26
इसहाक व रिबेका गरारय्
1 अब्राहामया पालय् जूगु अनिकाल लिपा हाकनं छकः अन अनिकाल जुल। उकिं इसहाक गरारय् पलिश्तीतय् जुजु अबीमेलेकयाथाय् वन।
2 परमप्रभुं वयाथाय् खनेदय्कः वयाः धयादिल-- “मिश्र देशय् वने मते। जिं धयाथाय् हे च्वँ। 3 छ अन हे च्वँ। जि छलिसें हे दइ, अले जिं छन्त आशिष बी। छाय्धाःसा जिं छिमि बाः अब्राहामलिसे छन्त व छिमि सन्तानयात थ्व हे देश बी धकाः बाचा चिनागु खः। 4 जिं छन्त आकाशय् च्वंगु नगु थें यक्व सन्तान बियाः इमित थ्व फुक्क देश बी। छिमि हे सन्तान पाखें संसारय् च्वंपिं फुक्कसिनं आशिष काये खनी। 5 छाय्धाःसा अब्राहामं जिं धाःथें फुक्क यात। वं जिं बियागु आज्ञा, नियम व स्यनाकना मानय् यात।” 6 उकिं इसहाक गरारय् हे च्वन।
7 इसहाकं थः कलाः रिबेका तसकं बांलाःगुलिं अन च्वंपिं मनूतय्सं वयात स्यानाः रिबेकायात यंकी धकाः ग्यानाः सुनानं वया कलाःया बारे न्यन कि ‘जिमि केहेँ’ धकाः धायेगु यात। 8 इसहाक अन च्वनाच्वंगु तःन्हु लिपा छन्हु जुजु अबीमेलेकं झ्यालं स्वःबलय् इसहाकं थः कलाःयात माया यानाच्वंगु खन।
9 अबीमेलेकं इसहाकयात दुने सःताः धाल-- “रिबेका छंम्ह कलाः खः, छाय् वयात केहेँ धकाः धयागु?”
इसहाकं धाल-- “वयागु लागि थन च्वंपिं मनूतय्सं जितः स्याइ धकाः।”
10 अबीमेलेकं धाल-- “छं जिमित थ्व छु यानागु? सुनानं छिमि कलाःयात बांमलाःगु ज्या याःगु जूसा छं जिपिं फुक्कसित दोषी यानाबीगु मखु ला?”
11 अले अबीमेलेकं दक्वसित थथे धकाः उजं बिल-- “सुनानं थ्व मनूयात व थ्वया कलाःयात थिल जक धाःसां वयात स्याइ।”
12 इसहाकं अन बुँ ज्यात। अले उगु दँय् वं सच्छिब्व अप्वः सय्काः बालि लल, छाय्धाःसा परमप्रभुं वयात आशिष बियादीगु खः। 13 इसहाकया बुँज्या झन्झन् बांलानावन। अले थुकथं व तसकं तःमि जुल। 14 वयाके यक्व फै-च्वलय् व दासदासीत दयावःगुलिं पलिश्तीतय् व खनाः नुगः मुल। 15 अले इमिसं वया बौ अब्राहामया दासदासीतय्सं अब्राहाम म्वानाच्वंबलय् हे म्हुयातःगु तुं ल्वहं व चा क्वफानाः ल्हानाबिल।
16 अबीमेलेकं नं इसहाकयात धाल-- “छ जिमिगु देश त्वःताः हुँ, छाय्धाःसा छ जिपिं स्वयाः नं बल्लाये धुंकल।”
17 उकिं इसहाक शहरं पिहां वनाः गरारया पिने गंगु खुसि दुगु थासय् लिक्कसं पाल ग्वयाः च्वन। 18 इसहाकं अन थः बौ अब्राहामया पालय् म्हूगु व पलिश्तीतय्सं अब्राहाम सीधुंकाः ल्हानाब्यूगु तुं हाकनं म्हुइकेबिल। अले वं तुंतय्गु नां अब्राहामं तयातःगु हे तयाबिल।
19 इसहाकया दासतय्सं गंगु खुसिइ गाः म्हूबलय् अन बुंगाःचा लुयावल। 20 अले गरारय् च्वंपिं फैजवाःत इसहाकया जवाःतलिसे-- “थ्व जिमिगु लः खः” धकाः ल्वाः वल। उकिं व बुंगाःचिगु नां ‘ल्वापु’ धकाः च्वन। 21 इसहाकया दासतय्सं मेगु तुं म्हुल। अन नं इपिं ल्वाः वल। उकिं उकियागु नां ‘शत्रु’ च्वन। 22 अनंलि इमिसं मेथाय् वनाः हाकनं मेगु तुं म्हुल। थुगुसी धाःसा सुं ल्वाः मवल। उकिं वं व तुंयागु नां थथे धकाः ‘रहोबोत’ तयाबिल-- “आः धाःसा परमप्रभुं झीत च्वनेत व अझ अप्वयावनेत थाय् बियादीगु दु।”
23 व अनं बेर्शेबाय् वन। 24 उखुन्हु हे चान्हय् परमप्रभुं वयाथाय् खनेदय्कः झायाः वयात धयादिल-- “जि छिमि बौ अब्राहामया परमेश्वर खः। ग्याये मते, छाय्धाःसा जि छलिसें दु। जिं जिमि च्यः अब्राहामलिसे बाचा चिना थें छन्त आशिष बी, अले छं यक्व सन्तान दइ।” 25 इसहाकं अन छगू वेदी दय्काः परमप्रभुयात प्रार्थना यात। वं थःगु पाल नं अन हे ग्वल। वया दासतय्सं अन तुं म्हुइगु ज्या छुत।
इसहाक व अबीमेलेकया दथुइ जूगु सन्धि
26 छन्हु अबीमेलेक थःत सल्लाह बीम्ह अहुज्जत व सेनापति पीकोलयात ब्वनाः गरारं इसहाकयाथाय् वल। 27 इसहाकं इमित धाल-- “छिकपिं थन छाय् झायागु? न्हापा ला छिकपिन्सं जितः क्वह्यंकाः थःपिनिगु देशं पितिना हयादिल।”
28 इमिसं धाल-- “जिमिसं सिल, परमप्रभु छिलिसे दी। उकिं आः झी दथुइ छगू सन्धि याये। झीसं छगू थज्याःगु सन्धि याये। 29 छिं जिमित छुं यानादी मखु। न्हापा जिमिसं नं छित मभिंगु छुं मयाना, बरु बांलाक हे व्यवहार याना। अले छुं मयासे छ्वयाहया। अथे हे छिसं नं जिमित छुं यानादी मते। आः छितः परमप्रभुं आशिष बियादिल।”
30 अले इसहाकं इमित तःधंक भ्वय् नकल। इपिं फुक्कसिनं नये त्वने यात। 31 कन्हय् खुन्हु सुथ न्हापां इसहाक व इमिसं छगू सन्धि यात। अले इसहाकं इमित बिदा बियाछ्वत। इपिं इसहाकलिसे लय्तायाः बायावन।
32 उखुन्हु हे इसहाकया दासतय्सं वयाः वयात धाल-- “जिमिसं लः लुइका।” 33 वं उकियागु नां शिबा तल। उकिं व शहरयागु नां आःतक नं बेर्शेबा हे जुयाच्वंगु दु।
एसावया कलाःपिं
34 एसावं ४० दँ दुबलय् हित्ती बेरीया म्ह्याय् यहूदीत व हित्ती एलोनया म्ह्याय् बासमतयात ब्याहा यात। 35 इपिं मिसातय्सं यानाः इसहाक व रिबेकायात म्वाये हे थाकुकाबिल।