उत्पत्ति
न्ह्यखँ
उत्पत्ति १:१ या ‘दक्वसिबय् न्हापां’ खँपु हिब्रू भाय्या ‘बेरेशीत’ खँग्वलं भाय् हीकातःगु खः। थ्वयात ‘उत्पत्ति’ धकाः नां तःगु दु, अथे धयागु ‘दक्व खँया शुरु’ खः।
थ्व सफुलिइ सृष्टियागु खँ जक मखु, व स्वयाः नं अजूचायापुगु खँ अब्राहामपाखें इस्राएल जातिया उत्पत्ति जूगु व व हे इस्राएली जातिया पाखें परमेश्वरं विश्व न्यंक मुक्तिया ग्वसाः ग्वःगु खँ न्ह्यथनातःगु दु।
थ्व सफूयात ‘बाचाया सफू’ धकाः नं धायेगु याः। विशेष यानाः थुकी परमेश्वर व प्रकृतियागु स्वापू, परमेश्वर व मनूया दथुइ बाचा व मनू-मनूया दथुइया स्वापू थज्याःगु खँ च्वया तःगु दु।
धलः पौ
सृष्टियागु खँ १:१ - २:२५
न्हापांगु पाप व थुकिया सजाँय् ३:१ - ४:१६
आदमंनिसें नोआतक ४:१७ - ५:३२
नोआ व खुसिबाः वःगु ६:१ - ९:२८
नोआया सन्तान व बाबेलया धरहरा १०:१ - ११:३२
परमप्रभं अब्रामयात ल्ययादीगु १२: १-२०
अब्राम व लोत बायावंगु १३:१ - १४:२४
परमप्रभुं अब्रामलिसे बाचा चिनादीगु १५:१-२१
अब्राम, हागार व इश्माएल १६:१-१६
अब्रामया नां अब्राहाम तयादीगु १७:१-८
अब्राहामयात काय् बीगु बाचा चिनादीगु १७:९ - १८:१५
अब्राहाम, लोत, सदोम व गमोरा १८:१६ - १९:३८
अब्राहाम, सारा व इसहाक २०:१ - २३:२०
इसहाकयात भमचा माःवंगु २४:१-६७
अब्राहाम सीगु २५:१-१८
इसहाक व वया परिवार २५:१९ - २८:९
याकूब व वया परिवार २८:१० - ३५:२९
एसाव व वया परिवार ३६:१-४३
योसेफयात वया दाजुपिन्सं दास यानाः मियाछ्वःगु ३७:१-३६
यहूदा व तामार ३८:१-३०
योसेफ मिश्र देशय् ३९:१ - ४१:५७
योसेफ व वया दाजुकिजापिं ४२:१ - ४५:२८
याकूब व वया परिवार मिश्रय् वंगु ४६:१ - ४७:३१
याकूबं थः काय्पिन्त आशिष ब्यूगु व सीगु ४८:१ - ५०:१४
योसेफ सीगु ५०:१५-२६
1
सृष्टिया खँ
(१:१–२:२५)
1 दक्वसिबय् न्हापां परमेश्वरं आकाश व पृथ्वी सृष्टि यानादिल। 2 पृथ्वी बां मलू, अले शून्य। ततःजाःगु समुद्रया च्वय् न्यंकभनं खिउँसे च्वं। परमेश्वरया आत्मा समुद्रया च्वं च्वं जुयाच्वनि।
3 परमेश्वरं धयादिल - ‘तुयुगु जः दये मा।’ अले तुयुगु जः दत। 4 परमेश्वरं व जःयात स्वःबलय् बांलाःगु खन। अले वय्कलं जःयात खिउँथासं अलग तयादिल। 5 परमेश्वरं जःयात ‘न्हि’ अले खिउँयात “चा” धकाः नां तयादिल।
चा फुनाः सुथ जुल। थुकथं छन्हु जुल।
6 परमेश्वरं धयादिल-- “लः निब्व दयेत दथुइ जाः दयेमा।” 7 अले वय्कलं लःयात च्वय् व क्वय् यानाः निब्व दयकादिल। अथे हे जुल। 8 परमेश्वरं च्वय्यागु ब्वयात “आकाश” धकाः नां तयादिल।
चा फुनाः सुथ जुल। थुकथं निन्हु जुल।
9 अले परमेश्वरं धयादिल-- “आकाशया क्वय् च्वंगु फुक्क लः छथाय् मुँ, अले गंगु बँ खने दयेमा।” अथे हे जुल। 10 परमेश्वरं गंगु बँयात “पृथ्वी” धकाः नां तयादिल। अले मुंगु लःयात “समुद्र” धकाः नां तयादिल। वय्कःयात थ्व बांलाः ताल। 11 परमेश्वरं धयादिल-- “पृथ्वीं फुक्क कथंयागु घाँय्मा, पुसा दइगु अन्नमा व थःथःगु कथंयागु पु दइगु सिसाबुसामा थःथःगु कथं बुइकेमा।” अले अथे हे जुल। 12 थुकथं पृथ्वीं फुक्क कथंयागु घाँय्, पुसा दुगु अन्नमा व सिसाबुसा सइगु सिमात बुइकल। परमेश्वरयात थ्व बांलाः ताल।
13 चा फुनाः सुथ जुल। थुकथं स्वन्हु जुल।
14 अले परमेश्वरं धयादिल-- “न्हि व चा छुटे यायेत आकाशय् जः दयेमा। अले थ्व न्हि, दँ व नखःचखः सीकेगु चिं जुइ। 15 पृथ्वीइ जः खय्केत आकाशय् जः दयेमा।” अथे हे जुल। 16 परमेश्वरं ततःधंगु निगू जः दय्कादिल। तःधंगु जः न्हिनय् थीत व चिधंगु जः चान्हय् थीत खः। वय्कलं नगु नं दय्कादिल। 17 वय्कलं इमित पृथ्वीइ जः बीमा, 18 न्हिनय् नं चान्हय् नं थीमा, अले जःयात खिउँथासं छुटे यायेमा धकाः आकाशय् तयादिल। परमेश्वरयात थ्व बांलाः ताल।
19 चा फुनाः सुथ जुल। थुकथं प्यन्हु जुल।
20 परमेश्वरं धयादिल-- “लखय् थीथी जीवजन्तुत दयेमा, अले आकाशय् थीथी झंगःपंक्षीत ब्वयाजुइमा।” 21 अले परमेश्वरं लखय् च्वनिपिं ततःधिपिं जन्तुत, फुक्क किसिमया लखय् नं बँय् नं जुइपिं जन्तुत व फुक्क किसिमया झंगःपंक्षीत दयकादिल। परमेश्वरयात थ्व बांलाः ताल। 22 परमेश्वरं इमित आशिष बियाः धयादिल-- “मचाखाचा यक्व दयाः समुद्रय् जायेमा, अले झंगःपंक्षीत नं पृथ्वीइ यक्व दयेमा।”
23 चा फुनाः सुथ जुल। थुकथं न्यान्हु जुल।
24 परमेश्वरं धयादिल-- “पृथ्वीइ छेँय् लहीपिं, बँय् घिस्रय् जुयाजुइपिं व जंगलय् च्वनिपिं फुक्क कथंया जन्तुत दयेमा।” अले अथे हे जुल। 25 अले परमेश्वरं थीथी कथंयापिं जंगलय् च्वनिपिं, छेँय् लहीपिं, व बँय् घिस्रय् जुयाजुइपिं जन्तुत दय्कादिल। वय्कःयात थ्व बांलाः ताल।
26 अले परमेश्वरं धयादिल-- “मनूयात झीपिं थें हे च्वंक व झीगु हे ख्वाःलसि वय्क दय्के। अले इमित समुद्रय् च्वंपिं न्यातय्त, आकाशय् च्वंपिं झंगःपंक्षीतय्त, छेँय् लहीपिं फुक्क जीवजन्तुतय्त, फुक्क पृथ्वीयात व पृथ्वीइ घिस्रय् जुयाजुइपिं जीवजन्तुतय्त अधिकार याके ब्यु।”
27 थुकथं परमेश्वरं मनूयात
थःगु हे ख्वाःलसि वय्क दय्कादिल।
परमेश्वरयागु हे ख्वाःलसि वय्क
वय्कलं इमित दय्कादिल।
वय्कलं इमित मिजं व मिसा यानाः दय्कादिल।
28 परमेश्वरं इमित आशिष बियाः धयादिल-- “छिमि मचाखाचा यक्व दयाः पृथ्वी जायेमा, अले पृथ्वीइ अधिकार यायेमा। समुद्रय् च्वंपिं न्या, आकाशय् च्वंपिं झंगःपंक्षी व बँय् घिस्रय् जुइपिन्त अधिकार यायेमा।”
29 परमेश्वरं धयादिल-- “न्यँ, जिं छिमित फुक्क कथंयागु पुसा दुगु अन्नमा व सिसाबुसा सइगु सिमात पुसा नापं बी। थ्व हे छिमिगु नसा जुइ। 30 पृथ्वीइ च्वंपिं फुक्क जीवजन्तु, आकाशय् च्वंपिं झंगःपंक्षी व बँय् घिस्रय् जुयाजुइपिं फुक्क जीवजन्तुतय्त नयेत जिं घाँय्मा बी।” अले अथे हे जुल।
31 परमेश्वरं थःम्हं दय्कूगु फुक्क स्वयादिल। वय्कःयात थ्व तसकं बांलाः ताल।
चा फुनाः सुथ जुल। थुकथं खुन्हु जुल।