तिमोथीयात पावलं च्वःगु निगूगु पौ
म्हसीका
पावलं थ्व निगूगु पौ तिमोथीयात थः ल्याय्म्हम्ह पासा व थःत ग्वाहालि याइम्ह मनूया कथं च्वःगु दु। उबलय् तिमोथी एफिससय् च्वंम्ह मण्डलीयाम्ह छम्ह मू नायः खः। पौया मू खँ सह यायेगु खः। पावलं तिमोथीयात साहस बियाः न्ह्याथें ज्याःगु दुःखकष्ट व विरोध जूसां येशू ख्रीष्टयागु साक्षी बीगु, धात्थेंगु भिंगु खँ व पुलांगु नियम मानय् यानाः स्यनेकने यायेगु सल्लाह बियातःगु दु। थ्व पौलय् तिमोथीयात फयां फतले याकनं रोमय् वयेत इनाप यानातःगु दु। पावलं तिमोथीयात ल्वापु जक पिहांवइगु म्वाःमदुगु जवाःसवाः याना जुइपिंनाप बुला जुइ मते धकाः नं ख्याच्वः बियातःगु दु। च्वय्च्वंगु खँत फुक्कं पावलं थःत हे जूगु खँया दसु बियाः तिमोथीयात लुमंके ब्यूगु खः। न्हूगु नियमय् दुगु पावलया पौत मध्ये थ्व पौ दकलय् लिपा च्वःगु खः। उबलय् पावल रोमया जेलय् थःत मृत्यु दण्ड बीगु ई पिवाः च्वंगु खः।
थ्व पौ पावलं ईस्वी सम्बत ६४-६५ सालय् च्वःगु खः।
धलः पौ
न्ह्यखँ १:१-२
प्रार्थना व अर्ती १:३–२:१३
सल्लाह व ख्याच्वः २:१४–४:५
पावलयात थःत जूगु खँ ४:६-१८
क्वचाय्कूगु ४:१९-२२
२ तिमोथी
1
पावलपाखें ज्वजलपा
1 ख्रीष्ट येशूयात विश्वास याक्वसित जीवन बी धकाः धयादीगुलिं परमेश्वरं वय्कःयाम्ह प्रेरित यानादीम्ह पावलपाखें 2 जि यःम्ह काय् तिमोथीयात*१:२ तिमोथी ग्रीक भाषां तिमोथियसयात थ्व पौ च्वयाच्वना। झी परमेश्वर बाः व प्रभु ख्रीष्ट येशूं छन्त दया माया यानाः शान्ति बियादीमा।✡१:२ प्रे १६:१
सुभाय् व साहस
3 जिं जिमि तापाःबाज्यापिन्सं थें दुनुगलंनिसें परमेश्वरयागु ज्या यानाच्वनागु दु। प्रार्थना यायेबलय् जिं छन्त लुमंकाः चान्हिं परमेश्वरयात सुभाय् बियाच्वनागु दु। 4 छंगु मिखाय् जाया वःगु ख्वबि लुमंकाः जि छन्त नापलाः वये मास्ति वइगु। छन्त नापलाये खंसा जिगु मन च्वनी।
5 छं यचुगु नुगलं विश्वास याःगु जि अज्जं लुमनि। छिमि बज्ये लोइस व मां युनिसं नं अथे हे यचुगु नुगलं विश्वास याःगु खः। छं अज्ज नं उकथं हे यचुगु नुगलं विश्वास यानाच्वंगु दइ धकाः जितः विश्वास दु।✡१:५ प्रे १६:१ 6 अय्जूगुलिं जिं छन्त हानं लुमंका च्वना – जिं छंगु छेनय् ल्हाः तयाबलय् परमेश्वरं बियादीगु वरदानयात छं बांलाक छ्यला च्वँ। 7 परमेश्वरं झीत भयया आत्मा मखु, बरु झीत शक्ति, माया व थःत कःघाये फइगु आत्मा बियादीगु दु।
8 उकिं झी प्रभुयागु भिंगु खँ न्यंका जुइत लज्या चाये मते, अले जितः कुनातःगुलिइ नं लज्या चाये मते, बरु परमेश्वरयागु शक्तिइ भरोसा तयाः छं नं जिं थें तुं भिंगु खँयागु निंतिं दुःखसिया जु। 9 थ्व हे परमेश्वरं झीत बचय् यानाः वय्कःया मनूत यायेत सःतादिल। झीसं यानागु धर्मकर्मं यानाः मखु, बरु वय्कलं हे दया माया यानाः झीत बचय् यानादीगु खः। सृष्टि जुइ न्ह्यः हे ख्रीष्ट येशूं झीत थ्व दया माया बियादीगु खः।
10 झीत मुक्ति बियादीम्ह ख्रीष्ट येशू झायादी धुंकाः तिनि थ्व बांलाक सीदत। वय्कलं मृत्युयात त्याकाः भिंगु खँ न्यंक्वसित अनन्त जीवन बियादिल। 11 थ्व हे भिगुं खँ न्यंकेत व स्यनेत जितः प्रेरित दय्कादीगु खः।✡१:११ १ तिमो २:७
12 थ्व हे ज्यायागु निंतिं जिं थथे दुःखसिया च्वनागु खः। थ्व ज्या यानाः जि लज्यामचाया छाय्धाःसा जिं सुयात विश्वास यानाच्वनागु दु व बांलाक स्यू। अले प्रभुयात जिं लःल्हाना बियागु फुक्क वय्कलं हानं लिहां झाया मदितले बांलाक बचय् यानातयादी।
13 ख्रीष्ट येशूं झीत क्यनादीगु विश्वास व माया थें छं नं जिं धयागु फुक्क खँ याना क्यँ। 14 झीगु दुने च्वनादीम्ह पवित्र आत्मायागु ग्वाहालिं छन्त लःल्हाना बियातःगु सत्य खँयात बांलाक नुगलय् तयाति।
15 एशियाय् च्वंपिं फुक्कसिनं जितः त्वःतावन धकाः ला छं सि हे स्यू। फुगेलस व हेर्मोगेनसं तकं जितः त्वःतावन।
16 ओनेसिफरसया जहानपिन्त परमेश्वरं दया यानादीमा, छाय्धाःसा वं जितः यक्व यक्व हे साहस ब्यूगु दु। जितः झ्यालखानाय् कुनातल धकाः व लज्या मचाः। 17 रोमय् नं वं जितः मात्तुमालाः लुइकल। 18 एफिससय् दुबलय् नं वं जितः गुलि ग्वाहालि यात धयागु खँ ला छं नं बांलाक हे स्यू। प्रभु झायादीबलय् वयात दया माया यानादीमा।