1 दाजुकिजापिं, प्रभुयागु भिंगु खँ न्‍यंकभनं न्‍यना वनेमा, अले छिमिसं थें फुक्‍कसिनं न्‍यनाः विश्वास यायेमा धकाः जिमिगु निंतिं प्रार्थना याना च्‍वँ। 2 फुक्‍क मनूतय्‌सं विश्वास याना मकाइगुलिं मभिंपिं व दुष्‍ट मनूतय्‌गु ल्‍हातं जिमित बचय्‌ याना तया दिसँ धकाः परमेश्वरयात प्रार्थना याना च्‍वँ। 3 प्रभु विश्वास याये बहःम्‍ह खः। वय्‌कलं हे छिमित बल्‍लाकादी, अले दुष्‍टम्‍ह मनूपाखें बचय्‌ याना तयादी। 4 जिमिसं धया थें छिमिसं यानाच्‍वंगु दु, अले याना हे च्‍वनी धकाः जिमिसं प्रभुयाके भरोसा कयागु दु। 5 प्रभुं छिमित परमेश्वरयागु माया व ख्रीष्‍टयागु सह याना च्‍वनेगु शक्ति थुइकादी मा।

6 दाजुकिजापिं, थाकु चायाः जुइपिं व जिमिसं धयागु खँ मन्‍यंपिं नाप जुइ मते धकाः प्रभुयागु नामं जिमिसं छिमित बिन्‍ति यानाच्‍वनागु दु। 7 जिमिसं यानाः थका थें याये माः धकाः ला छिमिसं सि हे स्‍यू। छिपिं नाप च्‍वनाबलय्‌ जिमिसं भचा हे थाकु मचासे ज्‍या याना। 8 जिमिसं सुयाकें सितिं कयाः नयागु मदु, बरु छिमित थाकु मजुइमा धकाः जिमिसं चां न्‍हिं सिनाः सिनाः ज्‍या याना। 9 जिमिसं छिमिगु नये मथ्‍याः धकाः अथे यानागु मखु, बरु छिमिसं नं अथे हे यायेमा धकाः क्‍यनेत अथे यानागु खः। 10 छिपिं नाप च्‍वनाबलय्‌ हे जिमिसं छिमित थथे धयागु खः -- “ज्‍या मयासे च्‍वनिपिन्‍त नके नं मते।”

11 छिपिं मध्‍ये गुम्‍हं गुम्‍हय्‌सिनं थःम्‍हं ज्‍या मयासे मेपिनिगु ज्‍याय्‌ जक ल्‍हाः तयाः सना जुयाच्‍वन धयागु खँ न्‍यनाः थथे च्‍वयाच्‍वनागु खः। 12 थज्‍याःपिन्‍त जिमिसं प्रभु येशू ख्रीष्‍टया नामं ख्‍याच्‍वः बियाः धयाच्‍वना -- “थःगु ल्‍हातं ज्‍या यानाः न।” 13 दाजुकिजापिं, भिंगु बांलाःगु ज्‍या यायेत थाकु चाये मते।

14 आम्‍कन च्‍वंपिं सुनानं च्‍वया हयागु खँ मन्‍यन धाःसा अज्‍याःपिन्‍त म्‍हसीकाः इपिं नाप तापाक हे च्‍वनेगु या। अले इपिं थः थःम्‍हं मछाली। 15 अय्‌नं वयात शत्रु थें भाःपी मते, बरु थः हे दाजुकिजायात थें न्‍वायेगु या।

16 शान्‍ति बियादीम्‍ह प्रभु थःम्‍हं हे छिमित न्‍ह्याबलें फुक्‍क कथंयागु शान्‍ति बियादीमा। प्रभु छिपिं फुक्‍क नाप दीमा।

17 जि पावल थःम्‍हं हे छिमित ज्‍वजलपा च्‍वयाच्‍वनागु दु। जिं च्‍वया हयेगु फुक्‍क पतिइ थथे हे सहि यायेगु खः। थ्‍व जिगु थःगु हे च्वयेगु पहः खः।

18 झी प्रभु येशू ख्रीष्‍टया दया माया छिपिं सकसिकें दयेमा।