1 मनश्‍शे झिंनिदँ दुबलय् जुजु जूगु खः*२१:१ ई.पु. ६९७ थुबलय्‌निसें मनश्‍शें थः बौ हिजकियानापं मिलय् जुयाः हिजकिया सीगु दँ ई.पु. ६८६ तक राज्‍य यात । वं यरूशलेमय् नेय्‌न्‍यादँ तक राज्‍य यात। वया मांया नां हेप्‍सीबा खः। 2 वं परमप्रभुं इस्राएलीतय्‌गु न्‍ह्यःनं पितिनाछ्वःपिं जातितय्‌सं याःथें परमप्रभुयात मयःगु मभिंगु ज्‍या यात।✡२१:२ यर १५:४ 3 वं थः बौ हिजकिया जुजुं नाश यानाब्‍यूगु पुजा याइगु थाय्‌त हाकनं दय्‌कल। अले इस्राएलयाम्‍ह जुजु आहाबं याःथें हे वं बालद्यःयात पुजा याइगु वेदीत व अशेरा द्यःमय्‌जुयागु थां दय्‌कल। वं आकाशय् दुगु नगुतय्‌त नं भागियानाः पुजायात। 4 वं परमप्रभुया देगलय् वेदीत दय्‌कल, उगु देगःया बारे परमप्रभुं धयादीगु खः, “यरूशलेमय् जिं थःगु नां तये।”✡२१:४ २ शमू ७:१३ 5 उलि जक मखु वं परमप्रभुया देगःया निगुलिं चुकय् नं आकाशया नगुत पुजा याइगु वेदीत दय्‌कल। 6 वं थःकाय्‌यात मिइ बलि बिल। वं तन्‍त्रमन्‍त्र यात, छुक बिछुक मानय् यात। सीकं दुबिना वइम्‍ह मनू व झाँक्री ज्‍या याइम्‍हय्‌सिके सल्‍लाह काल। वं परमप्रभुयात मयःगु व वय्‌कःयात तंचाय्‌कीगु यक्‍व मभिंगु ज्‍या यात।

7 थःम्‍हं दय्‌के ब्‍यूगु अशेरा द्यःमय्‌जुया थां परमप्रभुया देगलय् तल, उगु देगःया बारे परमप्रभुं दाऊद व वया काय् सोलोमनयात थथे धयादीगु खः, “जिं थ्‍व देगलय् व इस्राएलया फुक्‍क कुलतपाखें ल्‍ययागु यरूशलेमय् जिं न्‍ह्याबलेंया निंतिं जिगु नां तये।✡२१:७-८ १ राज ९:३-५; २ इति ७:१२-१८ 8 इमिसं जिगु फुक्‍क आज्ञा मानय् यानाः जिम्‍ह दास मोशां इमित ब्‍यूगु फुक्‍क विधि व नियम होश यानाः पालन यात धाःसा जिं इमि पुर्खातय्‌त बियागु देशं इस्राएलीतय्‌त थुखे उखे चाःहिके बी मखु।” 9 तर मनूतय्‌सं परमप्रभुया खँ मन्‍यन। मनश्‍शें इमित मखुगु लँय् यंकल। इमिसं परमप्रभुं इस्राएलीतय् न्‍ह्यःने नाश यानादीगु जाति जातितय्‌सं स्‍वयाः अप्‍वः मभिंगु ज्‍या यात।

10 परमप्रभुं थः दास अगमवक्तातपाखें थथे धयादिल, 11 “यहूदायाम्‍ह जुजुं मनश्‍शें याः थें घच्‍चाइपुगु ज्‍या याःगु दु। वं इस्राएलीत स्‍वयाः न्‍ह्यः थ्‍व देशय् च्‍वनाच्‍वंपिं एमोरीतय्‌सं स्‍वयाः अप्‍वः मभिंगु ज्‍या यानाः थःगु मूर्तितपाखें यहूदायात पाप याकूगु दु। 12 अथे जुयाः इस्राएलया परमप्रभु परमेश्‍वरं थथे धयादी – स्‍व, जिं यहूदा व यरूशलेमय् थज्‍याःगु विपत्ति हयाबी कि व न्‍यनीपिं सकसिगुं न्‍हाय्‌पं पीसे च्‍वनी। 13 जिं सामरियाय् तयागु नापे याइगु खिपः व आहाबया घरानाया लागि यख्‍खानागु गं हे यरूशलेमय् तयाबी। सुनानं न्‍याक्‍क सिलाः भ्‍वपुइकूगु भु थें जिं यरूशलेमयात न्‍याक्‍क सिलाबी। 14 जिं थः प्रजाया ल्‍यंदुपिन्‍त त्‍वःताः इमि शत्रुतय्‌गु ल्‍हातय् तयाबी। शत्रुतय्‌सं इमित त्‍याकी अले इमिगु देश लुटे याइ। 15 छाय्‌धाःसा इमिसं जितः मयःगु मभिंगु ज्‍या याःगु दु। इमि पुर्खा मिश्रं पिहां वःगु दिनंनिसें थौं तक इमिसं जितः तंचाय्‌कूगु दु।”

16 मनश्‍शेनं यक्‍व निर्दोष मनूत नं स्‍यात, वं स्‍याःपिं मनूतय्‌गु हिं यरूशलेमया छगू कुन्‍चांनिसें मेगु कुन्‍चातक जाःगु खः। अले वं यहूदायात पाप याकल, इमिसं परमप्रभुया मिखाय् बांमलाःगु ज्‍या यात।

17 मनश्‍शे जुजु जुयाच्‍वंबलय् जूगु मेमेगु घटना, वं याःगु फुक्‍क ज्‍या व वं याःगु पाप यहूदाया जुजुपिनिगु इतिहासया सफुलिइ च्‍वयातःगु दु। 18 मनश्‍शे थः पुर्खात थें सित। वयात उज्‍जाया क्‍यब धाइगु वयागु हे दरबारया क्‍यबय् थुन। वयागु थासय् वया काय् आमोन जुजु जुल।

19 आमोन निइनिदँ दुबलय्†२१:१९ निइनिदँ थथे धयागु ई.पु. ६४२ जुजु जुल। वं यरूशलेमय् निइदँ राज्‍य यात। वया मांया नां हारूसया म्‍ह्याय् मशुल्‍लेमेत खः। व योत्‍बायाम्‍ह खः। 20 वया बौ मनश्‍शें याःथें हे वं नं परमप्रभुयात मयःगु मभिंगु ज्‍या यात। 21 आमोन थः बौ थें हे जुल। वं थः बौनं पुजा याःपिं मूर्तितय्‌त हे पुजा यात। 22 वं परमप्रभु थः पुर्खातय् परमेश्‍वरयात त्‍वःतल। व परमप्रभुया लँय् मवं।

23 आमोनया हाकिमतय्‌सं वयागु विरोधय् ग्‍वःसाः ग्‍वल, जुजुयात वयागु हे दरबारय् स्‍यात। 24 अले देशयापिं मनूतय्‌सं जुजु आमोनया विरोधय् ग्‍वसाः ग्‍वःपिं सकसितं स्‍यात। अले इमिसं वया काय् योशियाहयात वयागु थासय् जुजु दय्‌कल।

25 आमोन जुजु जुयाच्‍वंबलय् जूगु मेमेगु घटना, वं याःगु फुक्‍क ज्‍या यहूदाया जुजुपिनिगु इतिहासया सफुलिइ च्‍वयातःगु दु। 26 वयात उज्‍जाया क्‍यबय् दुगु थःगु हे चिहानय् थुन। वया लिपा वया काय् योशियाह जुजु जुल।