1 अय्‌जूगुलिं दक्‍वसिबय्‌ न्‍हापां मण्डलीयापिन्त जिं धाये -- फुक्‍क मनूतय्‌गु निंतिं प्रार्थना व बिन्‍ति यायेगु व सुभाय्‌ बीगु या। 2 शान्‍ति व चितासू दय्‌कः म्‍वाना च्‍वने फयेमा, अले परमेश्वरयात दुग्‍यय्‌क सेवा याये फयेमा धकाः जुजुपिनिगु निंतिं व अधिकार दुपिनिगु निंतिं नं प्रार्थना या। 3 झीत मुक्ति बियादीम्‍ह परमेश्वरयात थथे याइगु यः। अले थ्‍व भिंगु ज्‍या नं खः। 4 फुक्‍क मनूतय्‌सं मुक्ति काये फयेमा व सत्‍यगु खँयात बांलाक सीका काये फयेमा धयागु वय्‌कःया इच्‍छा खः। 5 परमेश्वर छम्‍ह हे जक दु। अले दथुइ च्‍वनाः मनूतय्‌त व परमेश्वरयात मिलय्‌ यानादीम्‍ह नं छम्‍ह हे जक दु। थथे मिलय्‌ यानादीम्‍ह मनू ख्रीष्‍ट येशू खः। 6 वय्‌कः फुक्‍क मनूतय्‌गु पलेसाय्‌ सिनादिल। न्‍हापांनिसें हे क्‍वःछिना तःकथं वय्‌कः पाय्‌छि इलय्‌ सिनादिल। 7 थ्‍व हे ज्‍या यायेत जितः भिंगु खँ न्‍यंकः जुइम्‍ह व प्रेरित यानादिल। जिं धात्‍थेंगु खँ धयाच्‍वनागु खः, मखुगु खँ ल्‍हानागु मखु। यहूदीमखुपिन्‍त थ्‍व हे धात्‍थेंगु खँ कनाः विश्वास याकेत जितः गुरू ल्‍यया तःगु खः।*२:७ २ तिमो १:११

8 मिजंतय्‌सं न्‍ह्याथाय्‌ नं तं मचासे व जवाःसवाः मयासे दुनुगलंनिसें ल्‍हाः ल्ह्वनाः प्रार्थना याये माः।

9 अथे हे मिसातय्‌सं नं ल्‍वय्‌क सादा वसतं पुना जुइ माः। तःजिगु तिसा, वसः पुनाः अप्‍वः समाः यानाजुइ मते।*२:९ १ पत्र ३:३ 10 परमेश्वरयात मानय्‌ याइपिं मिसातय्‌सं थःत ल्‍वय्‌क भिंगु ज्‍या याना जुइ माः।

11 स्‍यनेकने यायेथाय्‌ मिसातय्‌सं सुम्‍क च्‍वनाः सय्‌का काये माः, अले धाःथें च्‍वने माः। 12 मिसातय्‌सं मिजंतय्‌त क्‍वत्‍यला तयेगु व स्‍यनेकने यायेगु ज्‍या जिं याके बी मखु। मिसातय्‌सं सुम्‍क च्‍वनेगु याये माः 13 छाय्‌धाःसा दकलय्‌ न्‍हापालाक आदमयात सृष्‍टि यानादीगु खः। अले लिपातिनि हव्‍वायात सृष्‍टि यानादीगु खः।*२:१३ उत २:७,२१-२२ 14 आदमयात मिखाय्‌ धुलं छ्वाकूगु मखु, बरु हव्‍वायात मिखाय्‌ धुलं छ्वाकाः वया पाखें हे पाप याकूगु खः।*२:१४ उत ३:१-६ 15 अय्‌नं मिसातय्‌सं क्‍वात्तुक विश्वास व माया यानाः पवित्र जुयाच्‍वन धाःसा मचा बुइकीबलय्‌ इपिं कष्‍टं बचय्‌ जुइ।