5 याकूबं थः म्‍ह्याय्‌ दीनायात शकेमं स्‍यंकाब्‍यूगु खँ सिल। उबलय्‌ वया काय्‌पिं फुक्‍कं फै जःवनाच्‍वंगुलिं व सुम्‍क च्‍वन। 6 उबलय्‌ हे शकेमया बौ हमोर खँ ल्‍हायेत याकूबयाथाय्‌ थ्‍यंकः वल। 7 याकूबया काय्‌पिं नं जूगु खँ न्‍यनाः नुगः मछिंकाः तमं मि जुयाः छेँय्‌ लिहां वल। छाय्‌धाःसा याकूबया म्‍ह्याय्‌यात स्‍यंकाः शकेमं याये मज्‍यूगु ज्‍या याःगु व इस्राएलयात हे बेइज्‍जत याःगु खः।

8 हमोरं इमित थथे धकाः धाल-- “जिमि काय्‌ शकेमया नुगः छिकपिनि म्‍ह्याय्‌पाखे क्‍वसाःगुलिं वलिसे दीनायागु ब्‍याहा यानाबियादिसँ। 9 झी आः थवंथवय्‌ ब्‍याहाया कालबिल याये। छिकपिनि म्‍ह्याय्‌मस्‍त जिमित बियादिसँ, जिमि म्‍ह्याय्‌मस्‍त छिकपिन्‍सं यंकादिसँ। 10 छिकपिं जिपिंलिसे हे च्‍वनादिसँ। थ्‍व थासय्‌ छिकपिं च्‍वनादीफु, अले न्‍ह्याथाय्‌ नं वनेफु। थन हे बनेज्‍या यानादिसँ, अले सम्‍पत्ति मुंकादिसँ।”

11 अले शकेमं दीनाया बौ व दाजुपिन्‍त धाल-- “छिकपिन्‍सं जितः दया यानादिसँ, छिकपिन्‍सं धाःगु जिं बी। 12 भमचाया मू व उपहार गुलि माः धयादिसँ, जिं छिकपिन्‍सं धाक्‍व बी। जितः छिकपिनि म्‍ह्याय्‌मचालिसे जक ब्‍याहा यानाबियादिसँ।”

13 शकेमं थः क्‍यहें दीनायात स्‍यंकाब्‍यूगुलिं याकूबया काय्‌पिन्‍सं शकेम व हमोरयात जाः ग्‍वयाः लिसः बिल। 14 इमिसं इमित धाल-- “म्‍हय्‌ चिं मतःम्‍ह मनूयात जिमिसं थः क्‍यहें बीफइ मखु। थथे यात कि जिमिगु इज्‍जत वनी। 15 उकिं छिकपिनि मिजंत फुक्‍कसिनं जिमिसं थें म्‍हय्‌ चिं तयेगु ज्‍या यात धाःसा जक जिमिसं छिकपिन्‍सं धाःथे याये फइ। 16 अले तिनि जक जिमि म्‍ह्याय्‌मस्‍त छिकपिन्‍सं यंके फइ, छिकपिनि म्‍ह्याय्‌मस्‍त जिमिसं काये फइ। अले जिमिसं छिकपिं नापं च्‍वनाः छगू हे जातियापिं थें जुयाः च्‍वनेफइ। 17 छिकपिन्‍सं म्‍हय्‌ चिं तयेत माने जुयामदिल धाःसा जिपिं थः क्‍यहें ज्‍वनाः थनं वने।”

18 हमोर व वया काय्‌ शकेमयात इमिगु खँ यल। 19 शकेम छेँजःपिं मध्‍ये दक्‍वसिबय्‌ अप्‍वः हनातःम्‍ह मनू खः। व याकूबया म्‍ह्याय्‌या मतिनाय्‌ लायेधुंकूगुलिं वं थ्‍व ज्‍या यायेत लिबाका मच्‍वन। 20 उकिं हमोर व वया काय्‌ शकेमं शहरया मू ध्‍वाखाय्‌ वनाः शहरय्‌ च्‍वंपिन्‍त धाल -

21 “थुपिं भिंपिं मनूत खः। थुमित थन हे तयाः बनेज्‍या याके बी। थुमित च्‍वनेत झीथाय्‌ थाय्‌ नं यक्‍व दु। अले झीसं थुमि म्‍ह्याय्‌मस्‍त ब्‍याहा याये नं फइ, झी म्‍ह्याय्‌मस्‍त नं थुमित बी फइ। 22 झीथाय्‌ च्‍वंपिं फुक्‍क मिजंतय्‌सं इमि मिजंतय्‌सं थें म्‍हय्‌ चिं तयेगु ज्‍या यात धाःसा जक इपिं झीपिंलिसे च्‍वनाः छगू हे जातियापिं थें जुयाः च्‍वनेफइ हं। 23 थथे जुल धाःसा इमिगु फुक्‍क सा, फै, सम्‍पत्ति झीगु मजुइ ला? उकिं झीसं इमिसं धाःगु खँ न्‍यने, अले इमित थन हे तये।”

24 शहरय्‌ च्‍वंपिं फुक्‍कसिनं हमोर व वया काय्‌ शकेमं धाःगु खँ न्‍यन। अले मिजंत धाक्‍वसिनं म्‍हय्‌ चिं तय्‌कल। 25 स्‍वन्‍हु लिपा, म्‍हय्‌ चिं तःगु स्‍याःगु हे मतंनिबलय्‌ याकूबया निम्‍ह काय्‌पिं दीनाया दाजुपिं शिमियोन व लेवी थःथःगु तरवार ज्‍वनाः सुनानं मसीक शहरय्‌ दुहां वनाः फुक्‍क मिजंतय्‌त स्‍यानाबिल। 26 इमिसं हमोर व वया काय्‌ शकेमयात नं तरवारं पालाः स्‍यानाबिल। अले दीनायात शकेमया छेँनं लिगनाः यंकल।

27 याकूबया मेपिं काय्‌पिन्‍सं वयाः शहरय्‌ लुटे यात। थुकथं इमिसं थः क्‍यहेंयात बेइज्‍जत याःगुया ब्‍वला साल। 28 इमिसं इमिगु फुक्‍क फै, सा, गधा, अले शहरय्‌ दुने व पिने च्‍वंगु फुक्‍क वस्‍तु नं यंकल। 29 इमिसं इमिगु फुक्‍क सम्‍पत्ति, मस्‍त, मिस्‍त व छेँय्‌ च्‍वंगु फुक्‍क ज्‍वनाः वन।

30 याकूबं शिमियोन व लेवीयात धाल-- “छिमिसं जितः आपतय्‌ लाकाबिल। आः जितः कनानी, परिज्‍जी व थन च्‍वंपिं फुक्‍कसिनं मही। झी ल्‍याखं आपाः मदु। इपिं फुक्‍क जानाः झीपिंलिसे ल्‍वाःवल धाःसा झीपिं फुक्‍कं सी।”

31 इमिसं लिसलय्‌ धाल-- “वं जिमि क्‍यहेंयात वेश्‍यायात थें याये ज्‍यू ला लय्‌?”