9
झिंनिम्हय्सित भिंगु खँ न्यंके छ्वयादीगु
मत्ती १०:५-१५; मर्कूस ६:७-१३
1 छन्हु येशूं झिंनिम्ह चेलातय्त थःथाय् सःताः इमित भूततय्त ख्याना छ्वयेगु व उसाँय् मदुपिन्त लाय्का बीगु शक्ति व अधिकार बियादिल। 2 अले वय्कलं परमेश्वरयागु राज्ययागु खँ न्यंकेत व ल्वय् लाय्का बीत इमित छ्वयादिल। 3 वय्कलं इमित धयादिल -- “लँय् छिमिसं छुं हे ज्वना वने मते। तुतां, म्हिचा, नसा, धिबा व हिला वसः नं यंके मते। 4 न्ह्याम्हय्सिगु छेँय् बाय् च्वंसां छिपिं मेथाय् वने मत्यंतले व हे छेँय् च्वँ। 5 सुनानं छिमित दुमकाःसा, भिंगु खँ मन्यंसा छिमिसं इमित लज्या चाय्केत पालि च्वंगु धू तकं थाथा यानाः व थाय् त्वःता हुँ।”*९:३-५ लूक १०:४-११; प्रे १३:५१
6 अनंलि गां गामय् वनाः इमिसं भिंगु खँ न्यंकाः मनूतय्गु ल्वय् लाय्का बीगु यात।
जुजु हेरोद अलमलय् लाःगु
मत्ती १४:१-१२; मर्कूस ६:१४-२९
7 गालीलयाम्ह शासक हेरोद येशूयागु खँ न्यनाः अलमलय् लात, छाय्धाःसा गुलिं गुलिंसिनं ला बप्तिस्मा बीम्ह यूहन्ना म्वानावःगु धकाः नं धया जुल। 8 गुलिसिनं एलिया वःगु धकाः धाल। गुलिसिनं ला न्हापायापिं अगमवक्तात मध्ये सुं छम्ह म्वाना वःगु जुइ माः धकाः नं धाल।*९:७-८ मत्ती १६:१४; मर्क ८:२८; लूक ९:१९
9 अले हेरोदं धाल -- “यूहन्नायागु छ्यं ला जिं ध्यंके धुन। थ्व सु मनू जुल, गुम्हय्सिगु बारे जिं थुलिमछि खँ न्यनाच्वना?” अले हेरोदं वय्कःयात तसकं स्वये मास्ति वय्कल।
न्याद्वः मनूतय्त नकादीगु
मत्ती १४:१३-२१; मर्कूस ६:३०-४४; यूहन्ना ६:५-१३
10 प्रेरिततय्सं लिहां वयाः इमिसं याना वःगु ज्याखँ फुक्क येशूयात कन। अले इमित ब्वनाः वय्कः सुनानं मसीक बेथसेदा शहरय् झाल। 11 थ्व खँ सीकाः ग्वाः ग्वाः हे मनूत वय्कःया ल्यू ल्यू वन। वय्कलं इमित लसकुस यानादिल। अले इमित परमेश्वरयागु राज्यया खँ कनादिल। ल्वय् लाय्के माःपिन्त नं लाय्कादिल।
12 बहनी जुइत्यंगुलिं झिंनिम्ह चेलातय्सं वय्कःयाथाय् वयाः थथे धाल -- “थन ला छुं हे मदु। आः थ्व मनूतय्त थनं छ्वयादिसँ। अले लिक्क लिक्क लाःगु गां गामय् वनाः नयेगु व बाय् च्वनेगु याइ।”
13 वय्कलं धयादिल -- “इमित छिमिसं हे नकि।”
अले इमिसं धाल -- “जिमिके ला न्यापा मरि व निम्ह न्या जक दु। थुलिमछिसित नकेत ला न्याः हे वने मानि का।” 14 अन मिजंत जक हे न्याद्वः दु।
वय्कलं चेलातय्त धयादिल -- “न्ययम्ह न्ययम्ह (५०) यानाः इमित झ्वःलाक फ्यतुकि।” 15 इमिसं वय्कलं धयादी थें मनूतय्त फ्यतुकल। 16 वय्कलं व न्यापा मरि व निम्ह न्या कयाः परमेश्वरयात सुभाय् बियाः कुचा थलाः मनूतय्त इना ब्यु धकाः चेलातय्त बियादिल। 17 अले इमिसं यतले नल। इनाः ल्यंदुगु कुचाकचा जक हे झिंनिगः दाला जाय्क दु।
येशू मुक्ति बीम्ह ख्रीष्ट खः
मत्ती १६:१३-२०; मर्कूस ८:२७-२९
18 छन्हु येशू याकःचा प्रार्थना याना च्वंबलय् चेलात वल। अले वय्कलं इमिके न्यनादिल -- “मनूतय्सं जितः सु धकाः धया जुल?”
19 इमिसं धाल -- “गुलिसिनं बप्तिस्मा बीम्ह यूहन्ना धाइगु, अले गुलिंसिनं एलिया धाइगु, गुलिंसिनं ला न्हापायापिं अगमवक्तात मध्ये सुं छम्ह म्वाना वःगु जुइ धकाः धाइगु।”*९:१९ मत्ती १४:१-२; मर्क ६:१४-१५; लूक ९:७-८
20 अले वय्कलं इमित धयादिल -- “छिमिसं जितः सु खः धयाच्वना लय्?”
पत्रुसं लिसः बिल -- “छि परमेश्वरयाम्ह मुक्ति बीम्ह ख्रीष्ट खः।”*९:२० यूह ६:६८-६९
21 वय्कलं थ्व खँ सुयातं कने मते धकाः कडा आज्ञा बियादिल। 22 हानं धयादिल -- “मनूया काय्नं यक्व हे दुःख सी मानि। थकालिपिं, तःधंपिं पुजाहारीत, व शास्त्रीतय्सं वयात मानय् याइ मखु, बरु वयात स्याइ, स्वन्हु लिपा व हानं म्वाना वइ।”
गथे यानाः येशूया चेला जुइगु
मत्ती १६:२४-२८; मर्कूस ८:३४-३८
23 येशूं फुक्कसितं धयादिल -- “जि नाप वयेगु जूसा छिपिं सुनानं थःगु खँय् छुं हे च्यूताः तये मते। अले थःगु क्रूस थःम्हं हे कुबियाः सीत तकं लिमच्युसे जिगु ल्यू ल्यू वा।*९:२३ मत्ती १०:३८; लूक १४:२७ 24 थःगु प्राण बचय् यायेत जक स्वइम्ह मनू नाश जुया वनी। सुनां जिगु निंतिं थःगु प्राण पाइ व बचय् जुइ।*९:२४ मत्ती १०:३९; लूक १७:३३; यूह १२:२५ 25 सारा संसार हे ल्हातय् दयाः नं व मनू सिना वन धाःसा वयात छु दइ? वं हानं थःगु प्राण छुकिं लिफ्याना काइ? 26 सुनां जि खनाः व जिगु खँ न्यनाः ख्वाः फस्वय्की मनूया काय्नं स्वर्गदूततलिसे झः झः धाय्क परमेश्वर बाःनं छ्वया हइबलय् व खनाः नं ख्वाः फस्वय्की। 27 जिं छिमित धात्थें धाये -- परमेश्वरयागु राज्य मखंतले थन दुपिं मध्ये गुम्हं गुम्हं ला सी तकं मखुनि।”
येशूयागु रूप ह्यूगु
मत्ती १७:१-८; मर्कूस ९:२-८
28 अथे धयादीगु च्यान्हु दय्काः पत्रुस, यूहन्ना व याकूबयात ब्वनाः येशू पर्वतया च्वय् प्रार्थना याः झाल। 29 प्रार्थना याना च्वनादीबलय् वय्कःयागु ख्वाः तसकं थिना वल, अले वय्कलं पुना तःगु वसः नं तसकं यचुसे त्वइसे च्वना वल। 30 अबलय् मोशा व एलिया, थुपिं निम्ह वय्कः नाप खँ ल्हानाच्वन। 31 इपिं नं स्वर्गयागु जलं तसकं झल झल थीक खने दयाच्वन। यरूशलेमय् येशू गथे जुयाः सी माली धकाः इपिं वय्कः नाप खँ ल्हानाच्वंगु खः।
32 अबलय् पत्रुस व वनाप दुपिं फुक्कं मस्तं न्ह्यः वय्काच्वन। न्ह्यलं चाःबलय् इमिसं वय्कः झल्ल थिनाच्वंगु व वय्कःनाप मेपिं निम्ह मनूतय्त नं खन। 33 इपिं वय्कःनाप बाया वने त्यंबलय् लाक्क पत्रुसं वय्कःयात धाल -- “गुरूजु, झीपिं थन हे च्वने दत धाःसा गुलि बांलाइ। जिमिसं स्वंगू बल्चा दय्के ला? छगू छितः, छगू मोशायात व मेगु छगू एलियायात।” पत्रुसं व धाये थ्व धाये मसियाः अथे धाःगु खः। 34 वं अथे जक छु धाये लात सुपाँय् वयाः इमित त्वपुल। सुपाँचं अथे त्वपू वःगु खनाः इपिं ग्यात।
35 अले सुपाँचं थथे धकाः न्ववाना हल -- “थ्व जिं ल्यया तयाम्ह जिम्ह काय् खः, थ्वयागु खँ न्यँ।”*९:२८-३५ २ पत्र १:१७-१८*९:३५ यशै ४२:१; मत्ती ३:१७; १२:१८; मर्क १:११; लूक ३:२२ 36 अनंलि इमिसं अन येशू याकःचा जक खन। इमिसं थ्व खँ सुयातं मकंसे थःथःगु नुगलय् तयातल।
भूत दुब्यूम्ह मचायात लाय्कादीगु
मत्ती १७:१४-१८; मर्कूस ९:१४-२७
37 कन्हय् खुन्हु वय्कःपिं पर्वतं क्वहां झाःबलय् मनूत वय्कःयात नाप लाः वल। 38 हुलं छम्ह मनू चिच्याय्दनाः हाला हल -- “गुरूजु, जिमि काय्यात छकः स्वयादिसँ। जि थ्व हे छम्ह जक काय् दु। 39 झाःझाः थ्वयात भूत आत्मां त्वपू वइगु, अले थ्व चिल्लाय् दनाः चत्ताः वाःवनिगु। अले म्हुतुं ई बुल्ल बुल्ल वय्काहइगु। तसकं घाःपाः मजुतले भूतं थ्वयात त्वःती हे मखु। 40 जिं छिकपिनि चेलातय्त भूत आत्मायात पितिना बियादिसँ धकाः धयां इमिसं पितिना छ्वये मफुत।”
41 अले वय्कलं चेलातय्त धयादिल -- “छिमिसं गथे जक विश्वास याये मफुगु? जि छिपिं नाप ग्वःन्हु हे च्वनी धकाः? जिं छिमिगु निंतिं गुलि जक दुःख सह यानाच्वनेगु?” अले वय्कलं व मनूयात धयादिल। “छिमि काय्यात थन हजि।”
42 मचायात हहं हे भूतं वयात कसाः यानाः छ्वावात। अले वय्कलं भूत आत्मायात हक्कादिल। थुकथं मचायात लाय्काः वया अबुयात लःल्हानादिल। 43 अन च्वंपिं फुक्क परमेश्वरयागु तःधंगु शक्ति खनाः अजूचाल।
येशूं हानं थः सीगु खँ कनादीगु
मत्ती १७:२२-२३; मर्कूस ९:३०-३२
वय्कलं यानादीगु ज्या खनाः मनूत अजूचाया च्वंबलय् हे वय्कलं चेलातय्त धयादिल -- 44 “जिगु थ्व खँ बांलाक न्यना ति। मनूया काय्यात ज्वनाः मनूतय्गु ल्हातय् लःल्हाइगु ई वइन।” 45 वय्कलं अथे धयादीगु इमिसं थुइके मफुत। थुइके मफयेमा धकाः हे थ्व खँ त्वपुया तःगु खः। अय्नं इमिसं वय्कःयाके थ्व खँ न्यनेत ग्यात।
दकलय् तःधंम्ह सु?
मत्ती १८:१-५; मर्कूस ९:३३-३७
46 चेलातय् थःपिं मध्ये सु दकलय् तःधं धकाः खँ जुल।*९:४६ लूक २२:२४ 47 इमिगु मनय् च्वंगु खँ सीकाः येशूं छम्ह मचायात हयाः थःगु लिक्क फ्यतुकाः 48 इमित धयादिल -- “सुनां जिगु नामय् थज्याःम्ह मचायात दुकाइ, वं जितः हे दुकाःगुति ग्यनी। अथे हे सुनां जितः दुकाइ, जितः छ्वया हया दीम्हय्सित हे दुकाःगुति ग्यनी। अय्जूगुलिं छिपिं मध्ये सु दकलय् चिधंम्ह खः, व हे दकलय् तःधंम्ह खः।”*९:४८ मत्ती १०:४०; लूक १०:१६; यूह १३:२०
सु झी शत्रु मखु व झीम्ह हे मनू खः
मर्कूस ९:३८-४०
49 यूहन्नां येशूयात धाल -- “गुरूजु, जिमिसं छिगु नामं भूत ख्याना च्वंम्ह छम्ह मनूयात खना। जिमिसं वयात अथे याये मते धकाः धया, छाय्धाःसा व झीपिंलिसे जुयाच्वंम्ह मखु।”
50 थ्व खँ न्यनाः वय्कलं वयात लिसः बियादिल -- “सु झी शत्रु मखु व झीम्ह हे मनू खः, उकिं वयात पने मते।”
51 स्वर्गय् वनेगु ई त्यःगुलिं येशू यरूशलेमपाखे वनेगु क्वःछिनादिल। 52 वय्कलं थःपिं स्वयाः न्ह्यः हे सुं मनूतय्त छ्वयादिल। इमिसं सामरीतय्गु गामय् वनाः वय्कःपिन्त थाय्बाय् माल। 53 वय्कःपिं यरूशलेमय् वनेत वःपिं धकाः स्यूगुलिं सामरीतय्सं वय्कःपिन्त बाय् मब्यू। 54 थ्व खनाः याकूब व यूहन्नां वय्कःयात धाल -- “प्रभु, जिमिसं स्वर्गं मि गाय्काः थुमित भस्म यानाबी ला?”*९:५४ २ राज १:९-१६ 55 वय्कलं इमित ब्वः बियादिल। 56 अले वय्कःपिं मेगु हे गामय् झाल।
येशूया चेला जुइपिं मनूत
मत्ती ८:१९-२२
57 वय्कःपिं लँय् झाया च्वंबलय् छम्ह मनुखं वयाः येशूयात थथे धाल -- “गुरूजु, छि गन गन झाइ, जि नं ल्यू ल्यू वये।”
58 वय्कलं धयादिल -- “ध्वंतय् च्वनेत प्वाः दु, झंगःतय् च्वनेत स्वँ दु, मनूया काय्या धाःसा छ्यं दिकेत नं थाय् मदु।”
59 वय्कलं मेम्ह मनूयात धयादिल -- “जि नाप झासँ।”
वं थथे धाल -- “प्रभु, जितः जिमि अबुयागु सीम्ह निं थुने बियादिसँ।”
60 अले वय्कलं लिसः बियादिल -- “सीम्हयात सीम्हय्सिनं हे थुनी। छि वनाः परमेश्वरयागु राज्ययागु खँ न्यंकादिसँ।”
61 मेम्ह मनुखं धाल -- “प्रभु, जि नं छि नाप वये। छेँय् छकः वनाः छेँय् च्वंपिन्त ‘वने’ धया वये।”*९:६१ १ राज १९:२०
62 वय्कलं वयात धयादिल -- “हलो जोतय् यायां लिफः स्वया च्वनिम्ह मनू परमेश्वरया राज्ययागु ज्या यायेत मल्वः।”
*9:5 ९:३-५ लूक १०:४-११; प्रे १३:५१
*9:8 ९:७-८ मत्ती १६:१४; मर्क ८:२८; लूक ९:१९
*9:19 ९:१९ मत्ती १४:१-२; मर्क ६:१४-१५; लूक ९:७-८
*9:20 ९:२० यूह ६:६८-६९
*9:23 ९:२३ मत्ती १०:३८; लूक १४:२७
*9:24 ९:२४ मत्ती १०:३९; लूक १७:३३; यूह १२:२५
*9:35 ९:२८-३५ २ पत्र १:१७-१८
*9:35 ९:३५ यशै ४२:१; मत्ती ३:१७; १२:१८; मर्क १:११; लूक ३:२२
*9:46 ९:४६ लूक २२:२४
*9:48 ९:४८ मत्ती १०:४०; लूक १०:१६; यूह १३:२०
*9:54 ९:५४ २ राज १:९-१६
*9:61 ९:६१ १ राज १९:२०