9
पक्षवातं कःम्ह मनूयात लाय्कादीगु
मर्कूस २:१-१२; लूका ५:१७-२६
1 येशू अनं नांचाय् च्वनाः समुद्र पारि तुं थःगु शहरय् लिहां झाल। 2 मनूतय्सं वय्कःया थाय् छम्ह पक्षवातं कःम्ह मनूयात लासां नापं हल। इमिगु थज्याःगु विश्वास खनाः वय्कलं धयादिल “बाबु, ग्याये मते, छं याःगु पाप क्षमा जुल।”
3 थ्व न्यनाः अन च्वंपिं शास्त्रीत थःथवय् थथे खँ ल्हात -- “थ्व मनुखं ला परमेश्वरयात क्वह्यंकाच्वन।”
4 इमिगु मनय् च्वंगु खँ सीकाः वय्कलं थथे धयादिल -- “छिमिसं छाय् मभिंगु खँ मतिइ तया जुयागु? 5 ‘छंगु पाप क्षमा जुल’ धायेगु अःपु ला कि ‘दनाः न्यासि हुँ’ धायेगु अःपु? 6 संसारय् च्वंपिनिगु पाप क्षमा यानाबीत मनूया काय्याके अधिकार दु धयागु खँ छिमिसं सीकि।” अले वय्कलं व पक्षवातं कःम्ह मनूयात थथे धयादिल -- “दनाः थःगु लासा ज्वनाः छेँय् झासँ।”
7 थुलि धायेवं हे व पक्षवातं कःम्ह मनू दनाः थःगु छेँय् वन। 8 थ्व खनाः अन च्वंपिं मनूत ग्यात। अले मनूतय्त परमेश्वरं थज्याःगु अधिकार बियादीगुलिं इमिसं परमेश्वरयात तःधंकल।
येशूं मत्तीयात सःतादीगु
मर्कूस २:१३-१७; लूका ५:२७-३२
9 येशू अनं मेथाय् झायाच्वनादीबलय् मत्ती धयाम्ह छम्ह मनूयात कर कायेगु अड्डाय् च्वनाच्वंगु खन। अले वय्कलं वयात सःतादिल -- “जि नाप झासँ।” अले व दनाः वय्कः नाप वन।
10 छन्हु वय्कः मत्तीयागु छेँय् पाहां जुयाच्वंबलय् कर काइपिं मनूत व पापी मनूत नं वयाः वय्कः व वय्कःया चेलात नाप फ्यतुनाः भ्वय् नल।*९:१० लूक १५:१-२ 11 थ्व खनाः फरिसीतय्सं वय्कःया चेलातय्त धाल -- “छु खः ले? छिमि गुरू ला कर काइपिं व पापीत नाप च्वनाः नया च्वन नि?”
12 इमिसं थथे धाःगु तायाः वय्कलं इमित लिसः बियादिल -- “छुं मजूपिं मनूतय्त डाक्टर माली मखु, ल्वय् दुपिन्त जक माली। 13 थ्व छु धाःगु खः वनाः बांलाक सीकि -- ‘जितः बलि बीहःगु मयः, बरु जितः माःगु ला दया माया खः’ छाय्धाःसा ‘जि धर्मी’ धकाः धया जुइपिन्त मखु, बरु पापीतय्त सःतः वयागु खः।”*९:१३ मत्ती १२:७; होशे ६:६
अपसं च्वनेगु खँ
मर्कूस २:१८-२२; लूका ५:३३-३९
14 छन्हु बप्तिस्मा बीम्ह यूहन्नाया चेलातय्सं वयाः येशूयाके थथे धकाः न्यन -- “जिपिं व फरिसीत न्ह्याबलें अपसं च्वना, छिकपिनि चेलात जक छाय् अपसं मच्वंगु?”
15 वय्कलं इमित लिसः बियादिल -- “जिलाजं जुइम्ह नापं दतले जन्त वःपिन्सं नुगः मछिंकी ला? अय्नं छन्हु ब्याहा याइम्ह मनूयात लिगनाः यनीतिनि। अले जक इपिं अपसं च्वनी।
16 “पुलांगु वसतय् सुनानं न्हूगु कापतं पर्की मखु, छाय्धाःसा पुलांगु वसतय् न्हूगु कापतं पर्कल कि झन जक बांमलाक तःकू जुइक गुना वनी।
17 “अथे हे सुनानं पुलांगु छेंगूयागु म्हिचाय् दाखरस तइ मखु, छाय्धाःसा पुलांगु छेंगूयागु म्हिचाय् दाखरस तल धाःसा म्हिचा हे गुना वनी। अले दाखरस नं वाइ, म्हिचा नं स्यनी। थथे मयासे बरु दाखरस न्हूगु म्हिचाय् तल धाःसा नितां बचय् जुइ।”
सीम्ह मचा व मफुम्ह मिसा
मर्कूस ५:२१-४३; लूका ८:४०-५६
18 येशूं इमित थथे धयाच्वनादीबलय् हे धर्मशास्त्र स्यनिगु छेँया छम्ह थकालिं वयाः वय्कःयात भागि यानाः थथे धाल -- “जिमि म्ह्याय् नकतिनि हे जक सित। छिं झायाः ल्हातं जक थियादीसां जिमि म्ह्याय् म्वाना वइ।”
19 अले वय्कः दनाः व नाप झाल। चेलात नं वय्कः नाप वन। 20 वय्कःपिं लँय् झायाच्वंबलय् झिंनिदंनिसें हि क्वहां वइगु ल्वचं थिया च्वंम्ह छम्ह मिसां ल्यूनें वयाः वय्कःयागु गाच्वः थिल। 21 “वय्कःयागु गाच्वः जक थी फत धाःसा जिगु ल्वय् लाया वनी” धकाः वं मतिइ तःगु खः।
22 अले वय्कः फहिलादिल। व मिसायात खनाः वय्कलं धयादिल -- “केहेँ मय्जु, ग्यानादी मते। छिं विश्वास याःगुलिं छिगु ल्वय् लन।” अबलय् हे व मिसायागु ल्वय् लन।
23 अनंलि वय्कः थकालियागु छेँय् झाल। अन सी बाजं थानाच्वंपिं व ख्वया च्वंपिं मनूत खनाः 24 वय्कलं धयादिल -- “छिपिं फुक्कं पिने हुँ। मचा मसीनि। द्यना जक च्वंगु खः।” वय्कलं थथे धयादीगुलिं इमिसं वय्कःयात हिस्यात। 25 मनूतय्त पिछ्वयादी धुंकाः वय्कलं दुहां झायाः मचायात ल्हातं ज्वनाः थनादिल। अले व मचा दना वल। 26 थ्व खँ दे न्यंक बय्बय् जुल।
निम्ह कांयात व छम्ह लातायात लाय्कादीगु
27 येशू अनं झाःबलय् निम्ह कांपिं वय्कःया ल्यू ल्यू वनाः थथे धकाः चिल्लाय् दनाः हाल -- “हे दाऊदया काय्, जिमित दया यानादिसँ।”
28 वय्कः छेँ थ्यने धुंकाः इपिं नं वय्कःयाथाय् वल। अले वय्कलं इमिके न्यनादिल -- “जिं छिमित लाय्काबी फु धकाः छिमित विश्वास दु ला?”
अले इमिसं लिसः बिल -- “दु, प्रभु।”
29 अले वय्कलं इमिगु मिखा थियाः धयादिल -- “छिमिसं विश्वास याःथें छिमिगु मिखा लना वनेमा।” 30 अले इमिसं मिखां खन। वय्कलं इमित थथे धयादिल -- “थ्व खँ सुयातं कने मते।” 31 अय्नं इमिसं वनाः थ्व खँ दे न्यंक बय्बय् याना बिल।
32 वय्कःपिं अनं झाःबलय् लँय् मनूतय्सं भूत दुबिना च्वंम्ह छम्ह लातायात वय्कःयाथाय् हल। 33 भूतयात पितिनेवं व मनुखं नवाना हल। अले स्वया च्वंपिं मनूतय्सं छक्क जुयाः थथे धाल -- “थथे ला जिमिसं इस्राएलय् गुब्सं मखनानि।”
34 फरिसीतय्सं धाःसा थथे धाल -- “थ्व मनूयात भूततय् जुजुं हे भूत पितिनेगु शक्ति ब्यूगु खः।”*९:३४ मत्ती १०:२५; १२:२४; मर्क ३:२२; लूक ११:१५
येशूं मनूतय्त माया यानादीगु
मर्कूस ६:३४; लूका १०:२
35 थुकथं येशूं शहरय् व गां गामय् चाःहिलाः धर्मशास्त्र स्यनिगु छेँय् झायाः स्यनेकने यायां परमेश्वरयागु राज्ययागु भिंगु खँ न्यंकादिल। अले तःतामछि ल्वय् दुपिं मनूतय्त नं लाय्कादिल।*९:३५ मत्ती ४:२३; मर्क १:३९; लूक ४:४४ 36 मनूतय्गु हुलयात खनाः वय्कःयात माया वन, छाय्धाःसा इपिं जवाः मदुपिं फैचात थें हाःनाः मदयाः उखे लाः थुखे लाः मदया च्वन।*९:३६ गन्ती २७:१७; १ राज २२:१७; २ इति १८:१६; इज ३४:५; मर्क ६:३४ 37 अले वय्कलं चेलातय्त धयादिल -- “बालि लयेगु ला यक्व हे दु, बालि लइपिं धाःसा म्हो जक दु। 38 अय्जूगुलिं बालि थुवाःयात बालि लइपिं छ्वया हयादिसँ धकाः प्रार्थना या।”*९:३७-३८ लूक १०:२