एस्‍तरया सफू
म्‍हसीका
एस्‍तरया सफुलिइ जूगु घटना फारस देशयाम्‍ह जुजु अहासूरस चिकुलाबलय् च्‍वनीगु दरबारय् जूगु खः।
व हे दरबारयाम्‍ह रानी एस्‍तर थ्‍व सफूयाम्‍ह मू मनू खः। व मां बौ मदुम्‍ह छम्‍ह यहूदी खः। वया तःबाया काय् मोर्दकैनं वयात थःम्‍ह म्‍ह्याय् थें यानाः लहिनातःगु खः। व तसकं बांलाःम्‍ह व ब्‍याहा मजूनिम्‍ह मिसा खः। अथे जुयाः हे व रानी जुइदत।
वं ज्‍यान पानाः यहूदीतय्‌त इमि शत्रुतय्‌गु ल्‍हातं नाश जुइगुपाखें बचय् यात। व खँ थ्‍व सफुलिइ बांलाक च्‍वयातःगु दु।
पूरीम धाःगु नखः गथे यानाः शुरु जुल अले उकिया अर्थ छु खः धकाः नं थ्‍व सफुलिइ च्‍वयातःगु दु।
थ्‍व सफू सुनां च्‍वःगु धकाः सी मदु। अय्‌नं यहूदी जातिया बारे बांलाक स्‍यूम्‍ह मनुखं थ्‍व च्‍वःगु खः धकाः झीसं सीकाकाये फु।
थ्‍व सफू ४६५ ई.पू.पाखे अहासूरस सीधुंकाः च्‍वःगु खः। थ्‍व सफूया घटना एज्रा व नहेम्‍याहया सफूया घटना स्‍वयाः छगू पुस्‍ता न्‍ह्यः जूगु खः।
धलः पौ
एस्‍तर रानी जूगु १:१–२:२३
हामानं यहूदीतय्‌त नाश यायेगु ग्‍वसाः ग्‍वःगु ३:१–५:१४
हामानयात ज्‍यान सजाँय ब्‍यूगु ६:१–७:१०
यहूदीतय्‌सं थः शत्रुतय्‌त बुकूगु ८:१–१०:३
एस्‍तर
1
वश्‍ती रानीपाखें अहासूरस जुजुया अपमान
अहासूरस जुजुया पालय् जूगु घटनात थन बयान यानातःगु दु। उगु इलय् थ्‍व हे अहासूरस जुजुं भारतंनिसें कूश देश तक सछि व निइन्‍हय्‌गू प्रान्‍तय् शासन याइगु खः। उबलय् अहासूरस महाराजं थःगु राजधानी शूशनय् च्‍वंगु गद्दीं शासन याइगु खः। वं शासन याःगु स्‍वदँ दुबलय् थः फुक्‍क भारदारत व हाकिमतय्‌त सःताः तःधंगु भ्‍वय् न्‍याय्‌कल। राजकुमारपिं, फारसी व मादी सेनातय् मू नायःत व प्रान्‍त प्रान्‍तया बडा-हाकिमत नं लाय्‌कुलिइ थ्‍यंकः वल। सछि व चयन्‍हु तक जुजुं थःगु राज्‍ययागु झःझः धाःगु तःजिगु सम्‍पत्ति व वैभव क्‍यन।
अनं लिपा जुजुं थःगु राजधानी शूशन शहरय् च्‍वंपिं तःधंपिं, चिधंपिं, सकलें मनूतय्‌त सःताः भ्‍वय् नकल। थुकथं जुजुया लाय्‌कूया न्‍ह्यःने च्‍वंगु बगैँचाय् भ्‍वय् नयेगु ज्‍या न्‍हय्‌न्‍हु तक जुल। बगैँचाय् तुयुगु व वँचुगु सूती कापःया पर्दात यख्‍खानातःगु खः। उपिं पर्दात दुरु ल्‍वहंया थामय् दुगु वहःया चाःचाय् तुयुगु व प्‍याजी रंगयागु सूती कां चिनातःगु दु। ह्याउँगु ल्‍वहं, दुरु ल्‍वहं, मोती व मेमेगु मू वंगु ल्‍वहँतं छाय्‌पिया तःगु बँय् लुँ व वहःया सोफात तयातःगु दु।
थीथी कथंयागु लुँयागु ख्‍वल्‍चाय् जुजुं दरबारय् त्‍वनीगु दाखमद्य नुगः मस्‍यासें सकसितं त्‍वनेत इनाबिल। अन सुयातं करं त्‍वंकेगु नियम मदु। बरु फुक्‍क मनूतय्‌गु इच्‍छा थुइकी धकाः महाराजं थःगु धुकुतिं दाखमद्य त्‍वंकीपिं च्‍यःतय्‌त उजं बियादिल।
उगु हे इलय् रानी वश्‍तीं नं जुजु अहासूरसया लाय्‌कुलिइ मिसातय्‌त सःताः भ्‍वय् नकल।
10 न्‍हय्‌न्‍हु खुन्‍हु महाराज नं दाखमद्य त्‍वनाः लसतां हनाच्‍वन। अले वं थःगु सेवा याइपिं न्‍हय्‌म्‍ह नपुंसकत महूमान, बिज्‍था, हर्बोना, बिग्‍ता, अबगथा, जेथेर व कर्कासयात सःतल। 11 इमित रानी वश्‍तीयात श्रीपेच पुइकाः थःथाय् हजि धकाः जुजुं उजं बिल। रानी तसकं बांलाःम्‍ह हिसि दुम्‍ह जुयाच्‍वन। उकिं वं वयागु हिसि सकल मनूत व भारदारतय् न्‍ह्यःने क्‍यने मास्‍ति वय्‌कूगु खः। 12 इमिसं वनाः महाराजयागु उजं रानी वश्‍तीयात न्‍यंकल। तर रानी वये मानय् मजुल। उकिं जुजु तसकं तम्‍वल, तमं मि जुल।
13 नियम कानूनकथं छु याःसा जी धकाः सःस्‍यूपिं मनूतय्‌के महाराजं सल्‍लाह काल। 14 महाराजं अप्‍वः यानाः देशया कानून व नियम स्‍यूपिं फारस व मादीया न्‍हय्‌म्‍ह भारदारत कर्शेना, शेथार, अद्‍माथा, तर्शीश, मेरेस, मर्सेना व ममूकानपिन्‍के सल्‍लाह काइगु खः। इपिं महाराजलिसे सतीपिं खः, थुपिं न्‍हय्‌म्‍ह महाराजया न्‍ह्यःने वनेगु अधिकार दुपिं खः अले इमित देशय् तःधंगु मान व पद नं बियातःगु खः। 15 महाराजं इमित न्‍यन, “नपुंसकपाखें जिं बियागु उजं मानय् मयाइम्‍ह रानी वश्‍तीयात गज्‍याःगु सजाँय बी माली? कानूनं छु धाइ?”
16 अले ममूकानं महाराज व सकलें भारदारतय् न्‍ह्यःने थथे लिसः बिल, “रानी वश्‍तीं महाराजयागु जक मखु महाराज अहासूरसया फुक्‍क प्रान्‍तया भारदार व मनूतय्‌गु बेइज्‍जत याःगु दु। 17 रानीं थथे याःगु ज्‍या फुक्‍क मिसातय्‌सं न्‍यनी अले थुकिं यानाः इमिसं नं थः भाःतयात मानय् मयाइ। अले इमिसं थथे धाइ, ‘महाराज अहासूरसं रानी वश्‍तीयात थःथाय् हयेत उजं बियादिल तर रानी वये मानय् मजुल।’ 18 रानीं थुकथं व्‍यवहार याःगु खँ फारस व मादीया भारदारतय् कलाःपिन्‍सं न्‍यनेवं हे इमिसं नं थः भाःतपिन्‍त अथे हे व्‍यवहार याइ। अले थुकिं यानाः फुक्‍कभनं थः भाःतपिन्‍त हनाबना तयेगु त्‍वःताछ्वइ अले भाःतपिं थः कलाःपिंनापं तम्‍वइ।
19 “छसपोलया इच्‍छा दःसा वश्‍ती रानी थनिंनिसें गुबलें छसपोलया न्‍ह्यःने वये दइ मखु धकाः शाही उजं बियादिसँ। थ्‍व उजं फारस व मादीतय्‌गु कानूनय् गुबलें महिलिगुकथं च्‍वकादिसँ। अले वश्‍ती रानी स्‍वयाः बहःम्‍ह व बांलाःम्‍ह मिसायात रानी जुइ बियादिसँ। 20 थुकथं जुजुयागु शाही उजं देशय् सकसितं न्‍यंकीबलय् तःमि, चीमि सकलें मिसापिन्‍सं थःथः भाःतपिनिगु हनाबना तयेगु याइ।”
21 जुजु व सकलें भारदारपिन्‍सं थ्‍व सल्‍लाह यय्‌कल अले महाराजं ममूकानया सल्‍लाहकथं ज्‍या यात। 22 अनंलि सकल मिजंत थथःगु छेँय् मालिक जुइ अले वयागु उजं सकल छेँजःपिन्‍सं मानय् याये हे माः धकाः महाराजं फुक्‍क प्रान्‍तय् थीथी भाय् ल्‍हाइपिन्‍त इमिगु थथःगु भाषां व लिपिकथं थःगु उजं च्‍वयाछ्वत।