4
ख्रीष्टया प्रेरितत
1 जिपिं परमेश्वरयागु गुप्ति खँ लः ल्हाना तःपिं ख्रीष्टया च्यःत खः धकाः छिमिसं भाःपी माः। 2 विश्वास याये बहःपिं च्यःत खः धकाः जिमिसं क्यने माः। 3 अय्जूगुलिं आः थ्व संसारयापिं मनूतय्सं थें छिमिसं जितः भिं धाःसां मभिं धाःसां वास्ता मदु। थः थःम्हं तुं हे नं जिं थःत भिंम्ह खः ला कि मभिंम्ह खः धकाः धाये मखु। 4 जिगु नुगः यचुसे च्वं। अथे धकाः जि द्वं मदुम्ह मनू खः धयागु मखु, जिगु न्याय याइम्ह ला प्रभु खः।
5 उकिं ई स्वयाः न्हापा छुं खँय् न्याय यायेगु याये मते। तर प्रभु झाया मदितले पिया च्वँ। छाय्धाःसा वय्कलं मनूतय्गु नुगलय् च्वंगु गुप्ति ज्याखँ, अले हानं सुनानं मसीक याःपिनिगु ज्याखँ नं उलादी। थथे जुइ धुंकाः स्याबास बी माःपिं मनूतय्त परमेश्वरं हे स्याबास बियादी।
6 यःपिं दाजुकिजापिं, छिमिगु निंतिं जिं व अपोल्लोसं च्वय् धयागु खँ यानाः क्यना बियागु दु। झीत बीगु आज्ञायात मानय् याये माः धकाः छिमित स्यनेत हे जिमिसं थथे यानाः क्यनागु खः। छिपिं मध्ये सुं नं तःधंछुइ मते, अले हानं मेपिन्त हेला याये नं मते। 7 छिमित सुनां मेपिं स्वयाः तःधं याना तल? छिमिके दुगु फुक्कं परमेश्वरं हे बियादीगु मखु ला? फुक्कं अथे बियातःगु जूसां ब्यूगु हे मखु थें यानाः छाय् छिपिं तःधंछुया जुइगु?
8 माक्व फुक्क छिमिके दये धुंकल मखु ला? छिपिं तःमि जुइ धुन मखु ला? जिपिं मदुसां छिपिं जुजु थें हे जुइ धुन मखु ला? जिमित ला छिपिं धात्थें हे जुजु जूगु जूसा यः, छाय्धाःसा जिपिं नं छिपिं नाप जुजु जुइ दइ। 9 मनूतय्त स्याये यंकीबलय् तमासा क्यने थें जिमित नं परमेश्वरं प्रेरितत दय्कादिल। उकिं हे ला खःनि मनूतय्गु न्ह्यःने व स्वर्गदूततय्गु न्ह्यःने नं थ्व संसारय् जिपिं तमासा जुयाच्वंगु।
10 ख्रीष्टयागु निंतिं जिपिं मूर्खत थें जुइ धुन। ख्रीष्टयात विश्वास याःगुलिं छिपिं धाःसा बुद्धिमान थें जुइ धुन, मखु ला? जिपिं बमलाः, छिपिं बल्लाः। जिमित फुक्कसिनं क्वह्यंका तल, छिमित फुक्कसिनं तःधंका तल। 11 आः तक नं जिमिसं नयेत्वने मखं, भ्वाथःगु वसतं पुनाच्वनागु दु। अले जिमिसं कसाः नयाच्वनागु दु, अले छेँबुँ मदय्का च्वनागु दु। 12 थःम्हं चःति हाय्काः जिमिसं ज्या यानाः नयाच्वना। सराः ब्यूपिन्त जिमिसं आशिष बियाच्वना। सास्ति ब्यूसां जिमिसं सह यानाच्वना।*४:१२ प्रे १८:३ 13 जिमिगु इज्जत काःपिन्त जिमिसं नाइक लिसः बियाच्वना। जिपिं ला आः तक थ्व संसारय् साःगाः थें जुयाच्वना। दक्वसियां मिखाया धू जुयाच्वना।
14 छिमित लज्या चाय्केत मखु बरु जि यःपिं मस्तय्त थें छिमित सल्लाह बीत थ्व च्वयाच्वनागु खः। 15 छिमित ख्रीष्टयागु भिंगु खँ स्यनिपिं द्वलंद्वः दःसां छिमि तःम्हमछि ला अबु दइ मखु। छिमित ख्रीष्ट येशूयागु भिंगु खँ कनाः ख्रीष्ट येशूयात म्हसीका बियाम्ह जि छिमि अबु जुयागु दु। 16 अय्जूगुलिं जिं यानाच्वना थें छिमिसं नं या धकाः बिन्ति यानाच्वनागु खः।*४:१६ १ कोर ११:१; फिलि ३:१७
17 अथेजूगुलिं जिं छिमिथाय् तिमोथीयात छ्वया हयागु दु। व जितः तसकं यःम्ह व विश्वास याये बहःम्ह जिम्ह काय् थें खः। वयात जिं हे ख्रीष्टयात विश्वास याकागु खः। ख्रीष्ट येशू पाखें दुगु न्हूगु जीवनय् जि गुकथं च्वनाच्वन धयागु खँ फुक्क वं हे छिमित कनी। थ्व हे खँ जिं मण्डलीइ फुक्कभनं स्यना जुयागु दु।
18 जि आम्कन वइ मखुत धकाः छिपिं मध्ये गुम्हं गुम्हं तःधंछुया जूगु दु, हं। 19 प्रभुं जितः छ्वया हयादीसा जि आम्कन याकनं वये। अले तःधंछुया जूपिनिगु खँ मखु, इमिगु शक्ति स्वये। 20 छाय्धाःसा परमेश्वरयागु राज्य खँय् मखु, बरु शक्तिइ दु 21 छिमित छु यः, आम्कन वयेबलय् जि कथि ज्वना वये कि क्वमिलु आत्मा व दया माया ज्वना वये?