गलातियाय् च्वंगु मण्डलीयात पावलं च्वःगु पौ
म्हसीका
भिंगु खँ न्यनावँसेंलि यहूदीमखुपिन्सं नं येशू ख्रीष्टयात विश्वास याना हल। थुबलय् धात्थेंम्ह ख्रीष्टियन जुइत मोशायागु व्यवस्था मानय् यायेमाः कि म्वाः धयागु खँ पिहां वल। पावलं थ्व पतिइ अथे मखु, ख्रीष्टयात विश्वास यानाः हे जक परमेश्वरया न्ह्यःने ठीक ठहरय् जुइ धकाः धयातःगु दु। तर रोमी साम्राज्यया एशियाय् लाःगु गलातिया धाःगु प्रान्तय् च्वंगु मण्डलीइ पिनें वःपिं मनूतय्सं पावलयागु विरोध यानाः मोशायागु व्यवस्था मानय् याःसा जक परमेश्वरया न्ह्यःने ठीक ठहरय् जुइ फइ धकाः धयाजुल।
पावलं थ्व पतिइ थुकथं फताहा प्रेरिततय्गु खं लँ द्वंका च्वंपिं विश्वासीतय्त विश्वासय् लितहयेमाःगु खँ नं न्ह्यथनातःगु दु। नापं थः धात्थेंम्ह प्रेरित खः धयागु दसु नं बियातःगु दु। धात्थेंम्ह प्रेरित परमेश्वर पाखेंयाम्ह जुइ, सुं मनूयापाखें वःम्ह मखु। पावलं थःत यहूदीमखुपिनिगु निंतिं छ्वयाहःगु खः धकाः अप्वः बःबियातःगु दु। अनंलि वं विश्वासं यानाः जक परमेश्वरया न्ह्यःने ठीक ठहरय् जुइ फइ धकाः नं बःबियातःगु दु। दकलय् लिपायागु अध्यायलय् पावलं विश्वासीतय्सं ख्रीष्टयात क्वात्तुक विश्वास यात धाःसा इमिगु चालचलनय् नं ख्रीष्टयागु माया खने दइ धकाः क्यनातःगु दु।
धलः पौ
न्ह्यखँ १:१-१०
पावल अधिकार दुम्ह प्रेरित खः १:११–२:२१
परमेश्वरयागु दया मायायागु भिंगु खँ ३:१–४:३१
छुत्कारायागु खँ व यायेमाःगु ज्या ५:१–६:१०
क्वचाय्कूगु ६:११-१८
गलाती
1
पावलपाखें ज्वजलपा
1 मनूतय्पाखें मखु, येशू ख्रीष्ट व वय्कःयात हानं म्वाकादीम्ह परमेश्वरं प्रेरित यानाः छ्वयाहःम्ह जि पावल व 2 जिलिसें थन दुपिं दाजुकिजापिनिपाखें गलातियाय् च्वंगु मण्डलीयात ज्वजलपा!
3 झी परमेश्वर बाः व प्रभु येशू ख्रीष्टया दया माया व शान्ति छिमित दयेमा। 4 थ्व मभिंगु इलं बचय् यायेत झीगु पापयागु निंतिं झी परमेश्वर बाःनं धयादी थें येशू थः हे सिनादिल। 5 परमेश्वर सदां तःधना च्वनेमा! आमेन।
भिंगु खँ छता हे जक दु
6 छिपिं खनाः जि अजू चायाच्वनागु दु। गुलि याकनं छिपिं छिमित येशू ख्रीष्टपाखें दया माया यानाः सःतादीम्ह परमेश्वरपाखें फहिलावन। अले मेगु हे भिंगु खँयात विश्वास याः जुयाच्वन। 7 धात्थें धायेमाल धाःसा ख्रीष्टयागु भिंगु खँ बाहेक मेगु भिंगु खँ मदु। गुलिं गुलिं मनूत छिमिथाय् वयाः छिमित स्यंकेत ख्रीष्टयागु भिंगु खँयात मेकथं हिलेत कुतः यानाच्वंगुलिं जिं थथे धायेमाःगु खः।
8 अय्जूगुलिं जिपिं हे थजुइमा, स्वर्गं वःम्ह स्वर्गदूत हे थजुइमा, छिमित जिमिसं न्हापा कना थकागु भिंगु खँयात हीकाः सुनानं न्यंकल धाःसा वयात सराः लायेमा। 9 न्हापा नं जिमिसं थ्व खँ धायेधुन। आः हानं छकः थ्व हे खँ धाये – छिमिसं विश्वास याये धुंकूगु भिंगु खँयात हीकाः न्यंकीपिन्त सराः लायेमा।
10 जिं थथे धयाच्वनागु छु मनूतय्त लय्ताय्केत खः ला? मखु! जिं ला परमेश्वरयात हे लय्ताय्केत थथे यानाच्वनागु खः। जिं मनूतय्त लय्ताय्केत यानागु जूसा जि येशू ख्रीष्टया सेवा याइम्ह दास हे जुइ फइ मखु।
पावल गथे यानाः प्रेरित जुल
11 यःपिं दाजुकिजापिं, जिं छिमित छता खँ धाये – जिं न्यंकागु भिंगु खँ मनूतय्गु बुद्धिं पिहां वःगु मखु। 12 सुं मनुखं थ्व खँ जितः ना धकाः ब्यूगु नं मखु, अले सुनानं थ्व खँ जितः स्यंगु नं मखु। थ्व भिंगु खँ जितः बियादीम्ह ला येशू ख्रीष्ट खः।
13 न्हापा यहूदी धर्मकथं जुया च्वनाबलय् जि गज्याःम्ह खः धकाः ला छिमिसं बांलाक हे स्यू। परमेश्वरया मण्डलीयापिन्त जिं गुलि दुःखकष्ट व सास्ती बिया, अले थुमित नाश हे यानाछ्वयेत कुतः यानाम्ह नं जि हे खः।✡१:१३ प्रे ८:३; २२:४-५; २६:९-११ 14 जि ज्वलिंज्वःपिं मध्ये दकलय् अप्वः यहूदी धर्म मानय् याना जुयाम्ह नं जि हे खः। झी तापाःबाज्यापिनिगु थितिकुति दकलय् अप्वः मानय् याना जुयाम्ह नं जि हे खः।✡१:१४ प्रे २२:३
15 अय्नं दया यानादीम्ह परमेश्वरं जि बु हे मबूनिबलय् निसें जितः ल्ययादिल। अले थथे वय्कःयागु ज्या याके छ्वयाहयादिल। 16 यहूदीमखुपिन्त भिंगु खँ न्यंके छ्वयेत जितः परमेश्वरं हे वय्कःया काय्यागु खँ फुक्क सीके बियादिल।✡१:१५-१६ प्रे ९:३-६; २२:६-१०; २६:१३-१८
उबलय् जिं सुयाकें छुं नं न्यनेकने मयाना। 17 जि स्वयाः न्हापायापिं प्रेरिततय्के सल्लाह कायेत जि यरूशलेमय् नं मवना। बरु जि उघ्रिमय् अरब देशय् वना। अले अनं दमस्कसय् तुं लिहां वया।
18 स्वदँ लिपातिनि केफास धाःम्ह पत्रुसयात नापलायेत जि यरूशलेमय् वना, व नाप जि बाःछि तक च्वना।✡१:१८ प्रे ९:२६-३० 19 अन जिं प्रभुया किजा याकूब बाहेक मेपिं सुं प्रेरिततय्त नाप मलाना। 20 जिं धयाच्वनागु थ्व खँ धात्थें खः। परमेश्वरया न्ह्यःने जिं मखुगु खँ ल्हाये मखु।
21 लिपा यरूशलेमं जि सिरियाय् व किलिकियाय् वना। 22 अबलय् तक यहूदियाय् च्वंगु मण्डलीयापिं मनूतय्सं जिगु ख्वाः खंगु हे मदुनि। 23 इमिसं थथे धाःगु जक न्यनातःगु खः – “न्हापा झीत दुःखकष्ट बिया जूम्ह, अले झीत नाश यायेत स्वःम्ह मनुखं हे आः भिंगु खँ न्यंका जुयाच्वंगु दु।” 24 जिगु जीवनय् थथे हिउपा वःगुलिं इमिसं परमेश्वरयात प्रशंसा यात।