1 जिमित ज्‍वनाः बेबिलोनय् यंकूगु निइन्‍यागूगु दँया*४०:१ २८ अप्रिल ५७३ बी.सी. न्‍हापांगु लाया झिन्‍हु दुखुन्‍हु अर्थात बेबिलोनयापिन्‍सं यरूशलेम त्‍याकाकाःगु झिंप्‍यगूगु दँ लिपा परमप्रभुया शक्ति जिके वल, अले वय्‌कलं जितः अन यंकादिल। 2 दर्शनय् परमेश्‍वरं जितः इस्राएल देशय् यंकादिल, अले अन छगू तसकं तःजाःगु पर्वतय् तयादिल। उकिया दच्‍छिनपाखे जिं शहरय् थें यक्‍व छेँ खना।✡४०:२ प्रका २१:१० 3 वय्‌कलं जितः अन यंकादिल, जिं छम्‍ह मनूयात अन खना, वयागु ख्‍वाःपाः कँय्‌यागु थें च्‍वं। वयागु ल्‍हातय् छगू सुतिया खिपः व नापे यायेगु कथि दु, व मू ध्‍वाखाय् दनाच्‍वंगु जिं खना।✡४०:३ प्रका ११:१; २१:१५ 4 वं जितः धाल, “अय् सीमानिम्‍ह मनू, छंगु मिखां स्‍व, अले थःगु न्‍हाय्‌पनं न्‍यँ, जिं छन्‍त छु छु क्‍यने उकी ध्‍यान ब्‍यु! छाय्‌धाःसा थुकियागु निंतिं हे जिं छन्‍त थन हयागु खः। छं थन छु छु खना, व फुक्‍क इस्राएलया घरानायात धयाब्‍यु!”

5 देगःया पिने छचाःखेरं पःखाः दुगु जिं खना। व मनूया ल्‍हातय् नापे यायेगु कथि दु। व नापे यायेगु कथि ३.२ मिटर ताहाकः। वं पःखाः नापे यात, पःखाः ३.२ मिटर तज्‍जाः व उकिया ब्‍या ३.२ मिटर दु।✡४०:५–४२:२० २ इति ३:१-९

6 अनंलि व पुर्बपाखे स्‍वःगु मू ध्‍वाखापाखे वन। उकियागु त्‍वाथः गयाः वं लुखायागु लुखाखलु नापे यात। वं नापे याःगु लुखाखलुया ब्‍या ३.२ मिटर दु। 7 पिवाःत च्‍वनीगु क्‍वथायागु हाकः ३.२ मिटर व ब्‍या ३.२ मिटर दु। क्‍वथातय्‌गु दथुइ दथुइ दुगु पःखाःया ब्‍या २.७ मिटर दु। देगःपाखे स्‍वःगु दलानया लिक्‍क दुगु लुखाखलु ३.२ मिटर दु।

8 वं मू ध्‍वाखाया दलान नापे यात। 9 व ४.२ मिटर तब्‍या। उकिया लुखाखसित १ मिटर तःफि। लुखाया दलान धाःसा देगःपाखे स्‍वःगु दु।

10 पुर्बपाखेयागु मू ध्‍वाखा दुने निखें स्‍वकू स्‍वकू पिवाःत च्‍वनीगु क्‍वथात दु। उपिं स्‍वकू क्‍वथात छगू हे नापयागु खः। क्‍वथातय्‌गु दथुइयागु पःखाःत छगू हे नापयागु खः। 11 अले वं मू ध्‍वाखाया ब्‍या नापे यात। व ५.३ मिटर तब्‍या, व ६.९ मिटर ताहाकः। 12 फुक्‍क क्‍वथाय् न्‍ह्यःनेपाखे ५३ सेन्‍टिमिटर तज्‍जाःगु चिचिजाःगु पःखाःत दु। फुक्‍क क्‍वथा ३.२ मिटर प्‍यकूं लाः।

13 अनंलि वं मू ध्‍वाखाछेँया पिनेया ब्‍या नापे यात। छखे पिवाः कोथाया ल्‍यूनेया पःखालंनिसें मेखे पिवाः कोथाया ल्‍यूनेया पःखाः तक नापय् यात। थ्‍व १३.५ मिटर दु। 14 वं मू ध्‍वाखाया थांत नापय् यात, उपिं ३२ मिटर तःजाः। लुखाछेँ पिने चुकय् तक न्‍यनावंगु दु, गुकिं यानाः स्‍वखेपाखे चुक दु। 15 मू ध्‍वखाछेँया पिनेया दुहां वनेगु थासंनिसें दलानया सिथय् तक २७ मिटर दु। 16 मू ध्‍वाखाया दुनेया लुखाछेँया फुक्‍क अंगलय् ग्‍वाखंत दु। पिवाःत च्‍वनीगु कोथाया अंगलय्, पिवाःत च्‍वनीगु कोथातय्‌गु दथुइच्‍वंगु अंगलय् व दलानया अंगलय् ग्‍वाखंत दु, पिवाः च्‍वनीगु कोथातय्‌गु दथुइया अंगलय् ताय्‌गः सिमाया किपात कियातःगु दु।

17 अले वं जितः पिनेयागु चुकय् हल। जिं अन चुकया प्‍यखेरं छुं क्‍वथात व ल्‍वहं लायातःगु छगू बँ खना। थ्‍व ल्‍वहं लायातःगु फलय् स्‍विगू क्‍वथा दु। 18 ल्‍वहं लायातःगु बँ लुखा तक हे थ्‍यंगु दु। बँया ब्‍या व लुखाया हाकः उलि उलि हे दु। थ्‍व दकलय् क्‍वय्‌यागु फः खः। 19 अले वं क्‍वय्‌यागु लुखाया दुनंनिसें चुकयागु पिने तक नापे यात। व पुर्ब व उत्तरपाखे नं ५३ मिटर दु।

20 उत्तरपाखे स्‍वःगु पिनेयागु चुकया मू ध्‍वाखाया हाकः व ब्‍या वं नापय् यात। 21 ध्‍वाखाछेँया दुने स्‍वकू पिवाः कोथाया निखेंपाखेंया अले पिवाः कोथाया दथुइयागु अंगःया व दलानया नाप धाःसा पुर्बया मू लुखाया नाप ति हे दु। उकिया हाकः २७ मिटर व ब्‍या १३.५ मिटर दु। 22 उकिया ग्‍वाखंत व उकिया दलान अले उकिया ताय्‌गः सिमाया कियातःगु किपाया नाप नं पुर्बपाखे स्‍वःगु मू ध्‍वाखाया नाप ति हे दु। अन वनेत न्‍हय्‌गू त्‍वाथः दु। उकिया दलान धाःसा चुलिंचू दु। 23 पुर्बया मू ध्‍वाखाय् दुगु थें उत्तरया मू ध्‍वाखाया न्‍ह्यःने दुनेया चुकय् वनेगु छगू ध्‍वाखा दु। वं छगू ध्‍वाखांनिसें मेगु ध्‍वाखा तक नापे यात। व ५३ मिटर दु।

24 अले वं जितः दच्‍छिनपाखे यंकल। जिं दच्‍छिनपाखे स्‍वःगु छगू ध्‍वाखा खना। वं उकिया लुखाखसित व उकिया दलान नापे यात। उपिं नं मेगु थें छगू हे नापयागु खः। 25 लुखाछेँ व उकिया दलानया प्‍यखेरं ग्‍वाखंत दु। उपिं मेमेगु थें हे च्‍वं। उकिया हाकः २७ मिटर व ब्‍या नं १३.५ मिटर दु। 26 अन वनेत न्‍हय्‌गू त्‍वाथः दु। उकिया दलान धाःसा उकिया चुलिंचू दु। पिवाः कोथातय्‌गु दथुइया अंगःया निखेंपाखे ताय्‌गःमाया किपात दय्‌कातःगु दु। 27 दुनेयागु चुकय् नं दच्‍छिनपाखे स्‍वःगु छगू मू ध्‍वाखा दु। वं थ्‍व ध्‍वाखांनिसें दच्‍छिन पाखेयागु पिनेया ध्‍वाखा तक नापे यात। व ५३ मिटर दु।

28 अले वं जितः दच्‍छिनयागु मू ध्‍वाखां दुनेया चुकय् हल। वं दच्‍छिनया मू ध्‍वाखा नापे यात, उकिया नाप नं मेमेगु मू ध्‍वाखाया नाप थें च्‍वं। 29 उकिया क्‍वथात, पःखाःत व दलान मेमेगु थें छगू हे नापयागु खः। लुखाछेँ व उकिया दलानया प्‍यखेरं ग्‍वाखंत दु। उकिया हाकः २७ मिटर व ब्‍या १३.५ मिटर दु। 30 (दुनेया चुकया प्‍यखेरं लुखातय्‌गु दलानत धाःसा १३.५ मिटर तब्‍या अले २.७ मिटर तज्‍जाः।) 31 उकिया दलान पिनेया चुकपाखे स्‍वःगु दु। पिवाः कोथातय्‌गु दथुइया अंगलय् ताय्‌गः सिमाया किपा कियातःगु दु। अन वनेत च्‍यागू त्‍वाथः दु।

32 अले वं जितः पुर्बपाखेया दुनेया चुकय् हल, अले उकिया लुखा नापे यात। उपिं मेगु थें छगू हे नापयागु खः। 33 उकिया क्‍वथात, पःखाःत व दलान नं मेमेगु थें छगू हे नापयागु खः। लुखाछेँ व उकिया दलानया प्‍यखेरं ग्‍वाखंत दु। व २७ मिटर ताहाकः अले १३.५ मिटर तब्‍या। 34 उकिया दलान पिनेया चुकपाखे स्‍वःगु दु। पिवाः कोथातय्‌गु दथुइया अंगःया निखेंपाखे ताय्‌गः सिमायागु किपात दय्‌कातःगु दु। अन वनेत च्‍यागू त्‍वाथः दु।

35 अले वं जितः उत्तरया ध्‍वाखाय् हल, अले व नापे यात। व नं मेमेगु थें छगू हे नापयागु खः। 36 उकिया क्‍वथात, पःखाःत व दलान उत्‍थें च्‍वं। उकिया प्‍यखेरं ग्‍वाखंत दु। व २७ मिटर ताहाकः अले १३.५ मिटर तब्‍या। 37 उकिया दलान पिनेयागु चुकपाखे स्‍वःगु दु। पिवाः कोथाया दथुइच्‍वंगु अंगलय् ताय्‌गः सिमातय्‌गु किपात छखे छखेपाखे दय्‌कातःगु दु। अन वनेत च्‍यागू त्‍वाथः दु।

38 फुक्‍क मू ध्‍वखाःया दलानया न्‍ह्यःने लुखा दुगु क्‍वथा दु। अन इमिसं होमबलि सिलीगु। 39 होमबलि, शुद्ध जुइगु बलि व दोषबलि स्‍यायेत दुहां वनेगु लुखाया दलानया निखेंपाखे निगः निगः टेबिल दु।✡४०:३९ लेवी १:१-१७; ४:१–५:१३; ५:१४–६:७ 40 उत्तरयागु मू ध्‍वाखाया दलानया पिने, दलानय् थाहां वनेगु त्‍वाथःया लिक्‍क निगू टेबिल दु। अले त्‍वाथःया मेखेपाखे निगू टेबिल दु। 41 थुकथं दुहां वनेगु लुखाया छखेपाखे प्‍यंगू टेबिल व मेखेपाखे नं प्‍यंगू, अन मुक्‍कं च्‍यागू टेबिल दु। 42 होमबलिया निंतिं चानातःगु ल्‍वहंयागु प्‍यंगू टेबिल दु। छगू छगू टेबिल ८० सेन्‍टिमिटर ताहाकः, ८० सेन्‍टिमिटर तब्‍या व ५३ सेन्‍टिमिटर तज्‍जाः। उकिया च्‍वय् हे होमबलि व मेमेगु बलिदानया निंतिं छ्यलीगु थलबल तइगु। 43 अले निगू च्‍वका दुगु हुकत, छगू छगू हुक ८ सेन्‍टिमिटर ताहाकः, उपिं अंगःया प्‍यखेरं यख्‍खानातःगु दु। तेबिलत धाःसा छायेहःगु ला तयेत खः।

44 दुनेया मू ध्‍वाखाया पिनेपाखे, दुनेया चुकया दुने निकू क्‍वथा दु। छकू क्‍वथा उत्तरया मू ध्‍वाखाया लिक्‍क दच्‍छिनपाखे स्‍वःगु, व मेगु धाःसा दच्‍छिनया मू ध्‍वाखाया लिक्‍क उत्तरपाखे स्‍वःगु दु। 45 वं जितः धाल, “थ्‍व दच्‍छिनपाखे स्‍वःगु क्‍वथा देगःया फुक्‍क ज्‍याया जिम्‍मा दुपिं पुजाहारीतय्‌गु निंतिं खः। 46 अले उत्तरपाखे स्‍वःगु क्‍वथा धाःसा वेदीइ व देगलय् सेवा याइपिं पुजाहारीतय्‌गु निंतिं खः। थुपिं सादोकया काय्‌पिं खः, लेवीतय् सन्‍तान मध्‍ये उपिं जक परमप्रभुया न्‍ह्यःने सेवा यायेत वय्‌कःया लिक्‍क वयेफु।”

47 अले वं चुक नापे यात। व पेकूंलागु खः। व ५३ मिटर ताहाकः व ५३ मिटर तब्‍या। वेदी धाःसा देगःया न्‍ह्यःने दु। 48 वं जितः देगःया दलानय् हल, दलानया निखेंपाखेया लुखाखसित वं नापे यात। उपिं २.७ मिटर ब्‍या दु। मू ध्‍वाखा ७.४ मिटर तब्‍या अले उकी निखेंपाखे अंगःनापं स्‍वाकातःगु लुखाखसि १.६-१.६ मिटर तब्‍या। 49 दलान ११ मिटर ताहाकः, अले व ६.४ मिटर तब्‍या। उकी थाहां वनेत झिगू त्‍वाथः दु अले निखेंपाखेया थांया न्‍ह्यःने लुखाखसित दु।