3
Ndâ Jézù ta ꞌbí mbe kpolo tí tàkìì mì ndâ Jùdéyà
1 Ta ꞌbí o gbaànjé ꞌbí ꞌdakò tí mbe kpolo tí tàkìì mì ndâ Jùdéyà, delè tí kpo ꞌduù gbí ngbàngà mì ndú, ta ṛè wó a Nìkòdémò, 2 giì ya gí mì Jézù ta bèbìlì gbí kóó, bìndi yí giì ꞌdè có ji yí máa, «Mbe nìbà i, ze ŋò wò tí mbe nìbà i mbe gì ꞌdo mì Mbíṛì ni gî. Tacó ꞌbí ꞌduù bà ꞌde wotí bà bàkà ndâ ŋa ndâ kpo-kpò i tí nó náa wò kû bàkà nó wálá, sè káa ŋìnó à má káa Mbíṛì ká tàkò ꞌduù tí nò.»
3 Káa Jézù giì ꞌvìsì có ji Nìkòdémò máa,
«Ye kû ꞌdè có ji wò ta yúcó máa,
à má kpò gbí ndi bà jò ꞌduù lá,
ꞌduù tí nò bà dù tí bòò-gba mì Mbíṛì wálá.»
4 Káa Nìkòdémò giì ꞌvee Jézù máa, «Àá bà kpò gbí ndi bà jò kpo ꞌduù kákáꞌi ée? Yí bà ꞌde kpokèjì bà dele ndi wó ya gí gbí yì nawu wó wàa à ꞌví jò ndi wó tí dó ꞌviì ꞌdo kòtí ꞌdi?»
5 Káa Jézù giì ꞌvìsì có ji Nìkòdémò máa,
«Ye kû ꞌdè có ji wò ta yúcó máa,
à káa ŋa ꞌduù ŋìnó náa à caka tí wó gî,
tí ŋa ꞌduù ŋìnó mbe ꞌdi có mì Bèṛi-mì-Mbíṛì gî nó,
ká bà dù tí Bòò-gba mì Mbíṛì.
6 A ndâ bu ꞌduù ta nawu ꞌduù ká jò ꞌduù,
káa, a Bèṛi-mì-Mbíṛì ká je wotí bà dù tí ꞌduù mì Mbíṛì ji ꞌduù.
7 Njembí lo ꞌví mù gítí có tí nó náa ye ꞌdè ji wò énó nó máa, à ꞌví jò ndi lo tí ngú nó lá.
8 Tacó ndâ ꞌduù ŋìnó náa Bèṛi-mì-Mbíṛì je wotí bà ꞌvala go có mì Mbíṛì ji ndú gî nó,
go pípìṛi náa wò kû ꞌdi káa wo bà pì yí,
káa wò bà ni bà cu ꞌbì lo gbúú-gbuu mítí ꞌbí to,
máa, ‹Nô! Pípìṛi kû pì ꞌdo nô!› nò wálá.
Wó delè bà ni bà cu ꞌbì lo gbúú-gbuu mítí ꞌbí to,
máa, ‹Pípìṛi kû pì gítí nó!› nò wálá.»
9 Káa Nìkòdémò giì ꞌvee Jézù máa, «Gbí có mì lo nò máa yè?»
10 Káa Jézù giì ꞌvìsì có ji yí máa, «Wò tí gbolò mbe nìbà i mì ndâ Ìzìrìyélì delè ŋò ndâ i tí nò ni lá?
11 Ye kû ꞌdè có ji wò ta yúcó máa,
ze kû ꞌdè có ká gítí ndâ i ŋìnó náa ze ŋò ndú ni gî nô.
Ze delè kû ꞌdè có ká gítí ndâ i ŋìnó náa ze ŋò ndú ta ṛo ze gî nô.
Kpêtí ká énó, ndâ ꞌduù mì yo biya bà ꞌdi ndâ có tí nó náa ze ꞌdè ji yo gítí ndâ i ŋìnó náa ze ŋò ta ṛo ze nó gî.
12 Yo má biya bà ꞌdi có tí nó náa ye ꞌdè ji yo gítí ndâ i muu to tí nó nó gî,
yo bà ùnje gítí có ŋìnó náa ye bà ꞌdè ji yo gítí ndâ i ŋìnó gbíṛì nó ta ŋa kpokèjì ngàyi?
13 ꞌBí ꞌduù muu to tí nó gbaànjé jé mbe ꞌdò kò wó mí gbíṛì wálá;
à káa ꞌViì-mì-ꞌDakò, tí mbe gì ꞌdo gbíṛì.
14 Mbíṛì bà te ꞌViì-mì-ꞌDakò gí yaà mí kùṛo ndâ ꞌduù go bà te cè tí kpoo tí nó náa à du ꞌdo tí liì nó mì Mòze gí yaà mí kùṛo ndâ ꞌduù gbí kángáá nga ngoò,
15 tacó wàa ndâ mbe ùnje gítí wó ꞌdáá gî ꞌví ꞌde ta ꞌválá ŋìnó mbe cee lá nô.
16 Tacó Mbíṛì zè ndâ ꞌduù muu to tí nó nìkì ngé ma.
Tacó énò, yí giì je gbèe ꞌViì mì wó ji ndú.
Mbíṛì je gbèe ꞌViì mì wó ji ndâ ꞌduù,
tacó wàa, ndâ ꞌduù ŋìnó mbe ùnje gítí wó nó ꞌví giṛiꞌo lá.
Ndú delè ꞌví ꞌde ta ꞌválá ŋìnó mbe cee lá nô.
17 Mbíṛì tuu ꞌViì mì wó gí muu to tí nó me tacó bà waa có mítí ndâ ꞌduù lá.
Yí tuu yí a i tacó bà ꞌvala ndâ ꞌduù.
18 Mbíṛì bà waa có mítí ndâ ꞌduù ŋìnó mbe ùnje gítí ꞌViì-mì-ꞌDakò gî nó wálá.
Káa ꞌduù ŋìnó mbe biya bà ùnje gítí gbèe ꞌViì-mì-Mbíṛì ta ꞌbí ꞌviì go yí mì Bu wó wálá nó gî nó ꞌva tí to sàà gî.
19 Mbíṛì bà waa có mítí ndâ mbe ngbútù ta ndeṛè énó máa,
ngbaꞌo gì gí muu to tí nó gî,
káa à giì nìkì tí ndâ ꞌduù a bà kpoko tí ndú ta ndi gbí ꞌdíꞌdiꞌo.
Ndú biya bà dù gbí ngbaꞌo gî,
tacó ndú ta o ꞌdáá gî kû bàkà káa ndâ vò i.
20 À dú káa yúcó máa,
ndâ mbe bàkà vò i ꞌdáá gî kû sogo ngbaꞌo,
tacó à tí ndú a gúku, máa,
ndâ ꞌduù bà ŋò ŋa ndâ vò i tí nó náa ndâ yì kû bàkà nô.
21 Káa a ndâ mbe ꞌvala ta yúcó ká kû co gí gbí ngbaꞌo,
tacó wàa, ndâ ꞌduù ꞌví ŋò ta ndâ i tí nó náa ndâ yì bàkà ta ṛè mì Mbíṛì nó ngbáṛángàꞌi.»
Ndâ Jézù ta Jòvánì tí mbe caka tí ndâ ꞌduù
22 Ta o tí nò ndâ Jézù ta ndâ mbe tala có mì wó giì ꞌbìtà bà nò ta ndi gbí ndâ to á sè ꞌdo gbí ndâ gbata gbí to Jùdéyà. Ndú dù gbí ndâ nó tí nò ta làmbu kôndi o, kû caka tí ndâ ꞌduù. 23 Jòvánì tí mbe caka tí ndâ ꞌduù ŋìndi wó ta gbèe o tí nò kû dù tí ꞌbí bàndò ta ngo gèjèè kuu tí , náa à kû nì mítí a Àyìnónì, á dê ta gbata Sàlímì, kû caka tí ndâ ꞌduù delè, 24 á kùṛo bà zèè yí tí Jòvánì tí mbe caka tí ndâ ꞌduù mí gbí zàà.
25 Ta ꞌbí o gbaànjé, ndâ ꞌbí mbe tala có mì Jòvánì tí mbe caka tí ndâ ꞌduù giì tò kponje ta ꞌbí Jùdéyà gítí có bà bàkà i tí ngbáṛángà i. 26 Bìndi ndâ mbe tala có mì Jòvánì tí mbe caka tí ndâ ꞌduù giì ya gí mì wó, bìndi ndú giì ꞌdè có ji yí máa, «Mbe nìbà i, ze ꞌdi có énó máa, ꞌdakò tí nó táánò náa yo ta yí ngéé tìto Jòròdánìyà nó, ꞌdakò tí nó náa wò táánò tùbà tí wó ji ndâ ꞌduù máa, yí a ꞌViì-rómbo-mì-Mbíṛì nó, kpónó kû caka tí ndâ ꞌduù, káa ndâ ꞌduù ꞌdáá gî kû kaa ya gí mì wó.»
27 Káa Jòvánì tí mbe caka tí ndâ ꞌduù giì ꞌvìsì có ji ndâ mbe tala có mì wó máa,
«À má me Mbíṛì ká wu i ji ꞌduù lá,
yí gí bà dù tí mbe i tí nò wálá.
28 Yo ꞌdi có tí nó náa ye táánò ꞌdè ji yo énó máa,
‹Ye me Bìndi-Mbíṛì lá,
ye a ꞌduù tí nó náa à tuu yí túú-tuu gí kùṛo wó› nó ta tù yo gî.
29 Ngú niì ta o ꞌdáá gî ká ta ṛè ngú ꞌdakò mì wó mbe kû kò yí nô.
Kpêtí ká énò,
tàkòcò kómbe ꞌdakò tí nó mbe kû kò ngú niì nó ta o ꞌdáá gî ká pétékèꞌi gítí bà ꞌdi kòcò ndâ kómbe wó kû ꞌdè nje ta ngú niì mì wó ta líkíꞌo tí ndú.
Ŋa líkíꞌo tí nò kpónó kuu tí ye.
Tàkòcò ye kpónó peteke ngé tè gî.
30 Wotí mì wó má kû ya gí yaà,
wotí mì ye kû dele gí to.
31 ꞌDuù tí nó mbe gì ꞌdo yaà nó me gbolò ndii ndâ ꞌduù ꞌdáá gî.
Káa ꞌduù ŋìnó náa à jò yí mí muu to tí nó nó a ꞌduù mì to tí nô.
Yí delè kû ꞌdè có ká gítí ndâ i muu tó tí nô.
32 Bìndi ꞌduù tí nó mbe gì ꞌdo gbíṛì nó
kû ꞌdè có ká gítí ndâ i ŋìnó náa yí ŋò ndú gbíṛì nô.
Yí delè kû ꞌdè káa ndâ có ŋìnó náa yí ꞌdi ꞌdo gbíṛì nô.
Ndâ ꞌduù kpêtí má ùnje gítí có mì wó lá,
33 ꞌduù ŋìnó mbe ùnje gítí có mì wó gî nó ùnje gî máa,
ndâ có mì Mbíṛì a yúcó.
34 Tacó ꞌduù tí nó náa Mbíṛì tuu yí nó kû ꞌdè a ndâ có mì Mbíṛì.
Tacó Mbíṛì je Bèṛi mì wó tí Mbíṛì ji ꞌduù tí nò náa yí tuu yí nò túkàꞌi.
35 Bu ꞌViì zè ꞌViì nìkì ma.
Yí giì kaa ndâ i ꞌdáá mí ꞌbì ꞌViì gî.
36 ꞌDuù mbe ꞌdi có mì ꞌViì gî
bà ꞌde ꞌválá ŋìnó mbe cee lá nô.
Káa, ꞌduù ŋìnó mbe biya bà ꞌdi có mì ꞌViì gî nó
jé gí bà ꞌde ꞌválá ŋìnó mbe cee lá nó wálá,
tacó yí kû ꞌvala gbí kpo-tàkòcò mì Mbíṛì.»