2
थेसलोनिकेय् पावलयागु ज्या
1 दाजुकिजापिं, जिपिं आम्कन वयागु सितिं मवं धकाः ला छिमिसं सि हे स्यू। 2 आम्कन वये न्ह्यः फिलिप्पी च्वंपिन्सं जिमित दुःख बियाः नं जिमिगु इज्जत तकं काल धकाः ला छिमिसं सि हे स्यू। अय्नं परमेश्वरं जिमित साहस बियादीगुलिं जिमिसं न्ह्याक्व हे विरोधीत दःसां छिमित भिंगु खँ न्यंकेगु मत्वःता।*२:२ प्रे १६:१९-२४; १७:१-९ 3 जिमिसं छिमित न मखुगु खँ हे स्यनागु खः, न मभिंगु मतिइ तयाः हे स्यनागु खः, न सुयातं झंगःलाय्त हे स्यनागु खः।
4 परमेश्वरं हे जिमित विश्वास यानाः भिंगु खँ न्यंकेगु ज्या लःल्हानादीगु खः। जिमिसं मनूतय्त मखु, बरु जिमित जाँचय् याना दीम्ह परमेश्वरयात लय्ताय्केत नवानाच्वनागु खः। 5 छिमिसं सि हे स्यू, जिमिसं छिमिके ह्यय्का कायेत स्वयागु नं मदु, अले न छुं काये दइ धकाः हे जिमिसं लोभ यानागु दु। परमेश्वर साक्षी दु। 6 छिमिसं व मेपिन्सं नं जिमित तःधंके माः धकाः जिमिसं धयागु मदु।
7 खः ला, ख्रीष्टया प्रेरित जूगुलिं जिमिसं थथे याये फुगु खः। अय्नं जिमिसं छिमित मां नं मस्तय्त सुसाःकुसाः याः थें तितिपापा याना तया। 8 जिमिसं छिमित धात्थें हे माया यानाच्वनागु दु। परमेश्वरयागु भिंगु खँ जक मखु, छिमित थःगु प्राण तकं बी माःसां जिमिसं लिफः स्वये मखु, छाय्धाःसा जिमित छिमिगु तसकं माया वं।
9 दाजुकिजापिं, जिमिसं यक्व दुःखकष्ट सियाः ज्या यानागु ला छिमि लुमं हे जुइ। भिंगु खँ न्यंकः वयाबलय् जिमिसं छिपिं सुयातं थाकु मजुइमा धकाः चा न्हि मद्यंसे ज्या याना।
10 छिपिं विश्वासीतय्गु न्ह्यःने जिमिसं गुलि भिंक, बांलाक अले छुं नं धाये थाय् मदय्क ज्या सना धकाः छिमिसं सि हे स्यू, अले परमेश्वरं नं स्यू। 11 बौनं थः मस्तय्त गथे याना तइ, अथे हे जिमिसं नं छिमित याना तया। 12 छिमिसं परमेश्वरयात यःथें याना जुइ फयेमा धकाः जिमिसं छिमित गुलि अर्ती व साहस बिया। वय्कलं हे छिमित थःगु राज्यय् दुकायेत व तःधंकेत सःतादीगु खः।
13 जिमिसं परमेश्वरयागु वचन न्यंकाबलय् छिमिसं थुकियात मनूतय्गु वचन मखु, परमेश्वरयागु हे वचन खः धकाः न्यना काल। धात्थें हे थ्व परमेश्वरयागु वचन खः। अले थ्व हे वचनं छिमिगु नुगलय् हा कयाच्वंगु दु। उकिं जिमिसं परमेश्वरयात न्ह्याबलें धन्यवाद बियाच्वनागु दु।
14 दाजुकिजापिं, ख्रीष्ट येशूयात विश्वास याना च्वंपिं यहूदियाय् च्वंगु मण्डलीयापिन्सं थें छिमिसं नं दुःखकष्ट सियाच्वंगु दु। इमित गथे यहूदीतय्सं दुःख बियाच्वन, छिमित नं अथे हे छिमिगु देशय् च्वंपिन्सं दुःख बियाच्वंगु दु।*२:१४ प्रे १७:५ 15 व हे यहूदीतय्सं प्रभु येशू व न्हापायापिं अगमवक्तातय्त स्याना बिल। अले जिमित नं ख्याना हल। परमेश्वरयात मयःगु ज्या यानाः इपिं न्ह्याम्हय्सियां विरोधी जुया च्वन।*२:१५ प्रे ९:२३,२९; १३:४५,५०; १४:२,५,१९; १७:५,१३; १८:१२ 16 इमिसं जिमित यहूदीमखुपिन्त मुक्तियागु खँ न्यंके हे मब्यू। इमिसं थुकथं पाप मुंकाच्वन। उकिं इमिसं लिपा तकं परमेश्वरयागु तं फया च्वने माली।
पावलं हानं थेसलोनिकेय् वने मास्ति वय्कूगु
17 यःपिं दाजुकिजापिं, छिपिं लिसे बायाः पलख ख्वाः स्वये मखंसां नुगलं ला बायाच्वनागु मदु। छिमिथाय् हाकनं वयेत जिमिसं तसकं कुतः यानाच्वनागु दु। 18 जिपिं छिमिथाय् वयेत स्वयाच्वनागु दु। जि पावल ला ग्वःकःमछि वयेत स्वये धुन। अय्नं शैतानं जिमित वय्के हे मबिल। 19 जिमिगु आशा धाःसां, जिमिगु लय्ताः धाःसां, अले झी प्रभु येशू ख्रीष्ट झाइबलय् जिमि छ्यं धस्वाकेगु श्रीपेच धाःसां छिपिं हे, मखु ला? 20 जिमिगु लय्ताः धाःसां, जिमिगु छ्यं धस्वाकीपिं धाःसां छिपिं हे खः।