3 छन्‍हु चान्‍हय्‌ म्‍हगसय्‌ वयाः परमेश्‍वरं अबीमेलेकयात धयादिल-- “छ आः याकनं सी, छाय्‌धाःसा छं हःम्‍ह मिसा ब्‍याहा जुइधुंकूम्‍ह खः।”

4 अबीमेलेकं सारायात थि तक नं मथ्‍यूनि। वं परमेश्‍वरयात धाल-- “प्रभु! छिं निर्दोषपिं मनूतय्‌त नं नाश यानादी ला? जिं छुं नं मस्‍यू। 5 अब्राहामं थःम्‍हं हे वयात ‘जिमि केहेँ’ धकाः धाल। अले वं नं ‘जिमि दाजु’ धकाः धाल। जिगु मतिइ मभिंगु छुं हे मदु, अले छुं द्वंकागु मदु।”

6 परमेश्‍वरं वयात म्‍हगसय्‌ धयादिल-- “छं मभिंगु नुगलं थथे याःगु मखु धकाः जिं स्‍यू। उकिं जिं छन्‍त जिगु विरोधय्‌ पाप याये पाखें बचय्‌ यानातयागु खः। उकिं हे जिं छन्‍त वयात थीके मबियागु खः। 7 आः छं व मिसायात वया भाःतयाथाय्‌ लित यंकि। वया भाःत अगमवक्ता खः। वं छंगु लागि प्रार्थना यानाबी। अले छ सी मखु। छं वयात लित मयंकल धाःसा छ व छिमि मनूत फुक्‍कं सी।”

8 कन्‍हय्‌खुन्‍हु सुथ न्‍हापां अबीमेलेकं थः भारदारत फुक्‍कसित सःताः जूगु फुक्‍क खँ कन। थ्‍व न्‍यनाः इपिं फुक्‍कं ग्‍यात। 9 अले अबीमेलेकं अब्राहामयात सःताः न्‍यन-- “छं जिमित छु यानागु? जिं छंगु छु स्‍यंकागु दु धकाः जितः व जिगु देशयात थपाय्‌धंगु द्वपं बी त्‍यनागु? छं जितः याये मज्‍यूगु ज्‍या यात। 10 छं छाय्‌ थथे यानागु?”

11 अब्राहामं धाल-- “जिगु मतिइ थन च्‍वंपिन्‍सं परमेश्‍वरयात मानय्‌ याइ मखु। अले जिमि कलाःयात यंकेत जितः स्‍याइ धकाः जिं थथे यानागु खः। 12 व जिमि केहेँ नं खः। व जिमि बाःया म्‍ह्याय्‌ खःसां जिमि मांया धाःसा मखु। जिं वयात ब्‍याहा याना। 13 परमेश्‍वरं जितः जिमि बौया छेँ त्‍वःताः उखेंथुखें जुइम्‍ह यानादिसेंलि जिं सारायात ‘न्‍ह्याथाय्‌ वंसां छं जितः दया यानाः जि छं दाजु खः धकाः धा’ धयागु खः।”

14 अले अबीमेलेकं अब्राहामयात फै, द्वहं व दास दासीत बिल। वया कलाः सारायात नं लित बिल। 15 वं अब्राहामयात धाल-- “थ्‍व फुक्‍क जिगु दे खः। छं मंदुथाय्‌ च्‍वँ।” 16 वं सारायात धाल-- “छिमिसं छुं नं द्वंकूगु मदु धकाः सकसिनं सीमा धकाः जिं छिमि दाजुयात द्वःछि वहःया धिबा बियागु दु।”

17 अब्राहामं परमेश्‍वरयात प्रार्थना यात। अले परमेश्‍वरं अबीमेलेक, वया कलाः व दासीतय्‌त नं लाय्‌कादिल। आः इपिं हानं मचा बुइकेफइपिं जुल। 18 छाय्‌धाःसा परमेश्‍वरं अब्राहामया कलाः साराया हुनिं यानाः अबीमेलेकया कलाः व वया दासीपिन्‍त मचा बुइके मफइपिं यानादीगु खः।