8
1 Jézù giì taꞌva ŋìndi wó ya a i gí pí Gú Mbâ. 2 Bìndi yí giì gboꞌo ta ꞌbí yé ꞌdo kà ya gí gbí ndùgù ꞌbá-Mbíṛì. Ndâ ꞌduù mâ giì kili me mbè gî, yí giì ki tí wó to, bìndi yí giì nìbà i ji ndú.
ꞌBí niì náa a zèè yí ta ꞌdakò
3 Mâ giì zekeꞌo, ndâ ꞌbí mbe ꞌdi gbí-o, ta ndâ ꞌbí mbe kpolo tí tàkìì mì ndâ Jùdéyà, giì yee ta niì mì ꞌbí ꞌdakò náa à zèè yí ta ꞌdakò-ngbà gî. Ndú giì ṛò niì tí nò mí kùṛo ndâ ꞌduù ꞌdáá gî. 4 Bìndi ndú giì ꞌvee Jézù máa, «Mbe nìbà i, à zèè niì tí nó kpátá-kpàtà ta ꞌdakò. 5 Káa Mòze ꞌdè có ji ndoo gbí tàkìì mì ndoo énó máa, ndoo ꞌví zi niì mbe bàkà ŋa i tí nò kpónó náa niì tí nò bàkà nó ta bà ꞌvaka yí ta díí. Nògí, có mì lo ŋìndi lo máa yè?»
6 Ndâ ꞌduù tí nò ꞌvee ŋa ꞌvé tí nò ká tacó bà pà nje Jézù, máa nje wó má yaaka kpéṛéꞌvè gî, wàa ndâ yì ꞌví ꞌde ta kpokèjì gítí wó.
Káa Jézù giì biya bà ꞌvìsì có ji ndú gí tàkò ꞌvé tiṛì mì ndú nò gî. Yí giì mò káa muu wó gí to, bìndi yí giì ꞌbìtà bà ka i mítí to ta sìlì ꞌbì wó. 7 Káa ndâ ꞌduù tí nò giì aanga muu ndú ká mítí gbèe ꞌvé mì ndú nò. Go bà ꞌvìsì có ji ndú mâ giì gì gítí Jézù gî, yí giì te muu wó gí yaà, bìndi yí giì ꞌvìsì có ji ndú máa, «ꞌBí ꞌduù gbí òkò tí yo jé mbe bàkà vò i lá má kuu tí , si yí ꞌví co gí kùṛo, wàa yí ꞌví ꞌva kpédélé díí mítí niì tí nò.» 8 Jézù ꞌdè káa có tí nò ji ndú gî, yí kákáꞌi giì mò muu wó gí to, kû cu i mítí to.
9 Ndâ ꞌduù tí nò mbe gì ta niì tí nò gí kùṛo Jézù nò mâ giì ꞌdi có tí nò náa Jézù ꞌdè ji ndú nò, ndú giì ꞌbìtà bà ꞌvaaka ꞌdo bà-i-nò gbaànjé-gbaànjé, kpòò yee tí o tí nó náa á káa niì tí nó náa ndú gì ta yí gí gbí ngbàngà kùṛo Jézù nó ká giì dù ta kpéétí wó kùṛo Jézù. A ndâ kpo ꞌduù ká co gí sè ꞌdáá kùṛo má kózò gî, bìndi ndâ ꞌviì giì co gí tàkò ndú.
10 Jézù mâ giì te muu wó gí yaà, yí giì ŋò káa niì tí nò kû ṛò tíyò ta kpéétí wó. Bìndi yí giì ꞌvee niì tí nò máa, «Ndâ mbe kpì ngbàngà tí lo káa ya gí kòtí ꞌdi, niì? ꞌBí ꞌduù gbí òkò tí ndú mbe waa có mítí lo wálá?»
11 Káa niì tí nò giì ꞌvìsì có ji Jézù máa, «Gbèe ꞌduù gbí òkò tí ndú mbe waa có mítí ye wálá, kpo ꞌduù.»
Káa Jézù giì ꞌvìsì có ji niì tí nò máa, «À nìkì ma. À má énò, ye delè bà waa có mítí lo wálá. Nògí, ya gî, wàa wò ꞌví bàkà vò i kákáꞌi lá.»
Jézù a ngbaꞌo mì ndâ ꞌduù
12 Ta o tí nò Jézù giì ꞌdè ꞌbí có ji ndâ ꞌduù kákáꞌi máa,
«Ye a ngbaꞌo mì ndâ ꞌduù.
ꞌDuù mbe kû ṛu ndi ye bà nò gbí ꞌdíꞌdiꞌo ngé gî wálá.
Yí bà dù gbí ngbaꞌo ŋìnó mbe ꞌvala yí nô.»
13 Ndâ mbe kpolo tí tàkìì mì ndâ Jùdéyà mâ giì ꞌdi có tí nò náa Jézù ꞌdè nò, ndú giì ꞌvìsì có ji yí máa, «À káa wò ká kû wu gbí tí lo ta kpéétí lo. À má énò, có mì lo nò bà dù me yúcó lá!»
14 Káa Jézù giì ꞌvìsì có ji ndú máa,
«Yo ꞌdè a yúcó máa, ye kû wu gbí tí ye ta kpéétí ye,
káa kpêtí ká énò, ye kû ꞌdè a yúcó,
tacó ye ŋò bàndò tí nó náa ye gì ꞌdo tí nó ni gî.
Ye delè giì ŋò bàndò tí nó náa ye kû ya gítí nó ni gî.
Káa yo ŋò bàndò tí nó náa ye gì ꞌdo tí nó ni lá.
Yo delè ŋò bàndò tí nó náa ye kû ya gítí nó ni lá.
15 Yo kû waa có me ta yúcó lá.
Káa ye me mbe waa có mítí ꞌduù gbaànjé lá.
16 Káa, ye má waa có mítí ꞌduù,
ye bà waa có ta yúcó.
Tacó ye kû waa có me ta kpéétí ye lá.
Ze kû waa có a i ta Bu ye tí nó tí mbe tuu ye nô.
17 À cu mí gbí wáràgà gítí tàkìì mì ndoo tí ndâ Jùdéyà énó máa,
‹Ndâ ꞌduù só má ùnje gítí gbèe có gî,
gbí énó máa, có tí nò a yúcó.›
18 Ye kû ꞌdè có gítí miṛi ye,
káa Bu ye tí nó tí mbe tuu ye nó kuu tàkò ye.»
19 Káa ndâ mbe kpolo tí tàkìì mì ndâ Jùdéyà giì ꞌvee Jézù máa, «Bu lo tí nò kòtí ꞌdi?»
Jézù bà-i-nò giì ꞌvìsì có ji ndú máa,
«Yo ŋò ye ni lá.
À má énò, yo delè bà ŋò Bu ye ni wálá.
Yo kùtàá má ŋò ye ni gî,
yo bà ŋò Bu ye delè ni gî.»
20 Jézù ꞌdè ndâ có tí nò ji ndâ ꞌduù mí bàndò bà kili i-Mbíṛì. Káa gbèe ꞌduù mbe zèè yí ta o tí nò wálá, tacó o mì wó tè kálásê.
Bà ꞌdi gbí có gítí Jézù kpò nje ndâ kpo ꞌduù mì ndâ Jùdéyà gî
21 Jézù giì ꞌdè ꞌbí có ji ndâ ꞌduù tí nò máa,
«Ye bà giì ya gî.
Yo bà giì pà bà tí ye si bà volo ji yo gî,
káa yo bà ꞌde ye wálá,
tacó wotí bà ya gítí bàndò tí nò náa ye kû giì ya gítí nò tí yo wálá.
À má énò, yo bà cì mí gbí ndâ vò i mì yo.»
22 Ndâ kpo ꞌduù mì ndâ Jùdéyà giì ꞌbìtà bà koṛo gbí có tí nó náa Jézù ꞌdè énó máa, ndú bà ꞌde wotí bà ya gítí bàndò tí nó náa yì kû ya gítí wálá nò, máa, «Yí bà zi tí wó zí-zi? À ꞌví dù nò a gbí có tí nò náa yí kû ꞌdè énó máa, ndoo bà ꞌde wotí bà ya gítí bàndò tí nó náa yì kû giì ya gítí nó wálá nò ká nò?»
23 Káa Jézù giì ꞌvìsì có ji ndú máa,
«ꞌBè gbí òkò tí ndoo ta ndoo a ŋìnô:
ꞌbá mì yo a i muu to tí nô,
káa ꞌbá mì ye a i gbíṛì.
Ṛèngbó yo a i muu to tí nô,
káa ṛèngbó ye me i muu to tí nô lá.
24 Yo bà cì mí gbí ndâ vò i mì yo.
Yo má ùnje énó máa,
Ye a Ye tí nó tí Ye nó, lá,
yo bà cì mí gbí ndâ vò i mì yo.»
25 Káa ndâ kpo ꞌduù mì ndâ Jùdéyà giì ꞌvee Jézù máa, «Wò a Wò tí ꞌdi?»
Káa Jézù giì ꞌvìsì có ji ndú máa,
«Ye ꞌdè ji yo sàà kùṛo gî.
26 Ndâ có gbí muu ye tacó bà ꞌdè ji yo go mbílì gbí cìkaà.
Ndâ i ŋìnó náa ye biya ꞌdo mì yo gî nó delè me ndâ i bà ꞌdeke cee lá.
Káa ꞌduù tí nó tí mbe tuu ye nó a ꞌduù ŋìnó tí mbe ꞌdè yúcó;
tacó énò, ye kû ꞌdè ji yo muu to tí nó káa ndâ có ŋìnó náa ye ꞌdi ꞌdo mì wó nô.»
27 Bà ꞌdi gbí énó máa Jézù kû ꞌdè có ji ndâ yì a i gítí Mbíṛì nò giì kpò ndâ ꞌduù tí nò gî. 28 Tacó énò, Jézù giì ꞌdè có ji ndú máa,
«Yo kpónó ŋò ye ni lá.
Yo má te ꞌViì-mì-ꞌDakò gí yaà kózò gî,
yo bà giì ŋò ni énó máa, Ye a Yí.
À delè nò bà giì dù a o bà ŋò mì yo ni énó máa,
ye kû bàkà i me ta muu ye lá;
ye kû nì káa bà có ŋìnó náa ye ꞌdi ꞌdo mì Bu ye.
29 Delè ꞌduù tí nó mbe tuu ye nó kuu ta ye;
yí si ye ta kpéétí ye lá,
tacó ye ta o ꞌdáá gî kû bàkà káa i ŋìnó mbe kû peteke tàkòcò wó nô.»
Cè bà bàkà i mì ndâ ꞌviì mì Àbìráámò
30 Ndâ ꞌduù me mbè ꞌdo gbí òkò tí ndâ mbe ꞌdi có mì Jézù nò giì ùnje gítí ndâ có mì wó gî.
31 Jézù bà-i-nò giì ꞌdè có ji ndâ Jùdéyà ŋìnó mbe ùnje gítí có mì wó gî nó máa,
«Yo kpolo tí ndâ có mì ye kácá-kácá,
tacó wàa yo ꞌví dù tí tí ndâ cèe mbe tala có mì ye dúú bà ya tí .
32 Yo bà dù tí ndâ mbe ŋò yúcó ni gî.
Bìndi yúcó bà giì njaanga wú ꞌdo tí miṛi yo gî.»
33 Káa ndâ ꞌbí ꞌduù ꞌdo gbí òkò tí ndâ Jùdéyà tí nò giì waa gbí có mì Jézù nò ta bà ꞌvee yí máa, «Ze a ndâ ꞌviì-gù Àbìráámò. Ze jé dù tí ndâ bòò mì ndâ ꞌbí ꞌduù sàà kùṛo lá. À má énò, gbí có mì lo náa wò ꞌdè énó máa, ‹Àá bà njaanga wú ꞌdo tí miṛi yo› nò máa yè?»
34 Káa Jézù giì ꞌvìsì có ji ndú máa,
«Ye kû ꞌdè ji yo a cèe yúcó máa,
ꞌduù mbe bàkà vò i gî, gbí énó máa,
vò i ga wú mítí miṛi wó gî.
35 Káa bòò dù tí ꞌbá ngbé lá.
A ꞌviì-ꞌbá ká kû dù tí ꞌbá ngbé.
36 Káa ꞌviì mì mbe ꞌbá má njaanga wú mì vò i ꞌdo tí miṛi lo gî,
wò bà dù tí bòò mí vò i kákáꞌi wálá.
37 Ye ŋò ni gî máa,
yo a ndâ ꞌviì-gù mì Àbìráámò,
káa ta ndâ ŋa ŋìnò ꞌdáá gî,
go bà zi ye kuu tí yo,
tacó ndâ có tí nó ꞌdáá náa ye kû ꞌdè nó ya gí gbí muu yo gbaànjé lá.
38 À má gítí bà miṛi ye,
ye kû ꞌdè có ká gítí ndâ i ŋìnó náa ye ŋò ꞌdo mì Bu ye nô.
Káa yo, yo kû bàkà káa ndâ i ŋìnó náa yo ŋò ꞌdo mì bu yo nó delè.»
39 Ndâ ꞌduù tí nò bà-i-nò giì ꞌvìsì có ji Jézù máa, «Bu ze a Àbìráámò.»
Káa Jézù giì ꞌvìsì có ji ndú máa,
«Yo kû bàkà tí yo máa,
yo a ndâ ꞌviì mì Àbìráámò,
káa, yo kùtàá dú má káa ndâ ꞌviì mì Àbìráámò go có tí nò gbí nje yo nò,
yo bà mèlè ndi Àbìráámò gî.
40-41 Káa, yo kpónó kû pà kpokèjì tacó bà zi ye tí mbe kû ꞌdè yúcó tí nó náa ye ꞌdi ꞌdo mì Mbíṛì nó ji yo.
Yo je nò a ŋa i bìndi ꞌbí ŋa bu yo,
tacó Àbìráámò dígísèé me mbe me ŋa ndâ vò i tí nò kpónó náa yo kû me nò lá.»
Ndâ ꞌduù tí nò giì ꞌvìsì có ji Jézù máa, «Ze me ndâ ꞌviì-ngbà lá. Bu ze ká gbaànjé, tí Mbíṛì.»
42 Káa Jézù giì ꞌvìsì có ji ndú máa,
«Mbíṛì kùtàá má dú káa bu yo,
yo bà zè ye nìkì gî,
tacó ye gì ꞌdo mì Mbíṛì.
Ye gì dú ꞌdo mì Mbíṛì.
Ŋìnó a ye ká nô.
Ye gì me ta muu ye lá.
À tuu ye túú-tuu.
A Mbíṛì ká tuu ye.
43 Yo ꞌdi gbí có tí nó náa ye ꞌdè nó lá tacó yè?
Yo ꞌdi gbí có tí nò lá,
tacó kòcò ye gbí tù yo go mòngò gbí tù bô.
44 Bu yo a Gba-vò-i.
Tacó énò, à nìkì tí yo a bà bàkà i ŋìnó ta gó tí bu yo nô.
Nèté mì wó a bà zi ku ꞌdo sàà.
Nèté mì wó jé táánò ta yúcó wálá.
Tacó yúcó mì wó jé wálá.
Yí má kû ꞌdè ꞌvéṛè,
yí kû bàkà nò a i gbí kû wó,
tacó yí a mbe ꞌvéṛè, tí bu ꞌvéṛè.
45 Káa à má gítí ye,
ye a mbe ꞌdè yúcó.
Ŋìnò a ndeṛè có tí nò náa
yo ù ta nje gítí ye lá nò ká nò.
46 A ꞌdi ꞌdo gbí òkò tí yo ká bà tù ꞌbì wó gí yaà, máa,
yì jé zèè ye ta vò i gî?
Káa ye má kû ꞌdè a yúcó,
yo ùnje gítí ye lá tacó yè?
47 ꞌDuù má a ꞌviì mì Mbíṛì,
yí kû ꞌdi káa có mì Mbíṛì,
káa yo má biya bà ꞌdi có mì Mbíṛì gî, à ká dú,
tacó yo me ndâ ꞌviì mì Mbíṛì lá.»
Ndâ Jùdéyà ꞌdè vò có gítí Jézù
48 Ndâ Jùdéyà bà-i-nò giì ꞌdè có ji Jézù máa, «Cè bà i mì lo go cè bà i mì ndâ ꞌduù Sàmárìyà nô! A mâ ká gbí muu lo. A kponje ká nje lo gítí có tí nò náa ze ꞌdè nò?»
49 Káa Jézù giì ꞌvìsì có ji ndú máa,
«Ye me mbe mâ lá,
ye kû tègàṛà a Bu ye.
Káa à tí yo a go bà volo ṛè ye.
50 Ye kû pà me bà wu gbí ye lá.
Có gítí bà wu gbí ye nò a nèté mì ꞌbí ꞌduù tí cèe mbe waa có.
51 Ye kû ꞌdè có ji yo ta yúcó máa,
ꞌduù mbe kpolo tí ndâ có mì ye bà cì wálá.»
52 Ndâ Jùdéyà gbí ŋìnò giì ꞌvìsì có ji Jézù máa, «Ze kpónó ŋò ni ngbáṛángàꞌi gî máa, a gbí muu lo a i. Àbìráámò cì gî. Ku delè zi ndâ mbe ꞌdòkò có mì Mbíṛì léé gî. Káa àá giì dù nó a wò ká giì ꞌdè có máa, ꞌduù mbe ꞌdi có mì lo bà ꞌdi pó ku wálá. 53 Wò me gbolò ndii bu ze tí Àbìráámò mbe cì gî nó gî? Ndâ mbe ꞌdòkò có mì Mbíṛì delè ꞌdáá gî zò to gî. Wò kû bàkà tí lo tí ꞌdi kpónó?»
54 Káa Jézù giì ꞌvìsì có ji ndú máa,
«Ye kùtàá má kû wu a gbí tí ye ta kpéétí ye,
gbí bà wu gbí tí ye bà dù wálá.
Káa a Bu ye tí nó náa yo kû ꞌdè có máa,
yí a Mbíṛì mì yo nó,
ká kû wu gbí ye.
55 Yo ŋò yí ni lá,
káa ye ŋò yí ni gî.
Ye má ꞌdè có máa, ye ŋò yí ni lá,
ye bà dù tí mbe ꞌvéṛè a go yo mbe kû ꞌdè có máa,
yo ŋò yí ni gî,
káa yo ŋò yí ni lá.
Ye ŋò yí ni gî.
Ye delè kû kpolo tí có mì wó.
56 Bu yo Àbìráámò dígísèé kû dù ta líkíꞌo tí wó máa,
yì bà ŋò o bà gì ye.
Yí giì ŋò ye gî,
bìndi tàkòcò wó giì peteke gî.»
57 Káa ndâ ꞌduù tí nò giì ꞌvìsì có ji Jézù máa, «Ndoò tí lo yee gbí ziꞌduù-só-nje muuꞌbì lá. Wò delè jé ŋò Àbìráámò lá.»
58 Káa Jézù giì ꞌvìsì có ji ndú máa,
«Ye kû ꞌdè ji yo a cèe yúcó máa,
kùṛo o bà jò Àbìráámò táánò,
ye kuu tí .»
59 Ndâ ꞌduù tí nò mâ giì ꞌdi ŋa có tí nò náa Jézù ꞌdè ji ndú nò, ndú giì tuṛu díí tacó bà ꞌvaka ta yí. Káa Jézù giì ŋònòkò tí wó ꞌdo tí ndú mí gbí òkò tí ndâ ꞌduù, yee tí o tí nó náa yí giì ndo ꞌdo gbí ndùgù ꞌbá-Mbíṛì gî.