3
यहूदीतय्त नाश यायेगु हामानया ग्वसाः
1 छुं ई लिपा अहासूरस जुजुं अगागी हम्मदाताया काय् हामानयात वनापं ज्या याइपिं मेपिं भारदारत स्वयाः अप्वः पद थकयाः देय्या प्रधान मन्त्री यात। 2 सकल भारदारतय्सं जुजुं उजं ब्यूकथं हामानयात पुलिं चुयाः भागि याइगु खः। मोर्दकैनं धाःसा वयात पुलिं चुयाः भागि याइ मखुगु जुयाच्वन।
3 छन्हु लाय्कूया हाकिमतय्सं मोर्दकैयात न्यन, “छिसं छाय् जुजुया उजं मानय् मयानागु?” 4 इमिसं न्हियान्हिथं वयात थथे हे जक न्यनीगु। तर वं उमिगु खँयात वास्ता हे मयाः। थथे मोर्दकैनं मानय् मयाःगु खँ हामानं सह याइ कि मयाइ धकाः सीकेगु निंतिं इमिसं हामानयात थ्व खँ न्यंक वन। छाय्धाःसा “जि यहूदी खः” धकाः मोर्दकैनं इमित धाःगु खः।
5 मोर्दकैनं पुलिं चुयाः भागि मयाःगु खँ हामानं सिल अले व तसकं तम्वल। 6 हामानं मोर्दकै यहूदी खः धयागु खँ सिसेंलि वयात जक सजाँय मब्युस्य अहासूरसया फुक्क देशय् च्वंपिं यहूदीतय्त व मोर्दकैयात स्यायेगु उपाय माल।
7 अहासूरस जुजुया झिनिदँया न्हापांगु ला वा निसान लाय् हामानया न्ह्यःने न्हि व ला क्वःछीगु निंतिं इमिसं चिट्ठा तल। व चिट्ठायात “पूर” धकाः धाइगु खः। चिट्ठा झिंनिला दुखुन्हु वा अदार ला खुन्हु लात।
8 अले हामानं अहासूरस जुजुयात धाल, “छसपोलया राज्य दुने छगू जाति देय्या फुक्क प्रान्तय् मनूतय् दथुइ च्वनाच्वंगु दु। इपिं ब्यागल च्वना वयाच्वंगु दु। इमिगु रितिथिति मेगु फुक्क जातितय्गु स्वयाः पा। इमिसं छसपोलया नियम कानून नं मानय् मयाः। छिसं इमित सह यानाच्वनेगु बांलाः मजू। 9 यदि छसपोलया इच्छा दत धाःसा इमित नाश यानाछ्वयेगु निंतिं छगू उजं पौ च्वयाबियादिसँ। थ्व ज्या याइपिं छसपोलया हाकिमतय्गु निंतिं जिं जुजुया धुकुति जम्मा यायेत स्वगू लाख पिइद्वः किलोग्राम वहः बी।”
10 अले जुजुं राज्यया छाप दुगु अंगू थःगु पचिनं त्वयाः यहूदीतय् शत्रु हम्मदाताया काय् हामानयात बियादिल। 11 जुजुं हामानयात धाल, “थ्व वहः थके ति! उपिं मनूतय्त छन्त छु याये मास्ति व व हे या!”
12 अनंलि न्हापांगु लाया झिंस्वन्हु खुन्हु जुजुया सकल छ्यान्जेतय्त सःतल। अले हामानया उजंकथं जुजुया मन्त्रीत, फुक्क प्रान्तयापिं बडा-हाकिमत अले देशया थीथी जातियापिनिगु नायःतय्त अहासूरसया नामय् व जुजुयागु हे छाप तयाः इमिगु थःगु हे भाषां पौ च्वयाः छ्वत। 13 उजं पौ ज्वनाः हुलाकीत देशया फुक्क प्रान्तय् वन। उकी थ्व उजं दु, अदार धाइगु झिंनिलाया झिंस्वन्हु खुन्हु फुक्क यहूदीतय्त, ल्याय्म्हपिं, बुरापिं, मिसात, मस्तय्त छन्हु हे स्यानाछ्व। भचानं दयामाया मयासें इमित स्यानाछ्व अले इमिगु सम्पत्ति लाका का। 14 थ्व उजं फुक्क प्रान्तय् कानूनकथं पिकाः अले मनूत उखुन्हुया लागिं थम्हं यायेमाःगु ज्या यायेत तयार जू धकाः थ्व जुजुया उजं देशयापिं फुक्क मनूतय्थाय् छ्वल।
15 जुजुया उजं राजधानी शूशनय् च्वंपिं सकल प्रजातय्त न्यंकल। हुलाकीत याकनं वनाः थ्व समाचार प्रान्त प्रान्तय् थ्यंकल। शूशन शहरय् हलचल जुल। जुजु व हामान धाःसा त्वनेत फेतुल।