हिब्रूतय्त च्वःगु पौ
म्हसीका
थ्व पौ ख्रीष्टयात विश्वास याःपिं यहूदीतय्त च्वःगु खः। विरोध अप्वया वःगुलिं इमिगु विश्वास कमजोर जूगु खः। थ्व पतिइ येशू ख्रीष्ट हे सत्य खः, वय्कः व परमेश्वर उति ग्यं, वय्कलं परमेश्वरयागु हे स्वभाव क्यनादिल धकाः इमिगु विश्वास बल्लाकेत स्वःगु दु। थ्व पौ च्वम्हय्सिनं थःगु नां बियातःगु मदु। थुकथं थुकी स्वता खःगु खँय् बः बियातःगु दु --
१) येशू परमेश्वरया सदां दयाच्वनिम्ह काय् खः, गुम्हय्सिनं न्ह्याथेंज्याःगु दुःखकष्ट फयेमाःसां परमेश्वरयागु आज्ञा मानय् यायेगु त्वःता मदी। परमेश्वरया काय् येशू पुलांगु नियमया फुक्क अगमवक्तात, स्वर्गदूतत व मोशा स्वयाः नं तःधंम्ह खः।
२) येशूयात परमेश्वरं हे सदां दयाच्वनिम्ह व पुलांगु नियमय् च्वंपिं पुजाहारीत स्वयाः तःधंम्ह पुजाहारी यानाः छ्वयाहयादीगु खः।
३) येशूपाखें विश्वासीत पाप, भय व मृत्युं बचय् जुइ धुंकूगु दु। बलि बीगु व छाय्छी यायेगु ज्या किपालु कथं जक यहूदी धर्मय् यानावयाच्वंगु खः। धात्थेंगु मुक्ति ला येशूं थः हे तःधंम्ह पुजाहारी जुयाः झायाबियादी।
११ अध्यायलय् न्हापान्हापायापिं नांजाःपिं यहूदीतय्गु विश्वासयात दसु कथं न्ह्यथनाः च्वमिं इमित नं न्ह्याथेंज्याःगु दुःखकष्ट वःसां विश्वास मत्वःतुसे मन बियाः येशूयागु लँ स्वयाच्वनेत इनाप यानातःगु दु। थ्व पौ च्वम्हय्सिनं हिब्रुतय्त इपिं विश्वासं लिचिल धाःसा परमेश्वरयागु ग्यानापुगु इन्साफ इमिथाय् वइ धकाः ख्याच्वः नं बियातःगु दु। थज्याःगु हे मेमेगु अर्ती व ख्याच्वः बियाः थ्व पौ क्वचाय्कातःगु दु।
धलः पौ
ख्रीष्ट व परमेश्वर उतिग्यं ............................. १:१-३
ख्रीष्ट स्वर्गदूतत स्वयाः तःधं ....................... १:४–२:१८
ख्रीष्ट मोशा व यहोशू स्वयाः तःधं ................ ३:१–४:१३
ख्रीष्ट मेपिं पुजाहारीत स्वयाः तःधं ............... ४:१४–७:२८
ख्रीष्टयागु बाचा पुलांगु बाचा स्वयाः तःधं ..... ८:१–९:२८
ख्रीष्टयागु बलिदान मेमेगु बलि स्वयाः तःधं .. १०:१-३९
विश्वास हे दक्वसिबय् तःधं ......................... ११:१–१२:२९
मेमेगु अर्ती व क्वचाय्कूगु ........................... १३:१-२५
हिब्रू
1
वय्कःया काय्पाखें परमेश्वरं नवानादीगु
यूहन्ना १:१-१८
1 न्हापा न्हापा अगमवक्तातय्पाखें परमेश्वरं झी तापाःबाज्यापिं नाप तःकः मछि तःकथं नवानादिल। 2 तर आः दक्वसिबय् लिपा वय्कः थः काय्पाखें झीपिंलिसें नवानादीगु दु। काय्यात हे वय्कलं फुक्क सृष्टिया हामा यायेत ल्ययादिल। वय्कःपाखें हे थ्व संसारयागु सृष्टि यानादिल। 3 वय्कलं नवानादीगु खँय् हे थ्व संसार न्ह्यानाच्वंगु दु। परमेश्वरयागु महिमाया जः वय्कःयाके दु। वय्कः व परमेश्वर उतिग्यं। वय्कःया शक्ति दुगु वचनं हे थ्व संसार न्ह्याना च्वंगु दु। मनूतय्त नापं छुतय् यानादी धुंकाः वय्कः दक्वसिबय् तःधंम्ह परमेश्वरयागु जवय् च्वनादीगु दु।
स्वर्गदूतत स्वयाः परमेश्वरया काय् तःधं
4 स्वर्गदूतत स्वयाः परमेश्वरं वय्कःया काय्यात तःधं यानादिल। इपिं स्वयाः तःधं धकाः सीकेत परमेश्वरं वय्कःयागु नां हे तःधंकादिल। 5 धर्मशास्त्रय् नं परमेश्वरं वय्कःया काय्यात थथे धयादीगु खँ झीसं ब्वनागु दु --
“छ जिम्ह काय् खः,
थौंनिसें जि छिमि बाः जुल।”
अले हानं धयादिल --
“जि वया बाः जुइ,
अले व जिम्ह काय् जुइ।”
परमेश्वरं स्वर्गदूततय्त थथे गुब्सं धयामदी।*१:५ भज २:७; २ शमू ७:१४; १ इति १७:१३
6 वय्कलं थः दकलय् तःधिकम्ह काय्यात संसारय् छ्वया हयादीबलय् थथे धयादिल --
“फुक्क स्वर्गदूततय्सं
वय्कःयागु आराधना
याये माः।” *१:६ व्य ३२:४३
7 स्वर्गदूततय्गु बारे वय्कलं धयादी,
“वय्कलं थः दूततय्त फय्,
थः दासतय्त मित्याः यानादी।”*१:७ भज १०४:४
8 काय्यागु खँय् धाःसा वय्कलं थथे धयादीगु दु --
“हे परमेश्वर, छिगु सिंहासन
सदां सदां दयाच्वनी।
छिं छिगु राज्यय् च्वंपिं मनूतय्त
फुक्कसितं उतिग्यंक
न्याय यानाः
बांलाक शासन यानादी।
9 छितः भिंगु ज्याखँ जक यः,
अले मभिं ज्याखँ छितः मयः।
अय्जूगुलिं हे खः, परमेश्वरं,
छिम्ह हे परमेश्वरं,
छितः ल्ययाः
मेपिं फुक्कसित स्वयाः
तःधंकाः लय्ताय्कादीगु।”*१:८-९ भज ४५:६-७
10 हानं थथे च्वयातःगु दु --
“परमप्रभु, दकलय् न्हापालाक
छिं हे पृथ्वी सृष्टि यानादिल,
अले थःगु हे ल्हातं
आकाश दय्कादिल।
11 उपिं फुक्कं मदया वनीतिनि,
छि धाःसा सदां दया हे च्वनी।
छिं दय्कूगु फुक्कं
वसः भ्वाथः जू थें
भ्वाथः जुया वनीतिनि।
12 गा लथ्याय् थें
छिं आकाश नं लथ्यानादी,
अले वसः हिले थें
उमित नं हिलादी।
छि धाःसा सदां उत्थें जुया च्वनी,
छिगु जीवन गुबलें फुइ मखु।”*१:१०-१२ भज १०२:२५-२७
13 परमेश्वरं स्वर्गदूततय्त थथे गुब्सं धयामदी।
“जिं छं शत्रुतय्त
छंगु पालि तःले मततले
छ जिगु जव ल्हाःपाखे
च्वना च्वँ।” *१:१३ भज ११०:१
14 अय्सा स्वर्गदूतत धयापिं सु खः लय्? इपिं परमेश्वरयात सेवा याइपिं आत्मा खः। अले मुक्ति काइपिं मनूतय्त ग्वाहालि यायेत छ्वयाहःपिं खः।