नहेम्याहया सफू
म्हसीका
थ्व सफू नहेम्याह धाःम्ह छम्ह मग्याःम्ह व साहसी मनुखं च्वःगु खः। नहेम्याह बेबिलोनीतय्सं यरूशलेमं ज्वनाहःम्ह छम्ह यहूदी खः। व परमेश्वरयात यक्व प्रार्थना याइम्ह मनू खः। व अर्तासास्त जुजुयात दाखमद्य बीम्ह मनू खः, थ्व छगू तःधंगु पद खः। थ्व तःधंगु पदय् च्वनाः याउँक जीवन हनाच्वंगु जूसां व यरूशलेमया पखाःत दुंगु व ध्वाखात मिछ्वःगु खबर न्यनाः दुःखी जुल। अले जुजुयाके अनुमति कयाः व यरूशलेमय् लिहां वल। थ्व सफुलिइ यरूशलेमया पखाः दुंगुया बारे बांलाक च्वयातःगु दु। थ्व सफुलिइ दुगु घटनात ई.पु. ४४५ निसें ई.पु. ४३३ या दथुइया खः। नहेम्याहं परमेश्वरयात याःगु तःधंगु विश्वास व मदिक्क याःगु प्रार्थना थ्व सफूया लुमंके बहःगु खँ खः।
नहेम्याहया सफूयात स्वब्व यायेफु,
१. फारसयाम्ह जुजुं यहूदायाम्ह राज्यपाल दय्कूम्ह नहेम्याह नायः जुयाः यरूशलेमया पखाः हाकनं दय्कूगु खँ। थ्व बाहेक नहेम्याहं छुं धार्मिक व सामाजिक सुधार नं हइ।
२. एज्रां मनूतय्त परमेश्वरया व्यवस्था बांलाक ब्वनाः न्यंकूगु अले मनूतय्सं थःगु पाप मानय् याःगु।
३. यहूदायाम्ह राज्यपाल जुयाः नहेम्याहं याःगु मेमेगु ज्या।
धलः पौ
नहेम्याह यरूशलेमय् लिहांवःगु १:१–२:२०
यरूशलेमयया पखाः हाकनं दय्कूगु ३:१–७:७३
व्यवस्था ब्वंगु व बाचायात न्हूधाः याःगु ८:१–१०:३१
नहेम्याहया मेमेगु ज्या ११:१–१३:३१
नहेम्याह
1
यरूशलेमया निंतिं नहेम्याहया चिउताः
1 हकल्याहया काय् नहेम्याहया ज्याखँ–
अर्तासास्त फारस देशयाम्ह जुजु जूगु निइगूगु दँया किसलेव लाय्*१:१ निइगूगु दँया किसलेव ला नोभेम्बर-डिसेम्बर ४४५ बी.सी. खः। जि शूशनया किल्लाय् दुबलय् 2 जिमि छम्ह किजा हनानी छपुचः मनूतलिसें यहूदां थ्यंकः वल। जिं यरूशलेमया बारे व बेबिलोनय् ज्वनायंकूगु पाखें बचय्जूपिं मेपिं यहूदीतय्गु बारे इमिके न्यना।
3 इमिसं जितः धाल, “लिहांवःपिं यहूदीतय्त थाकुयाच्वंगु दु। जःखः च्वंपि बिदेशीतय्सं इमित हेपय् याइगु, यरूशलेमया पखाः आः तक नं दुनाच्वंगु दु अले उकिया ध्वाखा मिं नयाः नाश जुइ धुंकल।”
4 व खँ न्यनेवं जि फ्यतुनाः ख्वया। तःन्हु तक जि नुगः मछिंकाच्वना। जिं छुं नं मनया, जिं स्वर्गयाम्ह परमेश्वरयात प्रार्थना याना।
नहेम्याहया प्रार्थना
5 “हे परमप्रभु स्वर्गयाम्ह परमेश्वर, तःधंम्ह व मानय् यायेमाःम्ह! छि थःगु खँ न्यनीपिं व थःत माया याइपिं मनूतलिसें दयामायाया बाचा पूवंकादीम्ह खः। 6 छिकपिनि दास इस्राएलीतय्गु निंतिं चान्हि छितः यानागु प्रार्थना न्यनेत छिं न्हाय्पं बियादिसँ, अले मिखा चाय्कादिसँ। जिपिं इस्राएलीतय्सं छिगु विरोधय् यानागु पाप जिं मानय् याये। जिमि पुर्खातय्सं पापयात जिं नं पाप यानागु दु। 7 छिं थः दास मोशापाखें बियादीगु आज्ञा, विधि व नियम मानय् मयानाः जिमिसं छिगु न्ह्यःने तःधंगु अपराध यानागु दु।
8 “छिं मोशायात धयादीगु थ्व खँ लुमंकादिसँ, ‘छिपिं इस्राएलयापिं मनूत विश्वास मदुपिं जुल धाःसा जिं छिमित जाति जातितय्गु दथुइ छ्यालब्याल यानाबी।✡१:८ लेवी २६:३३ 9 अय्नं छिपिं जिथाय् लिहां वल धाःसा अले छिमिसं जिगु खँ न्यन धाःसा जिं छिमित थःगु नां तयेत ल्ययागु थासय् लित हये। तापाःगु देशय् वंगु दुसां जिं छिमित लित हये।’ ✡१:९ व्य ३०:१-५
10 “छिं थःगु तःधंगु शक्तिं व बल्लाःगु ल्हातं बचय् यानादीपिं इपिं छि दासत व छि थः मनूत खः। 11 हे परमप्रभु, जिगु व छिगु नांयात हनाबना यायेत लय्ताइपिं छि दासतय्गु प्रार्थना न्यनादिसँ। थौं हे छिकपिनि थ्व दासयागु ज्या ताःलाकादिसँ। छिं जुजुयात जितः माया याइम्ह दय्कादिसँ।”
उबलय् जि जुजुयात दाखमद्य बीपिनि नायः खः।