1 “छं गुँगू थनेत खयःसिँयागु छगू वेदी दय्‌कि।✡३०:१-५ प्रस ३७:२५-२८ 2 व ४५ से.मि. ताहाकःगु, ४५ से.मि. ब्‍या दुगु ९० से.मि. जाः दुगु व प्‍यकुंलाःगु जुइमाः। उकिया नेकूत व वेदी छगू हे सिँ कुचाया जुइमाः। 3 उकिया च्‍वय्, प्‍यखेरं व नेकूतय्‌त भिंगु लुं भुनाब्‍यु। अले उकिया प्‍यखेरं लुँयागु बाला दय्‌कि। 4 वेदी क्‍वबीगु न्‍वः तयेत बालाया क्‍वय् निखेंपाखें निचाः चाः दय्‌कि। 5 न्‍वः खयःसिँयागु दय्‌काः लुं भुनाब्‍यु। 6 जिं छन्‍त नापलायेगु थाय् बाचाया सनूया द्यःने दुगु प्रायश्‍चितया कृपा-आसन खः। उकिया न्‍ह्यःने यख्‍खाया च्‍वंगु पर्दा पिने थ्‍व वेदी तयाब्‍यु।

7 “हारूनं सुथय् पतिकं पाल्‍चा मिलय् याइबलय् वेदीइ नस्‍वाःगु गुँगू थनेमाः। 8 हारूनं सन्‍ध्‍याकाः इलय् पाल्‍चा च्‍याकीबलय् गुँगू नं थनेमाः। थ्‍व गुँगू छिमि पुस्‍तां पुस्‍ता तक परमप्रभुया न्‍ह्यःने थनेगु यायेमाः। 9 व वेदीइ छं मेगु कथंयागु गुँगू, होमबलि, अन्‍नबलि व त्‍वँसाबलि छाय् मते। 10 हारूनं दँय् छक्‍वः वेदीया न्‍यकुली प्रायश्‍चित यायेमाः। छिमि पुस्‍ता पुस्‍ता तक दँय् छक्‍वः शुद्ध जुइगु बलिया हिं उकी प्रायश्‍चित यायेमाः। थ्‍व हे वेदी परमप्रभुयात तसकं पवित्र खः।”

11 अनं लिपा परमप्रभुं मोशायात धयादिल, 12 “छं इस्राएलीत ल्‍याः खाइबलय् इमिके महामारी मवयेमा धकाः फुक्‍कसिनं थथः ल्‍याःखाःगु इलय् परमप्रभुयात छुत्‍काराया मू पुलेमाः। अले छं इमित ल्‍याःखाइबलय् महामारी वइ मखु। 13 मिजंम्‍ह मनूत ल्‍याःखाइबलय् इपिं छम्‍ह छम्‍हय्‌सिनं पवित्र पालया शेकेलकथं बच्‍छि शेकेल*३०:१३ बच्‍छि शेकेल थथे धयागु ६ ग्राम ति बीमाः। थ्‍व छगू शेकेल धयागु निइगू गेरा†३०:१३ निइगू गेरा थथे धयागु १२ ग्राम ति खः। थ्‍व बच्‍छि शेकेल परमप्रभुयात देछा खः। पवित्र थाय्‌यागु शेकेलकथं छगू शेकेल १२ ग्राम वहः खः।✡३०:१३ प्रस ३८:२५-२६; मत्ती १७:२४ 14 निइदँ व व स्‍वयाः थंपिं मनूत ल्‍याःखाइबलय् थथे परमप्रभुयात देछा बीमाः। 15 थःगु प्रायश्‍चितया लागिं परमप्रभुयात देछाः छाइबलय् तःमितय्‌सं बच्‍छि शेकेल स्‍वयाः अप्‍वः अले चीमितय्‌सं कम बी मते। 16 इस्राएलीतय्‌के प्रायश्‍चितया धिबा कयाः नापलायेगु पालया सेवाया निंतिं छ्यला ब्‍यु। अले व छिमिगु प्राणया प्रायश्‍चित यायेत परमप्रभुया न्‍ह्यःने इस्राएलतय्‌गु निंतिं लुमन्‍ति जुइमाः।”

17 अले परमप्रभुं मोशायात धयादिल, 18 “ल्‍हाः सिलेत कँय्‌यागु छगः बाता दय्‌कि। उकिया लिधंसा नं कँय्‌यागु हे जुइमाः। पवित्र पाल व होमबलिया वेदीया दथुइ तयाः उकी लः तयाब्‍यु।✡३०:१८ प्रस ३८:८ 19 उकी हारून व वया काय्‌पिन्‍सं थथःगु ल्‍हाःतुति सिलेमाः। 20-21 इपिं पवित्र पालय् दुहां वनीबलय् वा वेदीया लिक्‍क विशेष देछा छ्वय्‌केत वनीबलय् इमिसं थथःगु ल्‍हाःतुति सिलेमाः। मखुसा इपिं सी। थ्‍व हारून व वया लिपा वइपिं सन्‍तानयात तकं सदांया नियम जुल।”

22 हाकनं परमप्रभुं मोशायात धयादिल,✡३०:२२-३८ प्रस ३७:२९ 23 “छं भिंगु भिंगु नस्‍वाःगु मसला– न्‍यासः शेकेल‡३०:२३ न्‍यासः शेकेल थ्‍व खुगू किलोग्राम ति छ्वालुगु मूर्र, निसः व नेयगू शेकेल§३०:२३ निसः व नेय्‌गू शेकेल स्‍वंगू किलोग्राम ति दालचिनी, निसः व नेय्‌गू शेकेल नस्‍वाःगु सिँ व 24 न्‍यासः शेकेल तेजपात। (थुपिं पवित्र पाल लागायागु शेकेलकथं जुइमाः।) अले छगू हीन*३०:२४ छगू हीन प्‍यंगू लिटर जैतूनया चिकं कयाः 25 अभिषेक यायेगु पवित्र चिकं दय्‌कि। अत्तर दय्‌के सःम्‍हय्‌सिनं दय्‌कूगु थें दय्‌कि। व अभिषेक यायेगु पवित्र चिकं जुइ। 26 अले व चिकनं पवित्र पाल, बाचाया सनू, 27 छायेहःगु मरि तयातःगु तेबिल व उकी माःमाःगु ज्‍वलं, त्‍वाःदेवा व उकिया ज्‍याभः, गुँगू थनेगु वेदी, 28 होमबलिया वेदी व उकिया थलबल, अले बाता व उकिया लिधंसा नापं फुक्‍कयात अभिषेक या। 29 छं थुपिं फुक्‍कयात पवित्र या अले उपिं तच्‍वकं पवित्र जुइ। सुनानं थथे अभिषेक यानातःगु मालतालयात थी व पवित्र जुइ।

30 “हारून व वया काय्‌पिन्‍त अभिषेक यानाः पवित्र या। इमिसं पुजाहारी जुयाः जिगु सेवा यायेमाः। 31 इस्राएलीतय्‌त थथे धा, ‘थ्‍व छिमि पुस्‍तां पुस्‍ता तक जिगु निंतिं अभिषेकया पवित्र चिकं जुइमाः। 32 थ्‍व चिकं मनूयागु म्‍हय् प्‍वंके मते। थ्‍व पवित्र जूगुलिं ल्‍वाकछ्यानाः थज्‍याःगु मेगु छुं दय्‌के मते। छिमिसं थज्‍याःगु अभिषेकया चिकं पवित्र मानय् या। 33 सुं मनुखं थज्‍याःगु नस्‍वाःगु चिकं दय्‌कल धाःसा वा पुजाहारी मखुपिनिगु म्‍हय् तया ब्‍यूसां वयात थः मनूतय् दथुं पितिना छ्वयेमाः।’ ”

34 हाकनं परमप्रभुं मोशायात धयादिल, “नस्‍वाःगु मसला- थाकुराः, हिं व मेगु छता गुँगू थनेगु मसला भिंगु गुँगू नापं उति उतिं कयाः 35 उकियागु नस्‍वाःगु ल्‍वाकछ्यानातःगु गुँगूया अत्तर दय्‌के सःम्‍हय्‌सिनं थें हे दय्‌कि। उकी चि नं तयेमाः। थ्‍व फुक्‍क भिंगु व पवित्र जुइमाः। 36 उकियागु छुं ब्‍वःयात कयाः निनाः चुं दय्‌कि। महा पवित्र थासय् जि छनापं नापलाय्‌गु थासय्‌ बाचाया सनूया न्‍ह्यःने थ्‍व चुं ति। थज्‍याःगु गुँगू छिमिसं पवित्र मानय् या। 37 थुकथं ल्‍वाकछ्यानातःगु गुँगू छिमिसं थःगु हे निंतिं गुबलें दय्‌के मते। थुकियात छं परमप्रभुया न्‍ह्यःने पवित्र भाः प्‍यु। 38 सुनानं नस्‍वाःया लागि व थें च्‍वंक छुं दय्‌कल धाःसा वयात थः मनूतय् दथुं पितिना छ्वयेमाः।”