3
मोशा स्वयाः येशू तःधं
1 यःपिं दाजुकिजापिं, छिमित हे खः, परमेश्वरं सःता दीगु। झीसं विश्वास याना च्वनाम्ह येशूयात हे परमेश्वरं छ्वया हयाः दकलय् तःधंम्ह पुजाहारी यानादिल। वय्कःयाके थःगु मन तया च्वँ। 2 परमेश्वरयागु ज्याय् मोशा विश्वास याये बहःम्ह जू थें, येशू नं परमेश्वरं याके हयादीगु ज्याय् विश्वास याये बहःम्ह जुयादिल।*३:२ गन्ती १२:७
3 छेँ स्वयाः छेँ दय्कूम्हय्सिया इज्जत तःधं जुइ। अथे हे मोशा स्वयाः येशू यक्व अप्वः इज्जत याये बहःम्ह जुयादिल। 4 फुक्क छेँ मनूतय्सं हे दय्कूगु खः। अय्नं दक्व फुक्कं दय्कादीम्ह ला परमेश्वर हे खः।
5 परमेश्वरयागु छेँय् मोशा विश्वास याये बहःम्ह च्यः थें जुल। अले परमेश्वरं लिपा धयादीगु खँयागु साक्षी वं हे बियावन। 6 ख्रीष्ट धाःसा परमेश्वरयागु छेँय् अधिकार दुम्ह काय् थें विश्वास याये बहःम्ह जुयादिल। झीसं आशा याना थें उत्थें साहस व भरोसा तयाच्वन धाःसा झीपिं हे परमेश्वरया छेँ जुइ।
विश्वास यायेगु त्वःता छ्वये मते
7 पवित्र आत्मां थथे धयादीगु दु --
“थौं छिमिसं परमेश्वरयागु सः
ताल धाःसा,
8 छिमि तापाःबाज्यापिन्सं थें
छिमिसं वय्कःयात मभिंकाः
थःगु नुगः छाके मते।
मरुभूमिइ इमिसं
वय्कःयागु मन स्वल।
9 जिं पीदँ पीदँ तक
ततःधंगु अजूचायापुगु ज्या
याःगु खंक खंक नं
छिमि तापाःबाज्यापिन्सं
मरुभूमिइ जिगु मन स्वल।
10 अय्जूगुलिं तंम्वय्काः
जिं इमित थथे धया --
‘छिमिगु मन थाःगाः दइ मखु,
छिमिसं जिगु लँपु मसिल।’
11 अय्जूगुलिं जिं तमं पाफयाः
थथे धया --
‘छिमिसं गुबलें नं
जिं बीगु आराम काये
खनि मखु।’ ”*३:७-११ भज ९५:७-११
12 यःपिं दाजुकिजापिं, होश याना च्वँ। छिपिं सुं नं म्वाःम्ह परमेश्वरयात त्वःताः विश्वास मयाइपिं व जिद्दि जूपिं जुइ मते। 13 “थौं” धयागु ई दतले छिमिसं थःथवय् साहस बीगु याना च्वँ। मखुसा पापं यानाः छिमिगु नुगः तसकं छाइ। 14 झीसं न्हापांनिसें लिपा तकं विश्वास थातं तयाच्वने फुसा झीपिं ख्रीष्ट नापं च्वने दइ। 15 थथे धया तःगु हे दु --
“थौं छिमिसं परमेश्वरयागु सः
ताल धाःसा
छिमि तापाःबाज्यापिन्सं थें
छिमिसं वय्कःयात मभिंकाः
थःगु नुगः छाके मते।”*३:१५ भज ९५:७-८
16 सुनां परमेश्वरयागु सः तायाः नं वय्कःयात हे मभिंकल? मोशां मिश्र देशं लिगना हःपिं मनूत हे, मखु ला? 17 सु नाप परमेश्वर पीदँ तक तंम्वय्कादिल? पाप यानाः मरुभूमिइ सिना वंपिं नाप हे, मखु ला? 18 थथे खँ मन्यंपिन्त हे परमेश्वरं “छिमिसं जिं बीगु आराम काये खनी मखु” धकाः पाफयादीगु, मखु ला?*३:१६-१८ गन्ती १४:१-३५ 19 परमेश्वरयात विश्वास मयाःगुलिं हे इपिं वय्कलं इमित बी धयादीगु देशय् दुहां वने मखंगु खः।