5
Jézù ꞌvala ꞌbí mbe nòꞌo á Jèrùzàlémè
1 Jézù giì njè nó ꞌdo Gàlìléyà ya gí bà ꞌbí gbolò o gbí tàkìì mì ndâ Jùdéyà á Jèrùzàlémè.
2 À kuu tí a ꞌbí dùgùù to ta ngo kuu gèjèè gbí , á seè ꞌbí njekèjì ndùgù bà ṛì gí gbí gbata Jèrùzàlémè náa à kû nì mítí a Njekèjì-mì-ndâ-rómbo. Ṛè dùgùù to tí nò gbí có mì ndâ Jùdéyà a Bètìzátà. 3 À tò ndâ ndùúṛù vô mí ṛègbà dùgùù to tí nò tacó tí ndâ ꞌduù ŋìnó náa ku kiꞌviki ndú mí to gî nô, go ndâ mbe sú ṛò, ta ndâ mbe ku kò, ta ndâ ꞌduù ŋìnó mbe gbegeꞌve mí to gî nô. Ndâ mbe òꞌbù ta ndâ mbe ósú giì kili kpìṛìꞌvìì ta tà ndâ ndùúṛù tí nò kû ù bà gbàngà ngo tí nò, 4 tacó ꞌbí ŋa o kuu tí náa basìlì mì Mbíṛì má dù gî, yí kû gì gí tà ngo tí nò kû gbàngà ngo. Káa kpédélé mbe nòꞌo ŋìnó mbe ya gí tà ngo tí nò á bìndi bà gbàngà ngo mì basìlì tí nó kû co gí sè ꞌdo tà ngo kà tí cèe ꞌduù ta séꞌi tí wó kákáꞌi wálá.
5 Jézù mâ giì ya gí ṛègbà ngo tí nò, yí giì ŋò ꞌbí ꞌdakò ta nòꞌo tí wó kuu tísì. ꞌDakò tí nò dù tísì ta ndoò dê gítí ziꞌduù-só. 6 Jézù mâ giì zeke ꞌdakò tí nò, yí giì ŋò ká ngé ni gî máa, ꞌdakò tí nò dù gbí ŋa yê tí nò ta kôndi o. Jézù bà-i-nò giì ꞌvee yí máa, «À tí lo a go bà dù gbí dìì lo nìkì maa kákáꞌi?»
7 Káa ꞌdakò tí nò giì ꞌvìsì có ji Jézù máa, «ꞌDuù mbe te ye ya tí gí tà ngo gálà si ngo kû gbàngà tí wálá, Bu ye. Káa ye má ja tí ye kpòò, ye má bà yee kà, ndâ mbe nambeè te ꞌduù mì ndú ya tí gí tà ngo sàà kùṛo ye gî.»
8 Jézù bà-i-nò giì ꞌvìsì có ji yí máa, «A gí yaà, wò ꞌví te kpâ-sili mì lo, wàa wò ꞌví nò nó!» 9 Mâ giì zekeꞌo, gbí dìì ꞌdakò tí nò giì da mbóꞌvóó gî. Yí giì paṛa kpâ-sili mì wó, bìndi yí giì ꞌbìtà bà nò nó go có tí nò náa Jézù ꞌdè ji yí nò.
Jézù ꞌvala ꞌdakò tí nò ta ṛi bà wotí gbí tàkìì mì ndâ Jùdéyà. 10 Tacó énò, ndâ kpo ꞌduù mì ndâ Jùdéyà giì ꞌdè có ji ꞌdakò tí nò náa Jézù ꞌvala yí nò máa, «À wúnó a ṛi bà wotí gbí tàkìì mì ndoo tí ndâ Jùdéyà. À má énò, wò kpónó kû gbètèkè nò a tàkìì mì ndoo ta nèté bà te kpâ-sili mì lo nò.»
11 Káa ꞌdakò tí nò giì ꞌvìsì có ji ndâ kpo ꞌduù mì ndâ Jùdéyà tí nò máa, «À ꞌdakò tí nó mbe ꞌvala ye ꞌdo gbí nòꞌo nó ká ꞌdè có ji ye máa, ye te kpâ-sili mì ye, wàa ye ꞌví njè nó.»
12 Ndâ kpo ꞌduù mì ndâ Jùdéyà bà-i-nò giì ꞌvee yí máa, «À ꞌdakò ꞌdi ká ꞌdè có ji wò máa, wò te kpâ-sili mì lo, wàa wò ꞌví njè nó?»
13 ꞌDakò tí nò bà-i-nò giì bàkà bà tùbà tí Jézù ji ndâ kpo ꞌduù mì ndâ Jùdéyà tí nó mbe ꞌvee yí nò. Káa à giì kpò yí gî, tacó yí ŋò Jézù ni lá, káa Jézù ŋònòkò tí wó mí gbí òkò tí ndâ mbè ꞌduù tí nó mbe yè to gî nó gî.
14 Mâ giì zekeꞌo gàà énò, Jézù giì ꞌde ꞌdakò tí nò gbí ndùgù ꞌbá-Mbíṛì. Jézù mâ giì ŋò ꞌdakò tí nò, yí giì ꞌdè có ji yí máa, «Ŋò ká gi, gbí dìì lo kpónó gì nìkì maa kákáꞌi gî. À má énò, wò ꞌví bàkà vò i kákáꞌi lá, má wálá, ꞌbí gbolò i mbe ndii nòꞌo tí nò táánò mbe bàkà wò nò bà ꞌde wò.»
15 ꞌDakò tí nò bà-i-nò giì dele ndi wó ya gí bà ꞌdè có ji ndâ kpo ꞌduù mì ndâ Jùdéyà tí nó mbe ꞌvee yí gítí ṛè mbe je yí gí gítí nèté bà paṛaka kpâ-sili ta ṛi bà wotí gbí tàkìì mì ndâ Jùdéyà nó, máa, «Ṛè ꞌdakò tí nò mbe ꞌvala ye nò a Jézù.»
16 Ndâ kpo ꞌduù mì ndâ Jùdéyà mâ giì ꞌdi có énó máa, a Jézù ká ꞌdè có ji ꞌdakò tí nò máa, yí te kpâ-sili ta ṛi bà wotí gbí tàkìì mì ndâ Jùdéyà nò, ndú giì ꞌbìtà bà bàkà gbínje ta yí, tacó yí bàkà ndâ i tí nò ta ṛi bà wotí gbí tàkìì mì ndâ Jùdéyà.
17 Jézù mâ giì ꞌdi có tí nò náa ndâ kpo ꞌduù mì ndâ Jùdéyà ꞌdè gítí wó máa, yí kû gbètèkè tàkìì mì ndâ Jùdéyà nò, yí giì ꞌvìsì có ji ndú máa, «Bu ye kpónó go có tí nó náa ye kû ꞌdè ji yo nó kû bàkà nèté, à má énò, ye delè kû bàkà nèté go i mì wó nò.»
18 Có tí nò náa Jézù ꞌvìsì gí tàkò có mì ndâ kpo ꞌduù mì ndâ Jùdéyà nò giì mìlìsé tí ndú go sé kà wu. Bìndi ndòngbú có mì ndú náa ndú giì koṛo gítí wó a ŋìnó máa, ndâ yì má zi yí lá, ndâ yì kákáꞌi bà zi ꞌbí ꞌduù wálá. Ndú koṛo ŋa có tí nò me ká tacó náa Jézù gbètèkè ṛi bà wotí gbí tàkìì mì ndâ Jùdéyà gî nò lá; tàkòcò ndú kpolo ngé ma a i gítí có bà ꞌvii tí Jézù ta Mbíṛì énó máa, Mbíṛì a ꞌdóó Bu yì.
Jézù ꞌdè có gítí wotí mì wó
19 Káa Jézù giì ꞌvìsì có ji ndú gí tàkò bà waaka có mì ndú nò máa,
«Ye kû ꞌdè có ji yo ta yúcó máa,
ꞌViì kû bàkà i me ta muu wó lá;
yí kû bàkà káa i ŋìnó náa yí ŋò Bu wó kû bàkà nó cuki.
20 Tacó Bu ꞌViì zè ꞌViì mì wó nìkì ma,
tacó énò, yí giì tùbà ndâ i ŋìnó ꞌdáá gî náa yí kû bàkà nó ji ꞌViì mì wó.
Bu ꞌViì bà giì tùbà bà bàkà ndâ ꞌbí nèté mbe ndii ndâ ŋìnò gî ji ꞌViì mì wó.
Yí bà giì tùbà bà bàkà ndâ i ŋìnó náa bà ꞌdè có gítí ndú bà kpo nje yo gî nó ji ꞌViì mì wó.
21 Bu ꞌViì a mbe kû je woò ji ndâ ku;
à má énò, ꞌViì delè kû je woò ji ndâ ꞌduù ŋìnó mbe nìkì tí wó nó go i mì Bu wó.
22 Bu ꞌViì me mbe waa có mítí ꞌduù lá,
tacó yí je wotí bà waa có mítí ndâ ꞌduù ꞌdáá gî ji ꞌViì mì wó gî,
23 tacó wàa, ndâ ꞌduù ꞌví te ta duù mítí ꞌViì mì wó,
á go ŋìnó náa ndú kû te ta duù mítí wó tí Bu ꞌViì nô.
ꞌDuù mbe biya bà te duù mítí ꞌViì gî,
yí biya nò a bà te duù mítí Bu ꞌViì tí mbe tuu ꞌViì gî.
24 Ye kû ꞌdè có ji yo ta yúcó máa, ꞌduù mbe ꞌdi có mì ye,
wàa yí ꞌví ùnje gítí mbe tuu ye, bà ꞌvala ká dúú bà ya tí .
Gbí ndeṛè bà ꞌviiki gbí nje wó bìndi ku mì wó bà dù wálá.
Yí bà ya ká ngé ndírí gí gbí ꞌválá ŋìnó mbe cee lá nó bìndi ku mì wó.
25 Ye kû ꞌdè có ji yo ta yúcó máa, o tí nò ká kèjì,
à má ta bà ꞌdè ta yúcó, à kpónó nó a o tí nò,
náa ndâ ku bà giì ꞌdi kòcò ꞌViì mì Mbíṛì,
bìndi ndâ mbe ꞌdi kòcò wó ꞌdáá gî bà ꞌvala gî.
26 Tacó Bu ꞌViì, tí ṛèngbó ꞌválá,
bàkà ꞌViì mì wó tí ṛèngbó ꞌválá gî.
27 Yí delè giì je wotí bà waa có ji yí ndii ndâ ꞌbí mbe waa có muu to tí nó ꞌdáá gî,
sé náa yí a ꞌViì-mì-ꞌDakò nò.
28 Nje yo ꞌví ꞌdèè gítí có tí nò lá,
tacó o tí nò ká kèjì náa ndâ ku gbí gùù bà giì ꞌdi gbí kòcò wó,
29 bìndi ndâ ku ŋìnó mbe bàkà tó i táánò si ndú kû ꞌvala muu to tí nó nó bà giì ꞌvala ndi ndú ꞌdo gbí muuꞌdú ndú,
gí gbí ꞌválá ŋìnó mbe cee lá nô;
bìndi ndâ ku ŋìnó táánò mbe bàkà tó i si ndú kû ꞌvala muu to tí nó lá nó bà ꞌvala dó gbí muuꞌdú ndú gí bà ŋò vò i mì ndú.
30 Ye bàkà i ta muu ye lá.
Ye kû waa có ká go ŋìnó náa à ꞌdè ji ye gî.
Ye delè kû waa có ká jáá,
tacó à gbí muu ye me có bà bàkà go ꞌdóó có mì ye lá.
À gbí muu ye a có bà bàkà go có mì ꞌduù tí nó mbe tuu ye nô.
31 Ye táánò má kû koṛo có a i gítí miṛi ye,
máa, ye énó, wàa ye énó, wàa ye énó,
mbe ùnje gítí ndâ có mì ye máa,
ye kû ꞌdè a yúcó nò, bà dù wálá.
32 Káa ye ŋò ni gî máa,
ꞌbí ꞌduù tí mbe ꞌdè yúcó mbe kû ꞌdè có muu ye kuu tí .
33 Yo táánò tuu ndâ ꞌduù mì yo ji Jòvánì tí mbe caka tí ndâ ꞌduù,
bìndi yí giì ꞌdè yúcó muu ye ji ndú gì tí ji yo gî.
34 Ye ꞌdè có tí nò ji yo tacó bà ꞌvala yo.
Ye ꞌdè ji yo me tacó máa,
ye kû tee njembí ye kpolo ma a i mítí ꞌbí ꞌduù muu to tí nó máa yí ꞌví ꞌdè có muu ye nò lá.
35 Jòvánì tí mbe caka tí ndâ ꞌduù táánò a wu mbe kû zìì á nje kùpò.
Tàkòcò yo delè táánò peteke ta líkíꞌo bà dù gbí ngba wó tè gî.
36 Káa ꞌdóó có mì ye náa ye bà ꞌdè gítí miṛi ye mbe ndii yúcó mì Jòvánì tí mbe caka tí ndâ ꞌduù náa yí ꞌdè gítí ye nò kuu tí .
Có mì ye nò a ndâ nèté tí nó náa Bu ye tuu ta ye, máa, ye bàkà nô.
À delè a ndâ nèté tí nò ká kû tùbà énó máa, a Bu ye ká tuu ye.
37 ꞌBí mbe ꞌdè có muu ye á bìndi ndâ nèté mì ye a Bu ye tí nó mbe tuu ye nô.
Yo jé ꞌdi kòcò wó ta tù yo lá.
Yo delè jé ŋò yí ta ṛo yo lá.
38 Có mì wó delè dù gbí njembí yo lá,
tacó yo ùnje gítí ꞌduù tí nó náa a yí ká tuu yí nó lá.
39 Yo kû jè ta bà ꞌdi gbí ndâ có gbí wáràgà mì Mbíṛì,
tacó yo koṛo có máa,
à gbí wáràgà mì Mbíṛì a ndâ có mbe kû je ꞌválá ŋìnó mbe cee lá nó ji yo.
Káa à gbí wáràgà tí nò mì Mbíṛì nò a ndâ có gítí ye.
40 Káa, ta ndâ ŋa ŋìnò ꞌdáá gî, yo biya bà gì gí mì ye,
tacó bà ꞌde ꞌválá ŋìnó mbe cee lá nó gî.
41 Ye kû ꞌdè có tí nò ji yo me tacó máa,
ye kû pà a bà ùlù ye mì ndâ ꞌduù nò lá.
42 Káa ye ŋò yo ni ngbáṛángàꞌi gî.
Ye ŋò ni gî máa, yo zè Mbíṛì nìkì gbaànjé lá.
43 A Bu ye ká tuu ye ji yo,
káa yo giì bè ye gî.
Káa ꞌbí ꞌduù kpónó má gì ta ꞌdóó nó wiṛi mì wó gí mì yo,
yo bà te wiṛi mítí wó gî.
44 Gbèe ꞌbí có gítí bà pà kpokèjì gítí bà ùlù yo mì Mbíṛì gbí muu yo gbaànjé wálá.
À kpolo mì yo cuki káa có gítí bà ùlù tí yo gbí òkò tí yo.
À má énò, a ŋa yè muu to tí nó ká bà si yo ꞌví ùnje ta njembí yo gbaànjé gítí ye?
45 Yo kpónó kû koṛo có máa,
a ye ká bà kpì ngbàngà tí yo ji Bu ye,
káa, à me énò lá.
A Mòze, tí ꞌduù tí nó náa yo kû tee njembí yo kpolo ma á mítí wó nó,
ká bà kpì ngbàngà tí yo.
46 Yo táánò má ùnje gítí Mòze ta njembí yo dú,
yo kùtàá bà ùnje gítí ye ta njembí yo gbaànjé gî,
tacó Mòze táánò kû cu có gítí ye mì gbí wáràgà mì wó.
47 Káa yo má biya bà ùnje gítí ndâ có tí nó náa Mòze táánò cu mì gbí wáràgà nó gî,
a ŋa yè ká bà si yo ꞌví ùnje gítí ndâ có tí nó náa ye kû ꞌdè ji yo nó?»