हाग्गैया सफू
म्हसीका
हाग्गैया अर्थ “नखः” खः। थ्व नामं वयागु जन्म इस्राएलीतय्गु नखःत (छुत्काराया नखः, सामाज्या नखः वा बल्चाबाय्या नखः) मध्ये छगू नखःबलय् जूगु जुइमा धकाः थुइकाबी (व्यवस्था १६:१६)। यहूदाया मनूत बेबिलोनय् ज्वना यंकूगुपाखें लिहांवये धुंकाः न्हापांम्ह अगमवक्ता हाग्गै खः। यहूदी परम्परा कथं व बुरा जूबलय् वं अगमवाणी ल्हाःगु खः। थ्व, अले २:३ पदं क्यनी व ई.पू. ५८६ लय् सोलोमन जुजुं दय्कूगु देगः नाश जूगु खंम्ह छम्ह साक्षी खः।
थ्व सफू हाग्गै अगमवक्तापाखें ई.पू. ५२० य् वःगु परमप्रभुया चिचीधंगु बुखँया मुना खः। बेबिलोनं इस्राएलीत लिहां वये धुंकूगु खः, अले यरूशलेमय् हाकनं च्वने धुंकूगु निइदँ ति दये धुंकल। देगः धाःसा तहसनहस जुया हे च्वंगु दु। थ्व बुखँय् हाग्गैनं इस्राएलया नायःतय्त देगः हाकनं दय्केत इनाप याइ। अले छगू न्हूगु, पवित्र व उजं मानय् याइगु जातिया लागि लिपा बांलाःगु अवस्था व शान्ति वइ धकाः परमेश्वरं बचं बियादी।
धलः पौ
परमप्रभुयागु देगः हाकनं दय्केगु उजं १:१-१५
न्हूगु देगः झःझः धाइ धकाः बचं ब्यूगु २:१-२३
हाग्गै
1
परमप्रभुयागु देगः हाकनं दय्केगु उजं
1 जुजु दारां राज्य यानाच्वंगु निगूगु दँया खुगूगु लाया न्हापांगु दिंखुन्हु*१:१ २९ अगष्ट ५२० बी.सी , यहूदायाम्ह राज्यपाल शालतिएलया काय् यरूबाबेल व यहोसादाकया काय् दकलय् तःधंम्ह पुजाहारी यहोशूयाथाय् हाग्गै अगमवक्तापाखें परमप्रभुयागु थ्व वचन वल।✡१:१ एज्र ४:२४–५:२; ६:१४; मत्ती १:१२
2 दक्व शक्ति दुम्ह परमप्रभुं हाग्गैयात थथे धयादी, “थुमिसं परमप्रभुया देगः हाकनं दय्केगु ‘ई मत्यःनि धकाः धयाजुल।’ ”
3 अले परमप्रभुयागु थ्व वचन हाग्गै अगमवक्तायापाखें वल, 4 “जिगु देगः दुनाच्वंगु खंक खंकं छिपिं बांलाःगु छेँय् च्वनाच्वनेगु ई थ्व खः ला?”
5 दक्व शक्ति दुम्ह परमप्रभुं थथे धयादी, “छिमित छु जुयाच्वन धयागु खँय् बांलाक बिचाः या। 6 छिमिसं यक्व पी, कम जक लइ, नयेत ला नइ, लुधनी मखु, त्वनेत ला त्वनी, प्याःचाः लनी मखु, वसः ला पुनी तर लुमुइ मखु। कमय् याःगु धिबा नं ह्वगं म्हिचाय् तः थें जुइ।”
7 दक्व शक्ति दुम्ह परमप्रभुं थथे धयादी, “छिमित छु जुयाच्वन बांलाक बिचाः या। 8 आः छिमिसं पहाडय् वनाः सिँ कयाः हजि, अले जिगु देगः हाकनं दय्कि। अबलय् जि लय्ताये अले जिगु आराधना पाय्छिकथं जुइ,” परमप्रभुं धयादी। 9 “छिमिसं यक्व लयेगु आसा याइ, अय्नं कम जक सइ, छिमिसं छेँय् हःगु बाली नं जिं फसं पुइकाछ्वये। थथे छाय् जुल?” दक्व शक्ति दुम्ह परमप्रभुं धयादी। “जिगु देगः दुनाच्वन, छिपिं धाःसा थथःगु बांलाःगु छेँ दय्केगुलिइ जुयाच्वन। 10 उकिं छिमिसं यानाः हे आकाशं सुतिलः मगाःगु व पृथ्वीइ अन्न मसःगु खः। 11 जिं छिमिगु बुँइ, पहाडय्, अन्नबालिइ, न्हूगु दाखमद्यलय्, चिकनय् व बँय् सइगु फुक्क बालिइ, मनूतय्थाय्, छिमिसं लहिनातःपिं पशुतय्थाय् व छिमिसं ल्हाः तःगु फुक्क ज्याय् अनिकाल छ्वयाहयागु दु।”
मनूतय्सं परमप्रभुया आज्ञा मानय् याःगु
12 अले शालतिएलया काय् यरूबाबेल व यहोसादाकया काय्, दकलय् तःधंम्ह पुजाहारी यहोशू व बेबिलोनं लिहांवःपिं फुक्कसिनं परमप्रभु इमि परमेश्वरया वचन व अगमवक्ता हाग्गैया बुखँयात मानय् यायेगु याना हल। मनूतय्सं परमप्रभु इमि परमेश्वरं वयात छ्वयाहयादीगु खँ सिल। अले मनूतय्सं परमप्रभुया भय काल।
13 परमप्रभुया दूत हाग्गैनं परमप्रभुयागु बुखँ मनूतय्त न्यंकल। परमप्रभुं धयादी, “जि छिपिंलिसें दु।” 14 उकिं परमप्रभुं शालतिएलया काय् यहूदायाम्ह राज्यपाल यरूबाबेल व यहोसादाकया काय्, दकलय् तःधंम्ह पुजाहारी यहोशू व बेबिलोनं लिहांवःपिं मनूतय्त ग्वाकादिल। अले इमिसं वयाः दक्व शक्ति दुम्ह परमप्रभु थः परमेश्वरयागु देगः दय्केगु ज्या न्ह्याकल। 15 दारा जुजुं राज्य यानाच्वंगु निगूगु दँया खुगूगु लाया निइप्यन्हु दुखुन्हुंनिसें इमिसं थ्व ज्या शुरु यात।