6
1 अय्जूगुलिं ख्रीष्टयागु न्ह्यखँ जक सय्का च्वनेगु त्वःताः मेमेगु दुग्यंगु व ततःधंगु खँ नं सीके माः। मखुगु, मभिंगु व परमेश्वरयात मयःगु ज्याखँ यायेगु त्वःताः पश्चाताप यायेगु, वय्कःयात विश्वास यानाच्वनेगु, 2 बप्तिस्मा कायेगु, छेनय् ल्हाः तयाः प्रार्थना यायेगु, सीपिं हानं म्वाना वइगु, अले दकलय् लिपा याइगु न्याययागु खँ जक झीसं लिसा लिसा कयाः स्यनाच्वने मजिल। 3 परमेश्वरं झीत थुलिं अप्वः सय्के ब्यूसा झीसं सय्का वने।
4 छकः परमेश्वरयागु जः काये धुंकूपिं, स्वर्गयागु वरदान काये धुंकूपिं व पवित्र आत्मां जाये धुंकूपिन्त हानं पश्चाताप याके फइ मखु। 5 थुकथं वय्कः नाप मिलय् जुइ धुंकूगुलिं वय्कःयागु खँ भिं धकाः थुमिसं स्यू। परमेश्वरयागु राज्ययागु अजूचायापुगु शक्ति गय् च्वं धकाः नं थुमिसं थुइके धुंकल। 6 अय्नं हे थुमिसं वय्कःयात त्वःतावन धाःसा थुमित पश्चाताप याकाः हानं लितहये फइ मखु। छाय्धाःसा थुमिसं हानं छकः फुक्कसिया न्ह्यःने परमेश्वरया काय्यात क्रूसय् यख्खानाः बेइज्जत याइ।
7 परमेश्वरं हे पृथ्वीइ वा वय्कादीगुलिं बुँज्या याइपिन्सं थःपिन्त माःगु अन्न सय्की। थुकथं इमिसं वय्कःयागु आशिष काइ। 8 कं व घाँय् जक बुया वल धाःसा व बुँ ज्यालगय् जुइ मखु। उकी ला परमेश्वरयागु सराः लाइ, अले मि तइ।*६:८ उत ३:१७-१८
9 यःपिं दाजुकिजापिं, जिमिसं थथे धयासां छिमिगु बारे थ्व स्वयाः भिंगु व मुक्तिनापं स्वापु दुगु खँयागु हे जिमिसं भरोसा कयागु दु। 10 परमेश्वरं अन्याय यानादी मखु। छिमिसं यानाच्वंगु वय्कःयागु ज्या व वय्कःयात माया यानाच्वंगु खँ, अले दाजुकिजापिन्त ग्वाहालि याःगु व यानाच्वंगु खँ नं वय्कलं ल्वःमंकादी मखु। 11 थुकथं हे छिमिसं मन तयाः लिपा तकं कुतः यानाच्वनी धकाः जिमिसं मनं तुनाच्वना। अले छिमिगु आशा नं पूवनी। 12 छिपिं अल्छी जूगु जिमित मयः, बरु दुनुगलंनिसें परमेश्वरयात विश्वास याःपिं मनूतय्सं थें वय्कलं बी धयादीगु कायेत कुतः या।
परमेश्वरं धयादीगु खँ पक्का जू
13 परमेश्वरं अब्राहामयात बचं बियादीबलय् थः स्वयाः तःधंम्ह सुं हे मदुगुलिं थःगु हे नामं थथे पाफयादिल --
14 “जिं छन्त आशिष बी,
अले छं सन्तान नं
यक्व दय्का बी।”*६:१४ उत २२:१६-१७
15 अब्राहाम हथाय् मचासे पिया च्वंगुलिं परमेश्वरं बियादी धकाः बचं बियादीगु आशिष वयात दत।
16 मनूतय्सं थः स्वयाः तःधंम्हय्सिगु नामय् पाफइ। अले थःगु द्वंबिद्वं नं भिंकी। 17 परमेश्वरं बी धकाः धयादीपिं मनूतय्त थःम्हं बी धकाः धयादीगु खँ पाइ मखु धकाः नं पाफयादिल। 18 थथे गुब्सं हिली मखुगु थ्व निता खं वय्कःपाखें बचय् जुया च्वनापिं झीत नं झीसं आशा याना च्वनागु खँय् बल्लाना च्वनेत साहस बी। 19 थ्व हे आशाय् झीपिं म्वानाच्वनागु दु। थ्व धात्थें व पक्का खः। अले थ्व देगलय् च्वंगु पर्दाया दुने थ्यंकः थ्यं।*६:१९ लेवी १६:२ 20 झीगु निंतिं येशू न्ह्यः हे मल्कीसेदेक थें सदांया लागि दकलय् तःधंम्ह पुजाहारी जुयाः अन दुहां झाये धुंकल।*६:२० भज ११०:४