29
याकूब लाबानया छेँय् थ्यंगु
1 याकूब थःगु लँ लिनाः वन। व पुर्बया देशय् थ्यन। 2 अन वं छथाय् छगः तुं खन। तुंया लिक्कसं स्वबथां फैत च्वनाच्वंगु दु। व फैचातय्त व हे तुंयागु लः त्वंकीगु जुयाच्वन। तुंया म्हुतु तीगु छगः तग्वःगु ल्वहं दु।
3 फैत फुक्क अन मुंवयेधुंकाः फैजवाःतय्सं तुंया म्हुतुं ल्वहं चीकाः लः त्वंकीगु व अले हाकनं व ल्वहँतं तुंया म्हुतु तिनाबीगु जुयाच्वन। 4 याकूबं फैजवाःतय्के न्यन, “पासापिं, छिपिं गनं वयागु?”
इमिसं लिसः बिल, “जिपिं हारानं वयापिं खः।”
5 वं इमित धाल, “छिमिसं नाहोरया छय् लाबानयात म्हस्यू ला?”
इमिसं लिसः बिल, “स्यू, जिमिसं म्हस्यू।”
6 याकूबं इमित हाकनं धाल, “वय्कः म्हं फु ला?”
इमिसं धाल, “वय्कः म्हं हे फु। वय्कःया म्ह्याय् राहेल फैत ज्वयाः थन हे वइतिनि।”
7 वं धाल, “छिपिं थन छाय् मुनाच्वनागु? निभाः बीगु ई मजूनि। फैत मुंकेगु ई नं मजूनि। उकिं लः त्वंकाः फैतय्त हाकनं ज्वयेयंकि।”
8 इमिसं धाल, “फुक्क फैत ममुंकं अले तुंया म्हुतुं ल्वहं मचीकं जिमिसं अथे याये फइ मखु। अथे जुइ धुंकाः तिनि जिमिसं फैतय्त लः त्वंके फइ।”
9 याकूब इपिं लिसे खँ ल्हाना च्वंबलय् हे राहेल थः बौया फैत ज्वयाः अन थ्यंकः वल। वया बौया फैत वं हे जइगु जुयाच्वन। 10 याकूबं थः पाजु लाबानया म्ह्याय् राहेल व वया फैत खनेवं वनाः तुंया म्हुतुइ च्वंगु ल्वहं चीकाः थः पाजुया फैतय्त लः त्वंकल। 11 अले वं राहेलयात चुप्पा नल, अले लय्तायाः मिखां ख्वबि हाय्कल। 12 वं राहेलयात “जि छिमि बाःया थःलाःम्ह रिबेकाया काय् खः” धकाः कन। थ्व न्यनाः राहेलं ब्वाँय् वनाः थः बौयात धाल।
13 थः भिंचा याकूबया थ्व खँ न्यनाः लाबान हथाय् पथासं ब्वाँय् वयाः नापलाः वल। वं याकूबयात घय्पुयाः चुप्पा नल। अले थःगु छेँय् हल। याकूबं जूगु फुक्क खँ कन। 14 अले लाबानं धाल, “छ जिगु हे ला व हि खः।”
याकूब वलिसे च्वंगु लच्छि दये धुंकाः छन्हु 15 लाबानं वयात धाल, “छ जिमि थः लायेवं छं सितिकं जिगु ज्या यायेगु ला? छन्त गुलि ज्याला माः, धा।”
याकूबं लेआ व राहेललिसे ब्याहा याःगु
16 लाबानया निम्ह म्ह्याय्पिं दु। तःधीम्हय्सिगु नां लेआ व चीधीम्हय्सिगु नां राहेल खः। 17 लेआया बांलाक मिखां मछू। राहेल धाःसा बांलानाः स्वये जिउ। 18 याकूबं राहेलयात यय्कल। उकिं धाल, “जिं छिम्ह चिधीम्ह म्ह्याय्या लागि न्हय्दँ तक छिगु ज्या याये।”
19 लाबानं धाल, “वयागु ब्याहा मेपिंलिसे यानाबीगु स्वयाः ला छन्त बीगु हे बांलाः। उकिं छ जिलिसें हे च्वँ। 20 अले राहेलया निंतिं याकूबं न्हय्दँ तक अन हे ज्या यानाः च्वन। वं राहेलयात तसकं यय्कूगुलिं थ्व ई वयात चिहाकः थें ताल।”
21 अले वं लाबानयात धाल, “जिगु ई पूवन। आः जितः छिकपिनि म्ह्याय् बियादिसँ।”
22 लाबानं अन च्वंपिं फुक्क मनूतय्त सःताः भ्वय् नकल। 23 बहनिइ धाःसा लाबानं थः म्ह्याय् लेआयात याकूबयाथाय् हयाबिल। याकूब वलिसें द्यन। 24 लाबानं थः दासी जिल्पा थः म्ह्याय् लेआयात दासी कथं बिल।
25 कन्हय् खुन्हु सुथय् याकूबं थःनापं लेआयात खन। अले वं लाबानयात धाल, “छिं जितः थथे छाय् यानादियागु? जिं राहेलया निंतिं छिथाय् ज्या यानागु, मखु ला? छिं जितः छाय् झंगः लानागु?”
26 लाबानं धाल, “जिमि तःधीम्ह म्ह्याय् ब्याहा मजुइकं चिधीम्ह म्ह्याय्या ब्याहा यायेगु चलन मदु। 27 उकिं न्हय्न्हु तक लेआलिसे हनाच्वँ। अले हाकनं राहेललिसे ब्याहा या। थुकिया पलेसा छं मेगु न्हय्दँ जिथाय् ज्या यायेमाः।”
28 वं अथे हे यात। न्हय्न्हु लिपा लाबानं थः म्ह्याय् राहेलयागु ब्याहा याकूब नाप यानाबिल। 29 लाबानं थः दासी बिल्हा थः म्ह्याय् राहेलयात दासी कथं बिल। 30 याकूबं राहेलयात नं ब्याहा यात। वं लेआयात स्वयाः अप्वः राहेलयात माया याः। अले वं मेगु न्हय्दँ तक लाबानयाथाय् ज्या यात।
याकूबया लेआपाखें मस्त दुगु
31 लेआयात माया मयाःगु खनाः परमप्रभुं वयात प्वाथय् दय्काबिल। राहेलयात धाःसा थारि हे याना तल। 32 लेआया प्वाथय् दत, अले वं काय् बुइकल। वं व मचायागु नां थथे मतिइ तयाः रूबेन तल, “परमप्रभुं धात्थें हे जिगु दुःख खनादीगु दु। आः ला जितः जिमि भाःतं माया याइ।”
33 वया हाकनं प्वाथय् दत, अले हानं मेम्ह काय् बुल। वं धाल, “जितः माया मयाः धकाः सीकाः हे परमप्रभुं जितः थ्व काय्नं बियादीगु खः।” उकिं वं वयागु नां शिमियोन तल।
34 वया हाकनं प्वाथय् दयाः काय् बुल। अले वं धाल, “थुगुसी ला जिमि भाःतं जितः स्वइ, छाय्धाःसा वय्कःया लागि जिं स्वम्ह काय् बुइकेधुन।” उकिं वं वयागु नां लेवी तल।
35 वया हाकनं प्वाथय् दयाः काय् बुल। वं धाल, “थुगुसी ला जिं परमप्रभुयात तःधंके।” उकिं वयागु नां यहूदा तल। अनंलि वया मचाबुइगु दित।