buura may wone ɓëewë paaꞌuu soꞌ yaꞌ ñamaa ra tih : “Ëyí ɗon fa Baasoꞌ barkel ron ra. Hëelí Nguur ka waaƴiɗ ɗi ron dalaani ëldúnë rë, 35 ndah húmú yaaɓaꞌ mi níi yaaɓ ra, ɗon onute soꞌ ñam ; mi húmú sifirohte, ɗon onute soꞌ muluɓ ; mi húmú doha-ndéem, ɗon tahuute soꞌ a yaꞌ ana ; 36 mi húmú lahay búuɓ, ɗon ɓekute soꞌ ; mi húmú jéríɗ, ɗon caguute soꞌ ; mi húmú téƴúté kasu, ɗon yérúté sëꞌ.” 37 Tígí daaha ɓëewë júɓú rë ay soo meel won soꞌ tih : “Yíkëe, fun olu ro fu yaaɓpe kiri, fun yerute ro ñam ? Fu sifiroh kirih, fun onute ro muluɓ ? 38 Fu hen doha-ndéem kirih, fun tahuute ro a yaꞌ ana, mbée fu lahay búuɓ, fun ɓekute ro ? 39 Fu jér kirih, fu téƴúté kirih, fun yérúté rë ?” 40 Soꞌ mi buura may waa lofe tígí daaha tih : “Mee ron won kaaf ka ra ee : wahtii húmú pagiruun ron ri ow di koy-yaayyi soꞌ ɓéeɓ, wuti ƴaha bee lukki hen yeru raa sah, ɗeef ɗon pagiru soꞌ mi bee ri.”
41 « Mi kolaꞌ daa raa, mi yíssëh ɓëewë paaꞌuu soꞌ yaꞌ sugu ra, mi won wa tih : “Wúlíi sëꞌ ɗon fa Koo alak ron ra, ɗon haale filiɓ kíi kë ii mëssí ƴím rë waaƴɗu Seytaane a dakki ra, 42 ndah húmú yaaɓaꞌ mi níi yaaɓ ra, ɗon onuy soꞌ ñiip ñam sah ; mi húmú sifirohte, ɗon onuy soꞌ siit muluɓ sah ; 43 mi húmú doha-ndéem, ɗon yeeluy soꞌ sah ; mi húmú lahay búuɓ, ɗon ɓekuy soꞌ ; mi húmú jérté, mi téƴúté kasu, ɗon yérúy sëꞌ.” 44 Tígí daaha, wa ay soo nampi meel won soꞌ tih : “Yíkëe, fun olu ro fu yaaɓpe, fu sifirohte kirih ? Fun olu ro fu hente doha-ndéem kirih, fu lahay búuɓ kirih, fu jérté mbée fu téƴúté kasu kirih, fun hílípúy rë ?” 45 May waa lofe tígí daaha tih : “Mee ron won kaaf ka ra ee : wahtii húmú kaaꞌruun ron pagiɗ ow di koy-yaayyi soꞌ iñƴaa ɓéeɓ, wuti ƴaha bee lukki hen yeru raa sah, ɗeef ɗon kaaꞌru soꞌ mi bee ri.”
46 « Te ɓëewí ƴaa suu pesee daana na ɗúméh rë. Ndaa ɓëewë júɓú rë suu haale pesa na ɗúméh rë. »