Páwòlò cu wáràgà ji
TÍTÒ
1
Ŋìnó a ye tí Páwòlò, tí bòò mì Mbíṛì, ye delè a tú mì Bìndi-Mbíṛì. Mbíṛì cu ꞌbì wó á mítí ye, bìndi  yí giì tuu ye gí bà konì ndâ ꞌduù tí nó náa yí tí Mbíṛì ṛuka ndú tí ndâ ŋìnó mì wó gî nó ta bà kili wu gí tà bà tee njembí ndú mítí wó, delè gí bà nìbà yúcó tí nó mbe ꞌvii ta có mì wó tí Mbíṛì nô, yúcó tí nó mbe kû je muu ji ndú gítí bà koṛo có lì mítí ꞌválá tí nó mbe cee lá, náa Mbíṛì tí mbe ꞌdè ꞌvéṛè jé lá ci ndâ ꞌduù gítí  sàà gî nô. O tí nò náa Mbíṛì ci nò mâ giì gì gî, Mbíṛì giì uu gbí còngò có kóó mì wó nò. Bìndi  yí giì kpili có mì wó nò ji ye, náa ye kpónó kû ma ji ndâ ꞌduù go kòcò wó tí Mbíṛì tí Mbe ꞌvala ndoo nô. Ye kû cu wáràgà tí nó ji wò tí Títò, tí ꞌdóó ꞌviì mì ye, tacó ndà sósòꞌô ta ndà a ndâ mbe tee njembí mítí Mbíṛì. Ye kû ꞌdeke tí ye ji Mbíṛì tí Bu ndoo, ye delè kû ꞌdeke tí ye ji Bìndi-Mbíṛì tí Jézù tí mbe ꞌvala ndoo, énó máa, ndú ꞌví bàkà nambeè ji wò, ndú delè ꞌví si ꞌbí i ꞌví ba muu lo lá.
Nèté mì Títò gbí to Kèrétì
Ye táánò si wò mí Kèrétì, tacó wàa, wò ꞌví ꞌviindi ndâ i kà. Ye táánò ꞌdè có ji wò énó máa, wò ꞌví ŋò ndâ ꞌbí kpo ꞌduù, wàa wò ꞌví bàkà ndú tí ndâ kpo ꞌduù kùṛo ndâ mbe kû kili ta ṛè mì Bìndi-Mbíṛì ta ndi gbí ndâ gbata gbí to Kèrétì gbaànjé-gbaànjé ꞌdáá gî. Ndâ ŋa ndâ kpo ꞌduù tí nó ꞌví dù a ndâ cèe kpo ꞌduù, ta tó muu ndú. Ndú ꞌví dù me ndâ mbe kò njèèkù niì lá. Ndâ ꞌviì mì ndú ꞌví dù a ndâ mbe ùnje gítí Bìndi-Mbíṛì, tí ndâ ꞌviì mbe kû ꞌdi có, ta tó ṛè ndú. Tacó ꞌduù ŋìnó tí kpo ꞌduù kùṛo ndâ mbe kû kili ta ṛè mì Bìndi-Mbíṛì nó a mbe kpolo tí ꞌbá mì Mbíṛì. À má énò, yí ꞌví dù me ŋa ꞌduù ŋìnó náa ndâ ꞌduù kû no nje ndú gítí ndâ cè bà i mì wó nó lá; yí ꞌví dù me ŋa ꞌduù ŋìnó mbe koṛo có máa, à ꞌví si có ꞌdáá ká mítí có mì yì nó lá; yí ꞌví dù me ꞌduù ŋìnó ta tàkòcò wó kû kpolo ká gálà nó lá, yí ꞌví dù me vò mbe njù pe lá, yí ꞌví dù me mbe cee có gbí òkò tí ndú ta ꞌduù ta ꞌbì wó lá, yí ꞌví dù me ŋa ꞌduù ŋìnó ta njembí wó ká gítí bà ꞌde i gbí i nó lá. ꞌDuù ŋìnó tí kpo ꞌduù kùṛo ndâ mbe kû kili ta ṛè mì Bìndi-Mbíṛì nó ꞌví dù a ꞌduù ŋìnó mbe kû te wiṛi mítí ndâ mbe ꞌdó-ꞌdo, yí ꞌví dù a ꞌduù ŋìnó ta go bà bàkà tó i kuu tí wó, yí ꞌví dù a ꞌduù ŋìnó náa a muu ká tí wó, yí ꞌví dù a ꞌduù ŋìnó jáá kùṛo Mbíṛì, yí ꞌví dù a ꞌduù ŋìnó náa tàkòcò Mbíṛì kû peteke gítí wó, yí ꞌví dù me ꞌduù ŋìnó mbe kû bàkà i gí tàkò có mì sé njembí nó lá. ꞌDuù ŋìnó tí kpo ꞌduù kùṛo ndâ mbe kû kili ta ṛè mì Bìndi-Mbíṛì nó ꞌví dù a mbe zèè yúcó tí nó ta kponje gítí  wálá náa à nìbà  ji yí nó ta ꞌbì wó sósòꞌô, tacó wàa, yí ꞌví ꞌde ta wotí bà nìbà yúcó ji ndâ ꞌduù, yí delè ꞌví ꞌde ta wotí bà uu gbí còngò ꞌvéṛè mì ndâ mbe kû ꞌvii ꞌvéṛè mítí yúcó nó ji ndú.
10 Tacó ndâ tù-ká-kpò-có, ta gbí có mì ndú wálá, tí ndâ mbe ꞌvéṛè mbe kû eendi ndâ ꞌduù me mbè kuu tí . Ndâ mbe le bèṛè ndâ i ꞌvéṛè tí nò kpolo ma a ndâ mbe zèè có gítí tàkìì bà ya gí gbí gàzâ. 11 Wò ꞌví si ndú ꞌví njaanga nje ndú lá. Tacó ndâ ŋa ndâ ꞌduù tí nò a ndâ mbe volo ꞌbá mì ndâ ꞌduù ta bà nìbà ndâ i ŋìnó mbe ꞌvii ṛo ꞌbá lá nô. Ndú delè kû bàkà ndâ i-nô tí nò ká tacó bà zò-nje ndú cuki. 12 A ꞌbí ꞌduù tí ꞌdóó dìì ndú, delè tí mbe ꞌdè-kòcò mì ndú tí ndâ ꞌduù Kèrétì táánò, ká ꞌdè có énó máa, «Nèté mì ndâ ꞌduù Kèrétì káa bà ꞌdè ꞌvéṛè cuki. Ndú a ndâ mbe kpó, tí ndâ mbe gàmàtà ta i gbí ndú wálá.» 13 Có tí nò náa ꞌduù tí nò ꞌdè nò a yúcó. À má énò, baṛaka mítí ndú, tacó wàa ndú ꞌví dù tí ndâ cèe mbe tee njembí ndú mítí Mbíṛì, 14 wàa ndú ꞌví je mbí ndú mítí ndâ tà-ká-tà ꞌvéṛè mì ndâ Jùdéyà lá, ndú delè ꞌví bàkà go ndâ có mì ndâ ꞌduù tí nó náa bà ꞌdi yúcó me cékélè gbí tú ndú gî nó lá.
15 Ndâ i ꞌdáá gî kùṛo ndâ ꞌduù ŋìnó ta njembí ndú ngbáṛángàꞌi kùṛo Mbíṛì nó káa ndâ ngbáṛángà i, káa ngbáṛángà i kùṛo ndâ ꞌduù ŋìnó tí ndâ vóló-volo ꞌduù mbe tee njembí ndú mítí Mbíṛì lá nó wálá, tacó muu ndú, ta ndâ kpokèjì bà koṛo có mì ndú volo gî. 16 Ndú kû bàkà tí ndú tí ndâ mbe ŋò Mbíṛì ni gî, káa cè ŋa bà bàkà ndâ i mì ndú dooko gítí bà bàkà i mì ndâ mbe ŋò Mbíṛì ni gî lá. Ndú a ndâ vò ꞌduù, tí ndâ mbe kpò có, mbe ꞌvii tí ndâ mbe bàkà tó i lá.