5
स्वर्गया झीगु न्हूगु म्ह
1 झीगु थ्व म्ह झीपिं च्वनेगु संसारयागु छेँ थें खः। गुबलय् झीपिं सी अबलय् परमेश्वरं झीत मेगु न्हूगु म्ह बियादी। न्हूगु म्ह मनूतय्सं दय्कातःगु छेँ थें मखु। सदां दयाच्वनिगु स्वर्गयागु छेँ थें खः। 2 थ्व संसारय् म्वाना च्वँतले झीत तसकं दुःखकष्ट जुइ। झीपिं ला स्वर्गय् च्वंगु म्हयात वसः थें फीत आय्बुयाच्वना। 3 स्वर्गय् झीत न्हूगु म्ह बियादी, उकिं झी म्ह मदय्क च्वने माली मखु। 4 थ्व संसारय् झीपिं म्वाना च्वँतले झीत तसकं दुःखकष्ट जुया च्वनिगुलिं झीगु मन ख्वः। अथे धकाः झीपिं सीत आय्बुयाच्वनागु मखु, बरु स्वर्गय् च्वंगु न्हूगु म्ह फीत आय्बुयाच्वनागु खः। 5 झीत थज्याःगु न्हूगु म्ह बियादीम्ह परमेश्वर हे खः। वय्कलं थथे यानादी तिनि धकाः सीकेत झीत पवित्र आत्मा बैनाकथं बियादीगु खः।
6 उकिं जिमित पक्का विश्वास दु। थ्व म्ह म्वाना च्वँतले प्रभुपाखें तापाना च्वनी धकाः जिमिसं स्यू। 7 अय्जूगुलिं हे जिपिं विश्वासं म्वानाच्वनागु खः, मिखां खंगुलिइ मखु। 8 जिमित पक्का विश्वास दु, अले थ्व म्हयात त्वःताः प्रभुलिसे च्वंवनेत जिपिं न्ह्याबलें न्ह्यचिलाच्वनागु दु। 9 थन च्वंसां स्वर्गय् च्वंसां प्रभुयात यःथें जक यानाच्वनेगु जिमिगु छगू हे जक आजु खः। 10 न्याय यानादी खुन्हु झीपिं सकलें ख्रीष्टया न्ह्यःने दंवने मानि। अबलय् थन संसारय् च्वनाः भिंगु यानावंपिन्त भिंक हे, अले मभिंगु यानावंपिन्त मभिंक हे न्याय यानादी।*५:१० रोम १४:१०
ख्रीष्टपाखें परमेश्वर नापं मिलय् जुयेगु
11 अय्जूगुलिं प्रभुया भय कायेगु छु खः व जिमिसं बांलाक थूगुलिं मेपिं मनूतय्त नं प्रभुयात मानय् याकेत कुतः यानाच्वनागु खः। परमेश्वरं जिमित बांलाक म्हस्यू, छिमिसं नं जितः बांलाक म्हसी धयागु आशा यानागु दु। 12 हानं जिपिं भिंपिं मनूत खः धकाः धायेत छिमित थथे च्वयाच्वनागु मखु। बरु जिमिगु पँ लिनाः छिपिं तःधं जुइ फयेमा धकाः थथे च्वयाच्वनागु खः। थथे मनूतय्गु नुगः मस्वसे, ख्वाःपाः जक स्वयाः खँ ल्हाइपिं मनूतय्त छिमिसं कुगाक्क लिसः बी फयेमा। 13 थथे धाल धकाः जिपिं होश मदुपिं खः धयागु जूसा परमेश्वरयागु निंतिं खः। अले जिपिं होशय् दुपिं खः धयागु जूसा छिमिगु निंतिं खः। 14 ख्रीष्टं जिमित माया यानादीगुलिं थुकथं जिमिसं ज्या यानाच्वने माःगु खः। फुक्क मनूतय्गु निंतिं ख्रीष्ट सिनादीगु खः, उकिं सिनादीम्ह ख्रीष्ट नाप फुक्क मनूत सित। 15 फुक्क मनूतय्गु निंतिं ख्रीष्ट सिनादिल। उकिं म्वाना च्वंपिं आः थःगु निंतिं मखु, बरु इमिगु निंतिं सिनाः म्वानादीम्ह ख्रीष्टयागु निंतिं म्वानाच्वने माः।
16 अय्जूगुलिं आवंलि जिमिसं सुयातं ख्वाः स्वयाः लने मखुत। खः ला, छकः ख्रीष्टयात हे जिमिसं अथे ख्वाः स्वयाः लनेधुन। आः वय्कःयात जिमिसं अथे लनेगु त्वःतेधुन। 17 अथें जुयाः सुं मनू ख्रीष्टनाप दु धाःसा व न्हूम्ह मनू जुइ। पुलांगु मदया वन, फुक्क न्हूगु जुल।
18 थथे यानादीम्ह परमेश्वर हे खः। ख्रीष्टपाखें वय्कलं झीत थः नाप मिलय् यानाः मेपिन्त नं वय्कः नाप मिलय् याकेगु ज्या जिमिगु ल्हातय् बियादीगु दु। 19 ख्रीष्टपाखें फुक्क मनूतय्त परमेश्वरं थः नाप मिलय् यानाच्वंगु दु धकाः जिमिसं न्यंकाच्वनागु दु। मनूतय्सं याःगु पापया ल्याः तयामदिसे वय्कलं सकसितं थःलिसे मिलय् यानादीगु खँ मेमेपिन्त नं न्यंकेत जिमित धयादीगु दु।
20 अय्जूगुलिं जिपिं ख्रीष्टं छ्वया हयादीपिं मनूत खः। जिमिगु पाखें परमेश्वर छिपिं नाप नवानाच्वनादीगु दु। ख्रीष्टयागु निंतिं जिमिसं थथे नवानाच्वनागु खः। छिपिं फुक्कसिनं पापी ज्याखँ यायेगु त्वःताः परमेश्वर नाप मिलय् जुइत वय्कःयाथाय् लिहां वा धकाः जिमिसं दुनुगलंनिसें छिमित बिन्ति यानाच्वनागु दु। 21 ख्रीष्टयाके पाप धयागु हे मदु। अय्नं परमेश्वरं झीगु पाप ख्रीष्टयात कुबिकादिल। ख्रीष्टं थथे यानादीगुलिं हे झीपिं परमेश्वर नाप मिलय् जुइ फइ, अले परमेश्वरया न्ह्यःने धर्मी ठहरय् जुइ।