यूहन्नां च्वःगु भिंगु खँ
म्हसीका
यूहन्नां च्वःगु सुसमाचारय् येशू परमेश्वरयागु सदां दयाच्वनिगु वचन खः, अले वय्कः मनू जुयाः झीनाप च्वनादिल धकाः क्यनातःगु दु। थ्व सुसमाचारया सफू ब्वनिपिन्सं “येशू हे मुक्ति बीम्ह ख्रीष्ट खः” धकाः विश्वास याये फयेमा अले विश्वास यानाः वय्कःया नामय् अनन्त जीवन दयेमा धकाः च्वःगु खः।* १:० यूह २०:३१
सफूया न्ह्यःनेया ब्वय् येशू परमेश्वरया सदां दयाच्वनिगु वचन खः धकाः क्यनातःगु दु। अले येशूं यानादीगु थी थी अजूचायापुगु ज्यां वय्कः परमेश्वरं ल्ययादीम्ह मुक्ति बीम्ह ख्रीष्ट परमेश्वरया काय् खः धकाः नं क्यनातःगु दु। सफूया दथुइ थ्व अजूचायापुगु ज्यां छु खँ सी दु धकाः ध्वाथुइक व ताःहाकय्क न्ह्यथनातःगु दु। अले येशूयात मनूतय्सं गुकथं विश्वास यानाः चेला जुल, गुकथं यहूदीतय् नायःतय्सं वय्कःयात विरोध यानाः इन्कार यात धयागु खँ नं क्यनातःगु दु। १३ निसें १७ अध्याय तक ज्वंखुन्हु बहनिइ वय्कलं चेलात नापं छुत्काराया नखः हनाः प्रभु भ्वय् पलिस्था यानादिल। अले साहस मत्वःतेगु व पवित्र आत्मा छ्वया हयेगु खँ स्यनेकने यानादीगु च्वयातःगु दु। दकलय् लिपा लिपायागु अध्यायलय् वय्कःयात ज्वंगु, महासभाय् थने यंकूगु, स्याःगु व हानं म्वानाझाःगु, चेलातय्थाय् खने दय्कः झाःगु खँ च्वया तःगु दु।
ख्रीष्टपाखें अनन्त जीवनया वरदान दइ धइगु खँय् यूहन्नां बःब्यूगु दु। थ्व वरदान आः सुरु जुइ अले प्रभु येशूयात लँ, सत्य व जीवन खः धकाः मानय् याःपिन्त दइ। येशूं मनूतय्सं न्हिया न्हिथं छ्यलेमाःगु वस्तुत चिंकथं कयाः आत्माया खँयात ध्वाथुइकेत स्यनेकने यानादीगु खः -- गथे लः, मरि, जः, फैजवाः व वया फैचात, दाखमा व दाख। यूहन्नां थज्याःगु खँ बांलाक क्यना तःगु दु।
थ्व सफू ई.सं. ७० निसें ९० तकया दथुइ च्वःगु जुइफु।
धलः पौ
न्ह्यखँ ................................................. १:१-१८
बप्तिस्मा बीम्ह यूहन्नां पश्चातापया
खँ न्यंका जूगु .................................. १:१९-३४
येशूं दकलय् न्हापांयापिं झिंनिम्ह
चेलात ल्ययादीगु .............................. १:३५-५१
येशूयागु न्हय्गू अजूचायापुगु ज्या ............. २:१–१२:५०
लिपायागु हप्ताय् येशूयात स्यायेगु
फैसला याःगु व क्रूसय् यख्खाःगु .......... १३:१–१९:४२
येशू हानं म्वानाझाःगु व चेलातय्थाय्
खने दय्कः झाःगु ............................... २०:१-३१
गालीलय् येशू हाकनं खने दय्कः झाःगु ..... २१:१-२५
यूहन्ना
1
वचन मनू जुयाः झाःगु
1 दक्वसिबय् न्हापा हे वचन दु,
अले थ्व वचन परमेश्वर नाप दु।
थ्व वचन हे परमेश्वर खः।
2 वय्कः न्हापांनिसें हे
परमेश्वर नाप दी।
3 फुक्कं सृष्टि यानादीगु
वय्कलं हे खः।
फुक्क सृष्टि परमेश्वरं
वय्कःया पाखें हे
यानादीगु खः।
सृष्टि जूगुलिइ छुं नं वय्कः
मदय्कं जूगु मदु।
4 जीवन वय्कःयाके दु।
व हे जीवन मनूतय्त मदय्कं
मगाःगु जः खः।
5 थ्व जः खिउँथाय्
झः झः धाय्क थी,
खिउँगुलिं थ्व जःयात
त्वपुइ मफुत।
6 अबलय् परमेश्वरं छ्वया हःम्ह यूहन्ना धाःम्ह छम्ह मनू दु।* १:६ मत्ती ३:१; मर्क १:४; लूक ३:१-२ 7 थ्व मनू जःयागु खँ थः हे साक्षी जुयाः फुक्कसितं कनाः विश्वास याकेत वःम्ह खः। 8 थ्व मनू थः हे जः मखु, बरु जः फुक्कसितं म्हसीका बीत वःम्ह खः। 9 फुक्क मनूतय्गु नुगलय् थीगु धात्थेंयागु जः ला संसारय् झाया च्वंगु दु।
10 वय्कः संसारय् दी, वय्कलं हे संसार सृष्टि यानादीगु जूसां संसारय् च्वंपिन्सं वय्कःयात म्हमसील। 11 वय्कः थः हे मनूतय्थाय् झाल। अय्नं थः मनूतय्सं वय्कःयात नाला मकाः। 12 वय्कःयात ग्रहण यानाः विश्वास याःपिन्त धाःसा परमेश्वरया सन्तान जुइगु हक बियादिल। 13 थुपिं मनूतय्पाखें बुइका तःपिं मखु, बरु परमेश्वरं बुइका तःपिं परमेश्वरया सन्तान खः।
14 वचन मनू जुयाः झीपिं नाप च्वं झाल। वय्कः दया माया, अले सत्यं जाःम्ह खः। जिमिसं वय्कःया महिमा खना, गुगु महिमा बाःया याकः काय्या थें च्वं।
15 वय्कःयागु खँ कँकं यूहन्नां थथे धाल -- “जि स्वयाः लिपा झाइम्ह जि स्वयाः नं तःधंम्ह खः छाय्धाःसा वय्कः जि बुइ न्ह्यःनिसें दुम्ह खः। अले जिं धयाम्ह वय्कः हे खः।”
16 वय्कःयागु गुबलें मसुइगु दया मायायागु धुकुतिं झीसं यक्व दया माया काये खंगु दु। 17 व्यवस्था मोशायागु पाखें बियादिल, येशू ख्रीष्टयागु पाखें धाःसा परमेश्वरया दया माया व सत्य दत। 18 परमेश्वरयात सुनानं गुबलें हे खंगु मदु। अय्नं बाः नाप च्वंम्ह याकः काय्नं हे वय्कःयात क्यनादीगु दु।
यूहन्नां येशूयागु साक्षी ब्यूगु
मत्ती ३:१-१२; मर्कूस १:१-८; लूका ३:१-१८
19 यरूशलेमय् च्वंपिं यहूदी नायःतय्सं पुजाहारी व लेवीतय्त “यूहन्ना धाःम्ह सु खः” धकाः न्यंके छ्वया हल। यूहन्नां इन्कार मयासे स्वीकार यानाः लिसः बिल -- 20 “जि मुक्ति बीम्ह ख्रीष्ट मखु।”
21 अले इमिसं वयाके न्यन -- “अय्सा छ एलिया खः ला?”
वं धाल -- “मखु।”
“अय्सा छ व अगमवक्ता खः ला?”
वं लिसः बिल -- “मखु।”* १:२१ व्य १८:१५,१८; मला ४:५
22 अले इमिसं वयात थथे धाल -- “अय्सा छ सु खः लय्? जिमित न्यंके छ्वया हःपिन्त जिमिसं लिसः ब्यू वने मानि। छं थःत सु धकाः मतिइ तया?”
23 अले वं धाल --
“यशैया अगमवक्तां धाःथें
जि परमप्रभुया निंतिं
लँ छिंका ब्यु धकाः मरुभूमिइ
हाला जुइम्हय्सिया सः खः।”* १:२३ यशै ४०:३
24 थुपिं फरिसीतय्सं छ्वया हःपिं मनूतय्सं 25 हानं न्यन -- “छ मुक्ति बीम्ह ख्रीष्ट नं मखु, एलिया नं मखु, अले व अगमवक्ता नं मखु धयागु जूसा छं छाय् बप्तिस्मा बियाच्वनागु?”
26 वं लिसः बियाः धाल -- “जिं ला छिमित लखं बप्तिस्मा बिया, अय्नं छिमिगु पुचलय् छिमिसं हे म्हमस्यूनिम्ह छम्ह दनाच्वंगु दु। 27 जि स्वयाः लिपा झायादीम्ह वय्कः हे खः। वय्कःयागु लाकां पुतु फ्यनेत तकं जि मल्वः।”
28 यर्दन पारिइ बेथानिया धाःगु थासय् यूहन्नां बप्तिस्मा बिया च्वंथाय् थ्व खँ जूगु खः।
येशू परमेश्वरया भ्याःचा
29 कन्हय् खुन्हु यूहन्नां थःथाय् येशू झायाच्वंगु खनाः धाल -- “संसारयागु पाप क्षमा यानादीम्ह परमेश्वरया भ्याःचा वय्कः हे खः। 30 जिं धया च्वनाम्ह मनू वय्कः हे खः -- ‘जि स्वयाः लिपा झाइम्ह मनू जि स्वयाः तःधं, छाय्धाःसा वय्कः जि स्वयाः न्हापांनिसें हे दुम्ह खः।’ 31 जिं नं वय्कःयात म्हमस्यू, अय्नं वय्कःयात इस्राएलीतय्त म्हसीके बी माःगुलिं जिं लखं बप्तिस्मा बियाच्वनागु खः।”
32 अले वं थथे धकाः साक्षी बिल -- “जिं पवित्र आत्मायात स्वर्गं सुकुभतु थें कुहां वयाः वय्कःया म्हय् जूगु खना। 33 जिं थः थःम्हं तुं वय्कःयात म्हमस्यू, अय्नं जितः लखं बप्तिस्मा बीके छ्वया हःम्हय्सिनं थथे धयादिल -- ‘गुम्हय्सिके आत्मा क्वहां वयाः च्वनी, पवित्र आत्मां बप्तिस्मा बीम्ह व हे खः।’ 34 थ्व जिं खनागु दु, उकिं परमेश्वरया काय् वय्कः हे खः धकाः जिं साक्षी बियाच्वनागु खः।”
येशूया न्हापांयापिं चेलात
35 कन्हय् खुन्हु यूहन्ना हानं निम्ह चेलात नाप व हे थासय् दनाच्वन। 36 येशू झायाच्वंगु खनाः वं धाल -- “का स्व, परमेश्वरया भ्याःचा।” 37 थ्व न्यनाः चेलात निम्हं येशूया ल्यू ल्यू वन।
38 वय्कलं लिफः स्वयादीबलय् इपिं वयाच्वंगु खनाः इमित धयादिल -- “छिमिसं सुयात माला च्वनागु?”
इमिसं धाल -- “गुरूजु, छि गन च्वनादी?”
39 वय्कलं धयादिल -- “जि नाप वा, अले खनी।” इपिं वय्कः नाप वन, अले इमिसं वय्कः च्वनिगु थाय् खन। इपिं अन थ्यंबलय् बहनिसिया चार बजे जूगुलिं इपिं वय्कः नापं अन हे बाय् च्वन।
40 यूहन्नां धाःगु खँ न्यनाः येशू नाप वंपिं मध्ये छम्ह मनू सिमोन पत्रुसया दाजु अन्द्रियास खः। 41 वं वनाः थः किजा सिमोनयात मात्तुमालाः नापलाना धाल -- “जिमिसं मसीह धाःम्ह मुक्ति बीम्ह ख्रीष्टयात नाप लाये धुन।”
42 वं वयात येशूयाथाय् ब्वना हल। वय्कलं वयात स्वयाः धयादिल -- “छ ला योआनेसया काय् सिमोन खः। आवंनिसें छन्त केफास धाइ।” केफास व पत्रुसया अर्थ “ल्वहं” खः।
फिलिप व नथानेलयात सःतादीगु
43 कन्हय् खुन्हु येशूं गालीलय् झायेगु मनं तुनादिल। वय्कलं फिलिपयात नाप लानाः धयादिल -- “जि नाप वा।” 44 फिलिप नं अन्द्रियास व पत्रुसपिनिगु शहर बेथसेदायाम्ह हे खः।
45 फिलिपं नथानेलयात नापलानाः धाल -- “मोशां व्यवस्थाय् धया थकूम्ह व अगमवक्तातय्सं च्वया थकूम्ह नासरतय् च्वंम्ह योसेफया काय् येशूयात जिमिसं नाप लाये धुन।”
46 नथानेलं वयात धाल -- “नासरतं नं छुं भिंगु गतिलाःगु खँ वइ ला?”
फिलिपं वयात धाल -- “वयाः छं हे स्व।”
47 नथानेलयात थःथाय् वयाच्वंगु खनाः येशूं वयात धयादिल -- “छ ला छम्ह तसकं स्वजाम्ह इस्राएली खः।”
48 वं धाल -- “छिं जितः गथे म्हसील?”
वय्कलं लिसः बियादिल -- “फिलिपं छन्त सःते न्ह्यः हे जिं छन्त यःमरिमाया क्वय् खना।”
49 वं लिसः बिल -- “गुरूजु, छि ला परमेश्वरया हे काय् खः। छि ला इस्राएलया जुजु हे खः।”
50 वय्कलं धयादिल -- “जिं छन्त यःमरिमाया क्वय् खना धकाः धयागुलिं छं विश्वास यानागु ला? छं थ्व स्वयाः नं ततःधंगु खनीतिनि।” 51 अले वय्कलं वयात धयादिल -- “धात्थें धात्थें हे जिं छन्त धाये -- छिमिसं स्वर्ग चाःगु खनी, अले परमेश्वरया स्वर्गदूतत परमेश्वर व मनूया काय्या दथुइ थहां क्वहां जुयाच्वंगु खनी।”* १:५१ उत २८:१२