3
1 Yëwúɗ lungiɗ ow kay yih ? Mbée lecoh lahaꞌ njiriñ mi bih ? 2 Njiriñ ma gaante lool di iña ɓéeɓ. Yee nay mii ɗéɓée won ɗa daa ri bitih : Koope déŋéen yëwúɗɗë unni. 3 Kaah biti i ow waa na paguy iña won ɗi ra. Yee paguy wa fi ƴaa iña won ɗi ra mín tah Koope hon uni a ? 4 Mi yaakaaray ri ! Yen yúhún biti Koope wonaꞌ kaah, te ɓëewë ɓéeɓ i feloh, ndée di yii leŋke Koope na, bíníyúté Téerëe bitih :
« Yii won fu ɓéeɓ,
ɓëewë oluun ɗi biti fu júɓpé,
te fu aattiyuun aattiyoo koon,
faraah daa fu nay lahee kaaf ka. »✡3.4 Saame Kañaa ya 51.6
5 Ndaa hena biti júɓëyë júɓúy yen ɗa teeɓaꞌ ɗee júɓëꞌ Koope ra raa, yi nay wonu ? Kon Koo daan yen raa, mbaa yen ii won biti ɗi fi Koope júɓëy ? (Mi won wonaɗ ow kut tígí dah.) 6 Mi yaakaaray ri ! Hena biti Koope júɓëy koon, ɗi ay mínée aattiyaꞌ ɓëy ëldúnë ɗíh ? 7 Hena biti nék, fela na fel mi ra ɓaatti teeɓaꞌ kaaf ki Koope, na ɓaat ndami raa, soꞌ may habiluu bakaaroh yi níi mi daanaa ? 8 Kon yi tah woneeh bitih : « Yen pagun yin ɓos, nda lím yin wun » ? Lahte ɓëewí fellirute soꞌ, na wonu biti mi waariyaꞌ uni bah. Wa ay liil daana waɗ waa na ra.
Lahay ɓëyí júɓpé
9 Kon nék yi nay wonlu ? Fun fi yëwúɗɗë, moo fun génú heetti kayya a ? Ëe-ëeꞌ kay ! Soꞌ mi teeɓaꞌte biti yëwúɗɗë a heetti kayya ɓéeɓ, bakaaɗ hampe wa ñaam, 10 ti di bíníyúu rí Téerëe bitih :
« Lahay ɓëyí júɓpé,
bi júɓpé yínë sah íníh në !
11 Lahay ɓëyí yúh iñi Koope,
lahay bi na saam Koope !
12 Ɓëewë súugúuté Koope,
wa ɓéeɓ bokute lahluy njiriñ !
Lahay ɓëyí në paŋ yin wun,
bi na paŋ yin wun yínë sah íníh në !✡3.12 Saame Kañaa ya 14.1-3 ; 53.2-4
13 Iña na ɗúh ɓúkkí wë rë na hawaꞌ,
ɓúkkí wë ɓeedohte nofaꞌ ow,
iña na wonu wa ra man daŋar goŋ nen !✡3.13 Saame Kañaa ya 5.10 ; 140.4
14 Wa haayute ɓúk,
te faraah wa ɗúhrúu cuñ ɓúkkí wë !✡3.14 Saame Kañaa ya 10.7
15 Wa gaawute bëem ow !
16 Tígí ñee wa ɓéeɓ,
wa yahsaꞌ, hel na súfúñ !
19 Yen yúhúté biti yii won Kootaa ɓéeɓ, woniɗ ɓëewë Kootaa ham wa ra, nda ow ɓanti lah layaa, te ɓëy ëldúnë ɓéeɓ keen daani Koope. 20 Yii baa daa tah paŋ yee nahaꞌ Kootaa ra taheh Koope habaꞌ ow ɓëyí júɓpé. Kootaa teeɓaꞌ ɓëewë biti kut wa bakaarute.
Ngém nay tahe Koope habaꞌ ow ɓëyí júɓpé
21 Ndaa leegi, Koope teeɓaꞌte biti ɗee na habaꞌ ri ow ɓëyí júɓpé rë ñeyaay Kootaa na. Kootaa a faanaŋ fi a téeré yí yonente ya wonute ri. 22 Ɓëyí gém Yéesú-Kiristaa ɓéeɓ, Koope habaꞌ ri ɓëyí júɓpé. Ɗi téydëꞌ ɓëewë ɓéeɓ tígë yínë, 23 ndah ow fi ow waa na ɓéeɓ bakaaɗte, ow fi ow waa na ɓéeɓ liilay ndami Koope. 24 Ndaa Koope sehay yin waa na, onte wa mali habaꞌte wa ɓëewí júɓúté, ndah múclë múcíl wë Yéesú-Kiristaa ra. 25-26 Koope yeraꞌte Kiristaa sarah, ɗi séffé rí daani ɓëewë gémú rë, nda wa baalu bakaaɗɗi wa. Ɗaaha, Koope teeɓaꞌte biti ɗi júɓpé. Ɗi fi Koope mëssí júɓ júɓë, na húmú mújíɗ rí ɓëewë, daanay wa pagaɗɗi ɓossi wa ra ; te ri líssí júɓ níi a ɗeh. Ɗaaha, ɗi júɓpé te ɓëyí gém Yéesú ɓéeɓ, daa ri na paŋ níi ɓëyí baa hen ɓëyí júɓpé.
27 Kon daa mín damoh ? Ow yínë sah mínéh rí ! Yi tah ow mínéh rí ? Yee tah ra bitih, júɓë júɓú yen ɗa tíkëey sun fi yii ay pagu pago, ɗi tíkëh sun ngém. 28 Fun habu biti ngém daa na tah Koope habaꞌ ow ɓëyí júɓpé, ndaa paŋ yee pok Kootaa ra yin na neh. 29 Koope homiɗ yëwúɗɗë kut woo ? Maa ri Koope fi heetti kayya neh ɓal a ? Ahaŋkay ! Ɗi homiɗ heetta ɓéeɓ, 30 ndée ri yínë kut. Ɗi ay habaꞌ yëwúɗɗë ɓëewí júɓúté, biti wa lah ngém, habaꞌ heetti kayya ɓëewí júɓúté ɓal, biti wa lah ngém. 31 Maa ngém na kaaꞌ Kootaa lah njiriñ a ? Mi yaakaaray ri ! Ɗi ɓaat rii cëgíɗ cëgírë níi mit sah kay.