5
ख्रीष्ट येशूं छुत्कारा बियादी
1 छुत्काराया निंतिं ख्रीष्ट येशूं झीत छुत्कारा बियादी धुंकल। उकिं आः छिपिं साहस कयाः दँ। हाकनं दासत्वय् मलायेमा।
2 न्यँ, जि पावलं धया च्वना -- छिमिसं म्हय् चिं तया जुल धाःसा छिमिसं ख्रीष्ट येशूयात विश्वास याःगु छुं हे ज्यालगय् मजुल। 3 म्हय् चिं तये माः धाइम्ह मनूयात जिं हानं धाये -- म्हय् चिं तःम्ह मनुखं व्यवस्थायागु फुक्क खँ मानय् मयासें मगाः। 4 व्यवस्था मानय् यानाः परमेश्वरया न्ह्यःने धर्मी ठहरय् जुइत स्वइपिं मनूत ख्रीष्ट येशू नाप मिलय् जुइ फइ मखु। अले थज्याःपिं मनूत परमेश्वरयागु दया मायां तापाना च्वनी।
5 जिमिगु आशा ला परमेश्वरं हे जिमित धर्मी ठहरय् यानादी धयागु खः। अले परमेश्वरयागु आत्मायागु शक्तिं हे जिमित विश्वास याये फय्कादी धकाः जिपिं पियाच्वनागु खः। 6 झीपिं ख्रीष्ट नाप मिलय् जुइ धुन धाःसा म्हय् चिं तःसां मतःसां छुं नं पाइ मखु। झीत माःगु ला विश्वास खः। थ्व हे विश्वासं यानाः झीसं माया याये फइ।
7 छिपिं ला बांलाक ब्वाँय् वनाच्वंगु खः। छिमित सुनां सत्य खँ मानय् याये मते धकाः पन? 8 छिमित सःतादीम्ह परमेश्वरं थ्व ज्या याके बियादीगु मखु। 9 “न्हायातःगु छ्वचुंलय् सोडा भचा जक ल्वाकछ्याःसां फ्वंगाना वइ।”*५:९ १ कोर ५:६ 10 प्रभु नाप मिलय् जुया च्वंगुलिं छिपिं अथे मेगु लँय् जुइ मखु धकाः जिं पत्याः यानाच्वनागु दु। अथेसां छिमित स्यंकेत स्वःपिं, न्ह्याम्ह हे जूसां, इमित परमेश्वरं सजाँय बियादी।
11 यःपिं दाजुकिजापिं, जिं अज्ज नं म्हय् चिं तये माः धकाः न्यंका जूगु जूसा जिं अज्जं छाय् दुःखकष्ट फया च्वनेगु? थ्व खँ खः धयागु जूसा क्रूसय् सिनादीम्ह ख्रीष्टयागु भिंगु खँ न्यंका जूसां जितः सुनानं दुःखकष्ट ब्यू वइ मखु। 12 छिमित स्यंकेत स्वःपिं मनूतय्सं म्हय् चिं तयेगु जक मखु म्ह भज्यंक हे स्यंकूसां ज्यू नि।
13 यःपिं दाजुकिजापिं, परमेश्वरं छिमित छुत्कारा बीत सःतादीगु खः। थः यःथें याना जुइ मते, बरु माया यानाः मेपिन्त ग्वाहालि बीगु या। 14 फुक्क व्यवस्था थ्व हे छगू आज्ञाया दुने लाः -- “थः जःलाखःलायात थःत थें माया या।”*५:१४ लेवी १९:१८ 15 अय्नं गुँपशुत थें थः थः हे ल्वाना जूसा छिपिं फुक्कं स्यना वनी धयागु खँय् छिमिसं होश याना च्वँ।
पवित्र आत्मां जाःगु जीवन
16 पवित्र आत्मां धाःथें याना जूसा छिमिसं थः यःथें याना जुइगु त्वःते फइ। 17 शरीरं ला पवित्र आत्माया विरोधय् व पवित्र आत्मां शरीरया विरोधय् इच्छा याइ। थुपिं निम्ह शत्रु थें खः, उकिं झीसं झीत यःथें याये फइ मखु।*५:१७ रोम ७:१५-२३ 18 आत्मां धाःथें याना जूसा छिमिसं व्यवस्थाय् च्वया तःथें याये माली मखु।
19 मनूतय्गु बानि छु खः बांलाक हे सी दु। मनूतय्गु बानि थ्व हे खः -- व्यभिचार यायेगु, मभिंगु मतिइ तयेगु, लाः लाःथें याना जुइगु, 20 मूर्ति पुजा यायेगु, झाँक्री ज्या यायेगु, ल्वाना जुइगु, मेपिन्त मभिंकेगु, नुगः मुइकेगु, तं म्वयेगु, थःगु जक भिं स्वयेगु, मेपिन्त ल्वाका जुइगु, अले पुचः पुचः मुनाः बाया जुइगु, 21 डाह यायेगु, अय्लाः थ्वँ त्वना जुइगु, मोजमज्जा याना जुइगु, थथे हे मेमेगु ज्या याना जुइगु। थज्याःपिं परमेश्वरयागु राज्यय् दुहां वने फइ मखु धकाः जिं न्हापा नं धाये धुन, आः नं थ्व हे खँ जिं छिमित धयाच्वना।
22 पवित्र आत्माया फल धाःसा माया यायेगु, लय् तायेगु, शान्ति याकेगु, सह यायेगु, दया यायेगु, ग्वाहालि यायेगु, विश्वास याये बहः जुइगु, 23 नम्र जुइगु, स्वजा जुइगु, मनयात चिना तयेगु खः। थथे याना जुइपिन्त दोष बीगु छुं हे व्यवस्था मदु।
24 येशू ख्रीष्टयापिं मनूतय्सं ला थः यःथें याना जुइगु व मभिंगु ज्या फुक्कं क्रूसय् यख्खाये धुंकल। 25 आत्मां झीत म्वाकातःगु खःसा झीपिं आत्मां धाःथें च्वने माः। 26 झीसं थःथवय् घमण्ड याना जुइगु, तं म्वया जुइगु व नुगः मुइका जुइगु याये मज्यू।