16
अजूचायापुगु चिं क्यनेगु इनाप
मर्कूस ८:११-१३; लूका १२:५४-५६
1 छन्हु सुं फरिसीत व शास्त्रीत येशूयात जाँचय् यायेत वल। अले इमिसं वय्कःयात परमेश्वरं छ्वया हयादीगु खःसा छगू अजूचायापुगु चिं यानाः क्यनादिसँ धकाः धाल।*१६:१ मत्ती १२:३८; लूक ११:१६
2 वय्कलं लिसः बियादिल -- “निभाः बीबलय् आकाश ह्याउँसे च्वन कि छिमिसं ‘कन्हय् न्हि बांलाइ’ धकाः धाइ। 3 अथे हे सुथय् आकाश खिउँसे च्वन कि छिमिसं ‘ग्वःफय् वइ’ धकाः धाइ। छिमिसं आकाशयात स्वयाः न्हि बांलाइ, बांमलाइ धकाः धाये फु धाःसा थ्व ईयागु चिं जक थुइका काये मफु ला? 4 थौंकन्हय्यापिं मनूत गुलि जक मभिना वःगु, अले परमेश्वरयात विश्वास यायेगु त्वःता हःगु। थज्याःपिन्सं अजूचायापुगु चिं स्वयेत धयाच्वन। अहं, छिमित अगमवक्ता योनां क्यनावंगु चिं सिबय् मेगु छुं हे चिं क्यनी मखु।” अले वय्कः अनं झाल।*१६:४ मत्ती १२:३९; लूक ११:२९
फरिसी व सदुकीतय्गु सोडा
मर्कूस ८:१४-२१
5 समुद्र पारिइ थ्यंकाः चेलातय्सं मरि हये ल्वःमंकल। 6 येशूं इमित धयादिल -- “बांलाक होश या, फरिसीत व सदुकीतय्गु सोडा पाखें बचय् जुया च्वँ।”*१६:६ लूक १२:१
7 अले इमिसं थःथवय् थथे खँ ल्हात -- “झीसं मरि हये ल्वःमंगुलिं वय्कलं थथे धयादीगु जुइ।” 8 थ्व सियाः वय्कलं इमित धयादिल -- “छिपिं छाय् मरि हये ल्वःमन धकाः हालाच्वनागु? छिमिगु विश्वास गन वन? 9 छिमिसं अज्ज नं मथूनि ला? न्याद्वः मनूतय्त न्यापा मरि इनाः नकागु ल्वःमन ला? अले छिमिसं कुचा काचा जक ग्वःगः दालाय् मुंका?*१६:९ मत्ती १४:१७-२१ 10 अले प्यद्वः मनूतय्त न्हय्पा मरि इनाः नकागु नं ल्वःमन ला? उबलय् छिमिसं ग्वःगः खःमुलि मुंका?*१६:१० मत्ती १५:३४-३८ 11 जिं मरियागु खँ धयाच्वनागु मखु, बरु फरिसी व सदुकीतय्गु सोडा पाखें बचय् जुया च्वँ धकाः धयागु खः। छिमिसं गथे मथूगु?”
12 अले तिनि इमिसं वय्कलं सोडा पाखें बचय् जुया च्वँ धयादीगु मखु, बरु फरिसीत व सदुकीतय्सं स्यनेकने याइगु खं बचय् जुया च्वँ धयादीगु खः धकाः थुइकल।
पत्रुसं येशूयात म्हसीकूगु
मर्कूस ८:२७-३०; लूका ९:१८-२१
13 येशूं कैसरिया फिलिप्पी शहरया लिक्क थ्यंबलय् चेलातय्त थथे धकाः न्यनादिल -- “मनूया काय्यात मनूतय्सं सु धकाः धया जुल?”
14 इमिसं लिसः बिल -- “गुलिसिनं बप्तिस्मा बीम्ह यूहन्ना, गुलिसिनं एलिया, गुलिसिनं ला यर्मिया, अले गुलिसिनं मेम्ह हे अगमवक्ता जुइ धकाः धाइगु।”*१६:१४ मत्ती १४:१-२; मर्क ६:१४-१५; लूक ९:७-८
15 अले वय्कलं इमिके न्यनादिल -- “छिमिसं जितः सु धकाः धयाच्वना लय्?”
16 सिमोन पत्रुसं लिसः बिल -- “छि म्वाःम्ह परमेश्वरया काय्, मुक्ति बीम्ह ख्रीष्ट खः।”*१६:१६ यूह ६:६८-६९
17 वय्कलं वयात धयादिल -- “योनाया काय् सिमोन, छ धन्य खः, छाय्धाःसा छं थ्व खँ मनूतय् पाखें सय्काः धाःगु मखु, बरु स्वर्गय् च्वनादीम्ह जिमि बाःनं हे छन्त थ्व खँ धाय्कादीगु खः। 18 अथेजूगुलिं जिं छन्त धाये -- छ धात्थें हे पत्रुस -- ल्वहं -- खः। जिं थ्व हे ल्वहँतय् थःगु मण्डली†१६:१८ ग्रीक भाषां एकलेसिया दय्के। अले शैतानं तकं थ्व मण्डलीयात बुके फइ मखु। 19 जिं छन्त स्वर्गया राज्ययागु ताःचा बी। छं पृथ्वीइ पना तःगुयात स्वर्गय् नं पना तइ, अले छं पृथ्वीइ त्वःता तःगुयात स्वर्गय् नं त्वःता तइ।”*१६:१९ मत्ती १८:१८; यूह २०:२३
20 थुलि धयादी धुंकाः वय्कलं चेलातय्त वय्कः हे मुक्ति बीम्ह ख्रीष्ट खः धयागु खँ सुयातं कने मते धकाः उजं बियादिल।
येशूं थः सीगु खँ कनादीगु
मर्कूस ८:३१-३३; लूका ९:२२
21 उबलय् निसें येशूं चेलातय्त ध्वाथुइक धयादीगु यानादिल -- “यरूशलेमय् वनाः जिं थकालिपिं, तःधंपिं पुजाहारीत व शास्त्रीतय्गु ल्हातं दुःखकष्ट फये मानि। लिपा इमिसं जितः स्याना छ्वइ। अले स्वन्हु लिपा जि हानं म्वाना वये।”
22 थ्व न्यनाः पत्रुसं वय्कःयात छखे यंकाः ब्वः बियाः थथे धाल -- “परमेश्वरं थथे याकादी मखु, प्रभु। थथे ला छितः गुबलें हे जुइ मखु।”
23 वय्कलं लिफः स्वयाः पत्रुसयात धयादिल -- “शैतान, छ जिथाय् च्वने मते। छं ला जिगु ज्या हे पनेत स्वयाच्वन। छं ला परमेश्वरयागु मखु, बरु मनूतय्गु खँय् जक ध्यान बियाच्वन।”
गथे यानाः येशूया चेला जुइगु
मर्कूस ८:३४-३८; लूका ९:२३-२७
24 अले वय्कलं चेलातय्त धयादिल -- “जि नाप वयेगु जूसा छिपिं सुनानं थःगु खँय् छुं हे च्यूताः तये मते। अले थःगु क्रूस थःम्हं हे कुबियाः सीत तकं लिमच्युसे जिगु ल्यू ल्यू वा।*१६:२४ मत्ती १०:३८; लूक १४:२७ 25 थःगु प्राण बचय् यायेत जक स्वइम्ह मनू नाश जुया वनी। सुनां जिगु निंतिं थःगु प्राण पाइ व बचय् जुइ।*१६:२५ मत्ती १०:३९; लूक १७:३३; यूह १२:२५ 26 सारा संसार हे ल्हातय् दयाः नं व मनू सिनावन धाःसा वयात छु दइ? वं हानं थःगु प्राण छुकिं लिफ्याना काइ? 27 आः याकनं हे परमेश्वरं मनूया काय्यात झः झः धाय्क स्वर्गदूतत नाप छ्वया हयादी। अले वय्कलं छम्ह छम्ह मनूयात इमिगु ज्या स्वयाः सिरपाः बियादी।*१६:२७ मत्ती २५:३१; भज ६२:१२; रोम २:५ 28 जिं छिमित खःगु खँ धाये -- थन दना च्वंपिं मध्ये गुम्हं गुम्हं मनूत मनूया काय् जुजु जुयाः थःगु राज्यय् वःगु मखंतले ला सी तकं मखुनि।”
*16:1 १६:१ मत्ती १२:३८; लूक ११:१६
*16:4 १६:४ मत्ती १२:३९; लूक ११:२९
*16:6 १६:६ लूक १२:१
*16:9 १६:९ मत्ती १४:१७-२१
*16:10 १६:१० मत्ती १५:३४-३८
*16:14 १६:१४ मत्ती १४:१-२; मर्क ६:१४-१५; लूक ९:७-८
*16:16 १६:१६ यूह ६:६८-६९
†16:18 १६:१८ ग्रीक भाषां एकलेसिया
*16:19 १६:१९ मत्ती १८:१८; यूह २०:२३
*16:24 १६:२४ मत्ती १०:३८; लूक १४:२७
*16:25 १६:२५ मत्ती १०:३९; लूक १७:३३; यूह १२:२५
*16:27 १६:२७ मत्ती २५:३१; भज ६२:१२; रोम २:५