46
याकूब व वया परिवार मिश्रय् वंगु
(४६:१–४७:३१)
1 थःगु फुक्क सामान प्वःचिनाः इस्राएल मिश्रय् वन। बेर्शेबाय् थ्यंकाः वं थः बौ इसहाकया परमेश्वरयात बलि बिल। 2 चान्हय् परमेश्वरं वयात दर्शन बियाः धयादिल-- “याकूब, याकूब।”
अले वं धाल-- “जि थन दु।”
3 परमेश्वरं धयादिल-- “जि परमेश्वर खः, छिमि बाःया परमेश्वर, मिश्रय् वनेत छ ग्याये मते। जिं अन छंगु पाखें छगू तःधंगु जाति दय्के। 4 जि छनापं मिश्रय् वने। जिं हे छिमि सन्तानयात अनं लित ब्वना हये। छ सीबलय् छिमि काय् योसेफ छनापं दइ।”
5 अनंलि याकूब बेर्शेबां वन। वया काय्पिन्सं वयात, वया मस्तय्त व कलाःपिन्त फारों छ्वयाहःगु गाडाय् तयाः यन। 6 इपिं थःपिनिगु फुक्क वस्तु, कनानय् मुंकातःगु फुक्क सामान व फुक्क सन्तान ज्वनाः मिश्र देशय् वन। 7 थुकथं याकूब थः काय्पिं, म्ह्याय्पिं, छय्पिं, फुक्क सन्तान ज्वनाः मिश्रय् वन।
इस्राएलया परिवार
8 मिश्रय् वंपिं इस्राएलया काय्पिं व वया सन्तान थथे दु --
याकूबया तःधिम्ह काय् रूबेन। 9 रूबेनया काय्पिं-- हानोक, पल्लु, हेस्रोन व कर्मी।
10 शिमियोनया काय्पिं-- यमूएल, यामीन, ओहद, याकीन, सोहोर व कनानी कलाः पाखें दुम्ह काय् शौल।
11 लेवीया काय्पिं-- गेर्शोन, कहात व मरारी।
12 यहूदाया काय्पिं-- शेलह, फारेस व जेरह। यहूदाया तःधिपिं निम्ह काय् एर व ओनान कनानय् हे सीगु खः। फारेसया काय्पिं-- हेस्रोन व हामूल।
13 इस्साखारया काय्पिं-- तोला, पुवा, याशूब व शिम्रोन।
14 जबूलूनया काय्पिं-- सेरेद, एलोन व यहलेल।
15 थुपिं पद्दन-आरामय् लेआपाखें बूपिं याकूबया काय्पिं खः। वयापाखें छम्ह म्ह्याय् दीना नं दु। लेआया पाखें याकूबया मुक्कं स्विस्वम्ह सन्तान दु।
16 गादया काय्पिं-- सेफोन, हाग्यी, शूनी, यसबोन, एरी, अरोदी व अरेली।
17 आशेरया काय्पिं-- यिम्ना, यिश्वा, यिश्वी व बरीआ। इमि क्यहेँ सेरह खः। बरीआया काय्पिं-- हेबेर व मल्कीएल।
18 थुपिं लाबानं थः म्ह्याय् लेआयात बियाहःम्ह दासी जिल्पाया पाखें दुपिं याकूबया सन्तान खः। थुपिं मुक्कं झिंखुम्ह दु।
19 याकूबया कलाः राहेलया काय्पिं-- योसेफ व बेन्यामीन।
20 ओनयाम्ह पुजाहारी पोतीपेराया म्ह्याय् आसनतया पाखें मिश्रय् बूपिं योसेफया काय्पिं मनश्शे व एफ्राइम खः।
21 बेन्यामीनया काय्पिं-- बेला, बेकेर, अश्बेल, गेरा, नामान, एही, रोश, मुप्पीम, हुप्पीम व आर्द।
22 राहेलया पाखें बूपिं याकूबया सन्तान थुपिं हे खः। थुपिं मुक्कं झिंप्यम्ह दु।
23 दानया काय्-- हुशीम।
24 नप्तालीया काय्पिं-- यहसेल, गुनी, येसेर व शिल्लेम।
25 थुपिं लाबानं थः म्ह्याय् राहेलयात बियाहःम्ह दासी बिल्हा पाखें दुपिं याकूबया सन्तान खः। थुपिं मुक्कं न्हय्म्ह दु।
26 भौपिं त्वःताः याकूबलिसें मिश्रय् वंपिं वया सन्तान जक मुक्कं खुइखुम्ह दु। 27 मिश्रय् बूपिं योसेफया निम्ह काय् दु। थुकथं आः मिश्रय् याकूबया मुक्कं न्हयेम्ह (७०) सन्तान दत।
याकूब व योसेफ नापलाःगु
28 याकूबं योसेफयात थःत नापलायेत गोशेनय् वा धकाः धाय्के छ्वयेत यहूदायात थः स्वयां न्हापा छ्वत। इपिं अन थ्यंबलय् 29 योसेफ थःगु रथ तयार यानाः थः बौ इस्राएलयात गोशेनय् नापलायेत पिहां वल। वं थः बौयात नापलायेवं घय्पुयाः ताःई तक ख्वयाच्वन। 30 इस्राएलं योसेफयात धाल-- “जिं छन्त नापलानाः ख्वाः स्वये खन, छ मसीनि धकाः सिल। आः जि याउँक सी दत।”
31 योसेफं थः दाजुकिजा व इपिं लिसे वःपिं फुक्कसित धाल-- “आः जिं वनाः जुजुयात कनानय् च्वंपिं जिमि बाः, दाजुकिजापिं व छेँजःपिं थन वःगु दु धकाः कने। 32 जिं जुजुयात छिकपिं फैजवाःत खः, उकिं थःपिन्के दुगु सा फै फुक्क वस्तु व सामान नं ज्वनावःगु दु धकाः धयाबी।
33 “फारों छिकपिन्त-- ‘छिपिं छु ज्या याइपिं?’ धकाः न्यन धाःसा 34 ‘जिपिं फैजवाःत खः, जिपिं न्हापांनिसें फै जयावयाच्वनापिं खः’ धकाः धयादिसँ। अले वय्कलं छिकपिन्त गोशेनय् च्वनेत थाय् बी। मिश्रय् च्वंपिनि फै जइपिं मनूत मयःगुलिं योसेफं अथे धाय्कूगु खः।”