3
च्याना च्वंगु झाः
1 मोशा थः ससः बौ मिद्यानया पुजाहारी यित्रोया फैच्वलय् झ्वयाच्वंगु जुल। अले मरुभूमिइ फैच्वलय् झ्वझ्वं परमेश्वरया पर्वत होरेबय् थ्यंक हे यंकल। 2 अन छगू झाःया दथुइ मि जलय् परमप्रभुया दूत खनेदत। मोशां व झालय् मि च्याना च्वंसां झाः छुं मजूगु खन।*३:२-१० प्रे ७:३०-३४ 3 अथे जुयाः मोशां, “जि लिक्क हे वनाः थ्व अजूचायापुगु मि स्वये, व झाः छाय् छुं मजूगु” धकाः मतिइ तल।
4 च्यानाच्वंगु मि स्वयेत व लिक्क वःगु खनाः परमप्रभु परमेश्वरं वयात च्यानाच्वंगु झालं, “मोशा, अय् मोशा” धकाः सःतादिल।
अले मोशां धाल, “जि थन हे दु।”
5 परमेश्वरं धयादिल, “थुखे लिक्क वये मते। थःगु लाकां त्वः, छाय्धाःसा छ दनाच्वंगु थाय् पवित्रगु खः।” 6 वय्कलं हानं धयादिल, “जि छिमि पुर्खाया परमेश्वर खः, अब्राहाम, इसहाक व याकूबया परमेश्वर खः।” अले मोशां थःगु ख्वाः त्वपुल छाय्धाःसा व परमेश्वरयात स्वये ग्यात।
7 परमप्रभुं धयादिल, “जिं धात्थें हे मिश्रय् च्वंपिं जि थः मनूतय्त तसकं सास्ति जूगु खनागु दु। अले मिश्रीतय्सं यानाः इपिं ख्वःगु सः जिं न्यनागु दु। इमिगु दुःख जिं स्यू, च्यूताः नं कयाच्वनागु दु। 8 अथे जुयाः इमित मिश्रीतय्गु ल्हातं त्वःतकाः व देसं मेगु भिंगु व तःधंगु दुरु व कस्ति बाःवया च्वंगु कनानी, हित्ती, एमोरी, परिज्जी, हिव्वी व यबूसीतय्गु देसय् हयेत जि क्वहां वयागु दु। 9 आः इस्राएलीत तःसलं ख्वःगु सः जिथाय् थ्यंगु दु। मिश्रीतय्सं इमित गुलि सह याये मफय्क दुःख ब्यूगु दु व नं जिं खनागु दु। 10 अथे जुयाः छ हुँ, जिं थः मनू इस्राएलीतय्त मिश्रं पितहयेत छन्त फारोयाथाय् छ्वये।”
11 मोशां परमेश्वरयात धाल, “फारोयाथाय् वनाः इस्राएलीतय्त मिश्रं पितहये फुम्ह जि सु खः धकाः?”
12 परमेश्वरं धयादिल, “जि छनापं दइ। अले जिं हे छन्त छ्वयागु खः धयागु खँया चिं थ्व जुइ - छं थः मनूतय्त मिश्रं पितहये धुंकाः छिमिसं थ्व हे पर्वतय् परमेश्वरयात आराधना याइ।”
वय्कःया नां छु खः?
13 मोशां परमेश्वरयात धाल, “जिं इस्राएलीतय्थाय् वनाः इमित ‘छिमि पुर्खाया परमेश्वरं हे जितः छिमिगु निंतिं छ्वयाहःगु खः’ धकाः धायेबलय्, इमिसं ‘वय्कःया नां छु खः?’ धकाः न्यन धाःसा जिं इमित छु धायेगु?”*३:१३ प्रस ६:२-३
14 परमेश्वरं मोशायात धयादिल, “जि सु खः व हे खः व हे ख। वय्कलं हाकनं धयादिल, छं इस्राएलीतय्त थथे धा, ‘जि सु खः व हे खः धाःम्हय्सिनं जितः छिमिथाय् छ्वयाहःगु खः।’ ” *३:१४ प्रका १:४,८
15 परमेश्वरं हानं मोशायात धयादिल, “इस्राएलीतय्त धा, ‘परमप्रभु†३:१५ हिब्रू भाषां “परमप्रभु” या अर्थ “जि हे खः” छिमि पुर्खाया परमेश्वर अब्राहाम, इसहाक, याकूबया परमेश्वरं जितः छिमिथाय् छ्वयाहःगु खः।’
न्ह्याबलेंया निंतिं जिगु नां थ्व हे खः।
जिगु थ्व हे नामं जितः
छिमिसं पुस्तां पुस्तातक लुमंकेगु याइ।
16 “छ वनाः इस्राएलयापिं थकालित मुंकाः इमित थथे धा, ‘छिमि पुर्खा अब्राहाम, इसहाक, याकूबया परमप्रभु परमेश्वर जिथाय् न्ह्यःने खने दय्क झायाः थथे धयादीगु दु - जि छिमिथाय् वयागु दु , मिश्रय् छिमित गुलि दुःख ब्यूगु दु व नं जिं खनागु दु। 17 अले जिं छिमित मिश्रीतय्सं याःगु दुःखं लिगनाः दुरु व कस्ति बाः वइगु कनानी, हित्ती, एमोरी, परिज्जी, हिव्वी व यबूसीतय्गु देसय् यंकेत क्वःछिनागु दु।’
18 “अले इस्राएलया थकालितय्सं छंगु खँ न्यनी। अनं लिपा छं इपिंनापं मिश्रया जुजुयाथाय् वनाः थथे धा, ‘हिब्रूतय् परमप्रभु परमेश्वरं जिमित नापलानादीगु दु। उकिं जिमित जिमि परमप्रभु परमेश्वरयात बां बीत स्वन्हुया लँपुया मरुभूमिइ वने बियादिसँ धकाः इनाप याये।’ 19 मिश्रयाम्ह जुजुं गुबले तक करं काइमखु उबले तक छिमित वने बी मखु धकाः जिं स्यू। 20 अथे जुयाः जिं मिश्र देसपाखे थःगु ल्हाः ल्ह्वनाः इमित जिगु अजूचायापुगु ज्यां कय्के। अले तिनि वं छिमित वने बी।
21 “जिं मिश्रीतय्त छिमित हनाबना तइपिं यानाबी। अले छिपिं अनं पिहां वनीबलय् ल्हातय् छुं मदय्क वनीमखु।*३:२१-२२ प्रस १२:३५-३६ 22 फुक्क इस्राएली मिसातय्सं थःथः मिश्री जःलाखःला व इमिगु छेँय् च्वनिपिं मिसातय्के लुँ, वहः, तिसा व वसः फ्वनी, अले छिमिसं व थः काय् म्ह्याय्पिन्त पुंकी। थुकथं छिमिसं मिश्रीतय्गु धन ज्वनाः वइ।”