1 परमप्रभु थः परमेश्‍वरयात माया या, अले वय्‌कःया उपदेश, आज्ञा, विधि व नियम न्‍ह्याबलें मानय् या। 2 थौं छिमिसं लुमंकि, छिमि मस्‍तय्‌सं परमप्रभु छिमि परमेश्‍वरया अनुशासन, वय्‌कःया महिमा, बल्‍लाःगु ल्‍हाः व चक्‍कंगु लप्‍पू, 3 मिश्रया जुजु फारो व वया देश न्‍यंकभनं वय्‌कलं क्‍यनादीगु चिं व अजू चाइपुगु ज्‍या,✡११:३ प्रस ७:८–१२:१३ 4 अले मिश्रया सेना, सल व रथतय्‌सं छिमित ल्‍यू वयाच्‍वंबलय् परमप्रभुं गय् यानाः लाल समुद्रया लखं इमित त्‍वःपुयाः न्‍ह्याबलेंया लागि नाश यानादिल व फुक्‍क खंगु व अनुभव याःगु मदु।✡११:४ प्रस १४:२८ 5 थ्‍व थासय् थ्‍यंकः मवतले मरुभूमिइ वय्‌कलं छु छु यानादिल व छिमि मचाखाचातय्‌सं खंगु मदु। 6 रूबेनी एलीआबया काय्‌पिं दातान व अबीरामयात इमि छेँजःपिं, पाल व इमि दक्‍व पशुनापं गुकथं पृथ्‍वीं थःगु म्‍हुतु चाय्‌काः सकल इस्राएलीतय् न्‍ह्यःने हे घुतुका छ्वःगु खः व नं छिमि मचाखाचातय्‌सं खंगु मदु।✡११:६ गन्‍ती १६:३१-३२ 7 छिमिसं धाःसा थःगु हे मिखां परमप्रभुं यानादीगु थुपिं फुक्‍क तःधंगु ज्‍या खंगु दु।

8 अथे जुयाः छिमिसं जिं थौं कनाच्‍वनागु फुक्‍क आज्ञा मानय् या। अले छिपिं बल्‍लानाः यर्दन छिनाः अधिकार यायेत वनाच्‍वंगु देशयात छिमिसं थःगु याये फइ। 9 अले परमप्रभुं छिमि पुर्खालिसें इमित व इमि सन्‍तानतय्‌त बी धकाः पाफयादीगु दुरु व कस्‍ति बाः वयाच्‍वंगु देशय् छिपिं ताःई तक म्‍वानाच्‍वने फइ। 10 छिमिसं त्‍याकाकाये त्‍यंगु देश छिपिं पिहां वःगु मिश्र देश थें मच्‍वं। अन छिमिसं पुसा ह्वलाः वाउँचाया क्‍यबय् थें तुतिं लः तइगु। 11 छिपिं त्‍याका कायेत यर्दनया उखे वनाच्‍वंगु देश धाःसा पहाड व ब्‍यासितय्‌गु देश खः। अन आकाशया लखं बँ प्‍याकी। 12 व देशयात परमप्रभु परमेश्‍वरं हे बिचाःसंचाः यानादी। दँया शुरुंनिसें लिपाथ्‍यंक हे परमप्रभु छिमि परमेश्‍वरं उकियात मदिक्‍क हे स्‍वयाच्‍वनादी।

13 अथे जुयाः परमप्रभु छिमि परमेश्‍वरयात माया या, अले दुनुगलंनिसें व प्राणंनिसें वय्‌कःया सेवा या धइगु जिं छिमित बियागु आज्ञायात बांलाक न्‍यन धाःसा, ✡११:१३-१७ लेवी २६:३-५; व्‍य ७:१२-१६; २८:१-१४ 14 जिं छिमिगु देशय् न्‍हापांगु अले लिपांगु वा पाय्‌छिगु इलय् छ्वयाहये अले छिमिसं थःगु अन्‍न, न्‍हूगु दाखमद्य व जैतूनया चिकं मुंके फइ। 15 जिं छिमि पशुतय्‌गु लागिं ख्‍यलय् घाँय् बुइकाबी। छिमिसं प्‍वाः जाय्‌क नइ व लुधनी।

16 होश या! मखुसा छिमिसं धोखा नयाः मेपिं द्यःतय्‌गु ल्‍यू वनाः इमित पुजा यानाः भागि याइ। 17 अले परमप्रभु छिपिं खनाः तंचायाः बुँनं थःगु बाली मबीमा धकाः वय्‌कलं आकाशं वइगु वा दिकादी, अले परमप्रभुं छिमित बियादीगु भिंगु देशं छिपिं याकनं हे नाश जुयावनी। 18 अथे जुयाः छिमिसं जिगु थुपिं वचन थःगु नुगलय् व मतिइ ति अले थथःगु ल्‍हातय् व कपालय् चिंकथं चिनाब्‍यु।✡११:१८-२० व्‍य ६:६-९ 19 छिपिं थःगु छेँय् च्‍वनीबलय्, लँय् जुइबलय्, ग्‍वतुलीबलय् व दनीबलय् थुमिगु बारे खँल्‍हाबल्‍हा यानाः थःकाय् म्‍ह्याय्‌पिन्‍त स्‍यनेगु या। 20 उपिं आज्ञा थथःगु छेँया लुखा दुवालय् व मूध्‍वाखाय् च्‍वयाः ति। 21 अले परमप्रभुं छिमि पुर्खालिसें बी धकाः पाफयादीगु देशय् छिपिं व छिमि मचाखाचात पृथ्‍वीया आकाश दत्तले म्‍वानाच्‍वनी।

22 छिमिसं जिं धयाच्‍वनागु आज्ञा बांलाक मानय् यानाः पूवंकल, थः परमप्रभु परमेश्‍वरयात माया यात, वय्‌कःया फुक्‍क लँपुइ वन अले वय्‌कःयात मत्‍वःतल धाःसा, 23 परमप्रभुं उपिं फुक्‍क जातितय्‌त छिमिगु न्‍ह्यःनं पितिनाछ्वयादी। अले छिपिं स्‍वयाः ततःधंगु व बल्‍लाःगु जातितय्‌त छिमिसं बुकी अले इमिगु देश अधिकार याइ। 24 छिमिसं पलाः तःक्‍व थाय् छिमिगु हे जुइ। दच्‍छिनय् नेगेवया मरुभूमिनिसें उत्तरय् लेबनान तक अले पुर्बय् यूफ्रेटिस खुसिनिसें पच्‍छिमय् भूमध्‍यसागर तक हे छिमिगु सिमाना जुइ।✡११:२४-२५ यहो १:३-५ 25 छिमिगु न्‍ह्यःने सुं नं दनाच्‍वने फइ मखु। परमप्रभु छिमि परमेश्‍वरं बचं बियादीगुकथं छिपिं वंगु दक्‍व थासय्‌यापिं मनूतय्‌गु नुगलय् छिमिगु ग्‍याःभय तयादी।

26 स्‍व, जिं थौं छिमिगु न्‍ह्यःने सुवाः व सराः तयाबी। 27 छिमिसं थौं जिं बियाच्‍वनागु आज्ञा न्‍यन धाःसा छिमित सुवाः दइ। 28 परमप्रभु छिमि परमेश्‍वरयागु आज्ञा मानय् मयासें छिमिसं मस्‍यूपिं मेपिं द्यःतय्‌गु ल्‍यू वनाः जिं थौं आज्ञा बियागु लँपुं फस्‍वयावन धाःसा छिमित सराः लाइ। 29 परमप्रभु छिमि परमेश्‍वरं छिपिं दुहां वनीगु देशय् छिमित हयादीबलय् छिमिसं सुवाः धाःसा गीरीज्‍जीम पर्वतं, सराः धाःसा एबाल पर्वतं न्‍यंकि।✡११:२९ व्‍य २७:११-१४; यहो ८:३३-३५ 30 थुपिं निगू पर्वत यर्दनया उखे, मू लँया पच्‍छिमपाखे, सूर्य बिनावनीगुपाखे, अराबाय् च्‍वनिपिं कनानीतय्‌गु देशय् गिलगालया न्‍ह्यःने मोरेया स्‍वसिमायागु लिक्‍क दु धकाः छिमिसं सी हे स्‍यू। 31 छिपिं परमप्रभु छिमि परमेश्‍वरं बियादीगु देश त्‍याका कायेत यर्दन खुसि छिनावने त्‍यंगु दु। छिपिं व थाय्‌यात त्‍याकाः अन च्‍वनाच्‍वनीबलय् 32 जिं थौं छिमिगु न्‍ह्यःने तयागु थुपिं फुक्‍क विधि व नियम बांलाक मानय् या।