यूहन्‍नां च्‍वःगु निगूगु पौ
म्‍हसीका
थ्‍व पौ यूहन्‍नां “थकालि” कथं “मिसा व वया मस्‍तय्‌त” च्‍वःगु खः। “मिसा व वया मस्‍त” या अर्थ अन च्‍वंगु मण्‍डली व मण्‍डलीया विश्वासीत जुइमा। यूहन्‍नां थुकी चिहाकय्‌क विश्वासीतय्‌त थःथवय्‌ माया याना च्‍वनेत व फताहा गुरूत व इमिगु शिक्षा पाखें बचय्‌ जुया च्‍वनेत ख्‍याच्‍वः बियातःगु दु।
धलः पौ
न्‍ह्यखँ .......................................................... १-३
माया हे दक्‍वसिबय्‌ तःधं ............................... ४-६
मखुगु शिक्षा पाखें बचय्‌ जुयाच्‍वनेगु ख्‍याच्‍वः.... ७-११
क्‍वचाय्‌कूगु ................................................ १२-१३
२ यूहन्‍ना
1
यूहन्‍नापाखें ज्‍वजलपा
परमेश्वरं ल्‍ययादीम्‍ह मिसा व वया मस्‍तय्‌त जि मण्‍डलीया थकालिं छिमित धात्‍थेंयागु माया याना। सत्‍ययात म्‍हस्‍यूपिं फुक्‍कसिनं छिमित माया यानाच्‍वंगु दु। थ्‍व सत्‍य झीगु नुगलय्‌ न्‍ह्याबलें दयाच्‍वनी।
अले थ्‍व हे सत्‍य व मायां यानाः परमेश्वर बाः व वय्‌कःया काय्‌ येशू ख्रीष्‍टं झीत दया माया व शान्‍ति बियादी।
सत्‍य व माया
झी बाःनं धयादी थें आम्‍कन मण्‍डलीइ च्‍वंपिं गुलिं गुलिं मस्‍तय्‌सं सत्‍ययात मानय्‌ याना च्‍वंगु सियाः जि तसकं हे लय्‌ताया च्‍वनागु दु।
अय्‌जूगुलिं नं आम्‍कन मण्‍डलीइ च्‍वंपिन्‍सं थःथवय्‌ माया याना च्‍वँ धकाः जिं छिमित बिन्‍ति याना हयागु खः। न्‍हापांनिसें हे झीत थःथवय्‌ माया याना च्‍वनेमाः धकाः धयातःगु खः, उकिं थ्‍व न्‍हूगु खँ मखु।* १:५ यूह १३:३४; १५:१२,१७ वय्‌कःयागु आज्ञा मानय्‌ यायेगु हे धात्‍थेंयागु माया खः। छिमिसं न्‍हापांनिसें न्‍यंगु आज्ञा थ्‍व हे खः -- छिमिसं थःथवय्‌ माया याना च्‍वँ।
येशू ख्रीष्‍ट मनू जुयाः झाःगु मखु धकाः धाइपिं मनूत नं थ्‍व संसारय्‌ यक्‍व दु। थुपिं फताहात खः। थुपिं ख्रीष्‍टया शत्रुत नं खः। अय्‌जूगुलिं होश याना च्‍वँ, मखुसा छिमिसं थथे ज्‍या सनाच्‍वंगु फुक्‍कं सितिं वनी। बरु प्रभुं बी धकाः तया तःगु फुक्‍क सिरपाः काये फय्‌कि। सुनानं येशू ख्रीष्‍टं स्‍यनादीगु खँ मानय्‌ मयासे मेमेगु हे याना जुल धाःसा अज्‍याःम्‍ह मनू नाप परमेश्वर च्‍वनादी मखु। तर येशू ख्रीष्‍टं स्‍यनादीगु खँ मानय्‌ याना जूपिं नाप परमेश्वर व वय्‌कःया काय्‌ येशू ख्रीष्‍ट निम्‍हं च्‍वनादी।
10 अय्‌जूगुलिं येशू ख्रीष्‍टं स्‍यनादीगु खँ नाप पाय्‌छि मजुइक मेकथं हे स्‍यना जुइपिं मनूत छिमिगु छेँय्‌ वःसा इमित दुकाये मते। थज्‍याःपिं मनूतय्‌त ज्वजलपा नं याये मते। 11 सुनानं थज्‍याःपिं फताहातय्‌त ज्‍वजलपा यासाः ज्‍वजलपा याःपिं मनूतय्‌सं इमिगु मभिंगु ज्‍याय्‌ ब्‍वति काःगु जुइ।
12 जिं छिमित च्वये माःगु खँ ला यक्‍व हे दु। तर मसी व भ्‍वँतं मखु। आम्‍कन हे वयाः धाये, अले झीपिं सकलें लय्‌ताय्‌ खनी।
13 थन च्‍वंगु मण्‍डलीयापिं विश्वासीतय्‌सं नं छिमित ज्‍वजलपा धया हःगु दु।

*1:5 १:५ यूह १३:३४; १५:१२,१७