1 जिमिसं थःपिन्‍त तःधंकागु मखु। मेपिं मनूत थें जिमित छिमिगु पाखें सिफारिस पौ कायेगु वा छिमित सिफारिस पौ बी माःगु मदु। 2 छिपिं हे जिमिगु नुगलय्‌ च्‍वयातःगु सकसिनं ब्‍वने व थुइके फइगु पौ खः। 3 छिपिं ख्रीष्‍टं च्‍वयाहःगु पौ खः। अले जिमिगु पाखें छ्वयागु खः। थ्‍व मसिं च्‍वयातःगु पौ मखु, अले ल्वहंयागु ग्वरलय्‌ च्वयातःगु पौ नं मखु। थ्व पौ ला मनूतय्‌गु नुगलय्‌ म्वाःम्ह परमेश्वरयागु आत्मां च्वयातःगु पौ खः।*३:३ प्रस २४:१२; यर ३१:३३; इज ११:१९; ३६:२६

4 ख्रीष्टपाखें परमेश्वरयाके जिमिसं थज्‍याःगु हे भरोसा तयाच्‍वना। 5 थ्‍व ज्‍या जिमिगु हे शक्तिं याये फु धकाः धायेगु जिमिगु शक्ति मदु। थ्‍व ज्‍या जिमित याये फय्‌कादीम्‍ह परमेश्वर हे खः। 6 उकिं जिमित न्‍हूगु बाचा न्‍यंके फय्‌कादीम्‍ह परमेश्वर हे खः। थ्‍व न्‍हूगु बाचा च्‍वयातःगु नियम मखु, बरु थ्‍व आत्‍मां बियादीगु खः। च्‍वयातःगु नियमं मनूतय्‌त स्‍याइ, तर आत्‍मां जीवन बी।*३:६ यर ३१:३१

7 ल्‍वहंयागु ग्वरलय्‌ व्‍यवस्‍था च्‍वयाः ब्‍यूबलय्‌ परमेश्वरयागु जलं मोशायागु ख्‍वाः झल्‍ल थिनावल। अले इस्राएलीतय्‌सं वयागु ख्‍वाः तकं चूलाक स्‍वये मफुत। व हे जः खिउँया वनाच्‍वंगु दु। मनूतय्‌त स्‍याकीगु व्‍यवस्‍था ब्‍यूबलय्‌ ला अथे झः झः धाः धाःसा*३:७ प्रस ३४:२९ 8 मनूतय्‌गु पाप क्षमा यानाबी फुम्‍ह आत्‍मा बियादीबलय्‌ झन गुलि जक झः झः धाइगु जुइ? 9 मनूतय्‌गु पाप क्षमा यानाबी मफुगु व्‍यवस्‍था ब्‍यूबलय्‌ ला अथे झः झः धाः धासेंलि झीत परमेश्वरया न्‍ह्यःने धर्मी यानादीम्‍ह आत्‍मा बियादीबलय्‌ झन गुलि जक झः झः धाइगु जुइ। 10 न्‍हापायागु स्‍वयाः आःयागु तसकं झः झः धाःगुलिं न्‍हापायागु अथें तना वन। 11 छुं ई तक जक दयाच्‍वनिगु ला उलि झः झः धाः धाल धाःसा सदां दयाच्‍वनिगु गुलि जक झः झः धाइगु जुइ?

12 थ्‍व खँय्‌ आशा यानाः हे जिमिसं मग्‍यासे थथे नवाये फुगु खः। 13 थःगु ख्‍वाः हानं खिउँया वंगुलिं इस्राएलीतय्‌सं मखनेमा धकाः मोशां थःगु ख्‍वाः त्‍वपुल। जिपिं मोशा थें ला मखु।*३:१३ प्रस ३४:३३ 14 अबलय्‌ इस्राएलीतय्‌गु नुगः छाः। थौं तक नं इमिसं व्‍यवस्‍था ब्‍वनिबलय्‌ थुइके मफुनि, इमिगु नुगःयात जालिं भुनातः नि। अले इमिसं छुं हे थुइके फइ मखु। ख्रीष्टयात विश्वास याये धुंकाः थ्व जालि चिलावनी। 15 थौं तक नं इमिसं मोशाया व्‍यवस्‍था ब्‍वनिबलय्‌ इमिगु नुगःयात थ्व जालिं भुनातः नि।

16 तर गुबलय्‌ मनू प्रभुयाथाय्‌ लिहां वइ उबलय्‌ वयागु नुगलं जालि उला वनी।*३:१६ प्रस ३४:३४ 17 प्रभु आत्‍मा खः। गन प्रभुयागु आत्‍मा दइ अन वय्‌कलं स्वतन्त्रता बियादी। 18 थुकथं झीगु ख्‍वाः उलातःगुलिं प्रभुयागु जलं झल झल थिनाच्‍वंगु दु। प्रभुयागु जलं झीपिं नं न्‍हियान्‍हिथं प्रभु थें जुइत छगू जलं मेगु जलय्‌ हिला वनाच्‍वनागु दु।