गन्तीया सफू
म्हसीका
गन्तीया सफुलिइ इस्राएलीत सीनै पर्वतं वनाः परमेश्वरं बी धयातःगु देशया लागाय् मथ्यंतले पिइदँयागु खँ दु। थ्व सफूया नामं हे थ्व सफू छुकियागु बारे खः धकाः सी दु। सीनै पर्वतय् च्वंगु दच्छि दये धुंकाः खलः परमेश्वरं अब्राहामयात वया सन्तानत च्वनेत बाचा यानातःगु देशय् वनेत तयार जुल।
सीनै पर्वत त्वःते न्ह्यः मोशां इस्राएलीतय्गु ल्याःचाः काःगु व अनं लिपा, छगू पुस्ता लिपा हाकनं यर्दनया पुर्बय् लाःगु मोआबया ख्यलय् मनूत ल्याः खाःगु खँ थुकी दु। थुकथं न्हापांगु व लिपांगु ल्याःचाः काःगुया दथुइया ई दुने इस्राएलीत कनानया दच्छिनया लागाय् लाःगु कादेश-बर्ने थ्यंकः वन। अय्नं इपिं अनं बी धयातःगु देशय् दुहां वने मफुत। इपिं अन छुं दँ च्वनाः यर्दन खुसिया पुर्बपाखे च्वंगु थासय् वन। इपिं मध्ये निगू व बागू कुलयापिं मनूत अन हे च्वन। अले गुंगू व बागू कुलयापिं मनूत यर्दन खुसि छिनाः कनानय् वनेगु कुतः यात।
पुजाहारीतय्सं नापलायेगु पाल सारे यायेगु व ल्ह्वना यंकेगु ज्यानापं यक्व ज्यात यायेमाःगु दु। नापलायेगु पालयात बांलाक सुरक्षा याये फयेमाः धकाः उलिमछि मनूत न्यासि वनेगु झ्वः बांलाक योजना यानाः दय्कूगु खः। फुक्क कुलया नायःतय्सं बाचा चिनातःगु देशय् चिवा काये धुंकाः अले फुक्क मनूत व देशय् वये धुंकाः यात्रा क्वचाय्केमाःगु खः। अय्नं इमिगु अविश्वास व विद्रोहया हुनिं परमेश्वरं इमित पिइदँ तक मरुभूमिइ हे च्वनेबियादिल अले यात्रा याकेबियादिल। अय्नं इमिसं अविश्वास व कचकच याःसां नं परमेश्वरं थः मनूतय्त माया यानादिल अले इमित रक्षा यानादिल। परमेश्वरं इमित नयेगु नसा बियादिल। व दँया लिपांगु इलय् तक मिश्र त्वःतावःपिं मनूतय्गु पुस्ता सी धुंकूगु खः। यर्दनया पुर्बपाखेया देशत त्याकाः निगूगु पुस्ता मोआबया ख्यलय् थ्यंकः वल।
गन्तीया सफू लुमधंपिं, थाकुगु इलय् लिचिलिपिं, परमेश्वर व परमेश्वरं थःपिनि नायःकथं ल्ययातःम्ह मोशाया विरोधय् वंपिं इस्राएलीतय्गु धात्थेंया खँ खः। परमेश्वरयागु विश्वास व वय्कलं थः मनूतय्सं न्ह्याक्व हे विश्वास मयाःसां, इमिके न्ह्याक्व हे कमजोरी दःसां इमिगु बिचाः यानादी धयागु खँ थ्व सफुलिइ च्वयातःगु दु। अले गुबलें गुबलें मोशा आय् बुइकीबलय् परमेश्वरं वयात बल्लाका ब्यूगु खँ नं थुकी दु।
धलः पौ
इस्राएलीत सीनै पर्वतं वनेत तयार जूगु
१. दकलय् न्हापा मनूत ल्याः खाःगु १:१–४:४९
२. थीथी नियम व विधि ५:१–८:२६
३. निक्वःगु छुत्काराया नखः ९:१–१०:१०
सीनै पर्वतं मोआब तक १०:११–२१:३५
मोआबय् जूगु थीथी घटना २२:१–३२:४२
मिश्र देशंनिसें मोआब तकया यात्राया खँ ३३:१-४९
यर्दन खुसि छी न्ह्यः स्यनेकने याःगु ३३:५०–३६:१३
गन्ती
सीनैया मरुभूमिं पिहां वनेत तयार जूगु
1
गन्ती १:१–१०:१०
दकलय् न्हापा मनूत ल्याः खाःगु
1 इस्राएलीत मिश्र देशं पिहां वंगु निगूगु दँया निगूगु लाया न्हापांगु दिंखुन्हु सीनैया मरुभूमिइ पवित्र पालय् परमप्रभुं मोशायात धयादिल,✡१:१-४६ गन्ती २६:१-५१ 2 “इस्राएलया फुक्क खलःयात वंश व परिवारकथं ल्याःखा। छम्ह छम्ह मिजंतय्गु नां धलः दय्कि। 3 छ व हारूनं निइदँ व वस्वयां च्वय्यापिं लडाइँलय् वनेफुपिं मिजंतय्त पुचः पुचःकथं ल्याःखा। 4 छगू छगू कुलं छम्ह छम्ह मनुखं छिमित ग्वाहालि यायेमाः। इपिं थथःगु परिवारया थकालि जुइमाः।
5 “छिमित ग्वाहालि बीपिनिगु नां थथे दु,
“रूबेन कुलपाखें शदेऊरया काय् एलीसूर
6 शिमियोन कुलपाखें सूरीशद्दैया काय् शलूमीएल
7 यहूदा कुलपाखें अम्मीनादाबया काय् नहशोन
8 इस्साखार कुलपाखें सूआरया काय् नतनेल
9 जबूलून कुलपाखें हेलोनया काय् एलीआब
10 योसेफया काय्पिं एफ्राइम कुलपाखें अम्मीहूदया काय् एलीशामा
मनश्शे कुलपाखें पदासूरया काय् गमलिएल
11 बेन्यामीन कुलपाखें गिदेओनीया काय् अबीदान
12 दान कुलपाखें अम्मीशद्दैया काय् अहीएजेर
13 आशेर कुलपाखें ओक्रानया काय् पगीएल
14 गाद कुलपाखें दूएलया काय् एल्यासाप
15 नप्ताली कुलपाखें एनानया काय् अहीरा।”
16 खलःपाखें ल्यःपिं थथःगु पुर्खौली कुलया नायःत थुपिं हे खः। इपिं इस्राएलया वंशया नायःत खः।
17 च्वय् नां च्वयातःपिं मनूतय्त मोशा व हारूनं काल, 18 अले निगूगु लाया न्हापांगु दिंखुन्हु फुक्क खलःयात मुंकाः इमिगु वंश व छेँजःकथं निइदँ व वस्वयां च्वय्यापिं मिजंतय्गु नां धलः दय्कल, 19 परमप्रभुं मोशायात उजं बियादीगु थें। मोशां सीनैया मरुभूमिइ इमित ल्याः खात।
20 इस्राएलया तःधिकःम्ह काय् रूबेनया सन्तानपाखें – निइदँ व वस्वयां च्वय्यापिं लडाइँलय् वनेफुपिं फुक्क मिजंतय्गु नां इमिगु वंश व छेँजःकथं धलखय् च्वल। 21 रूबेनया कुलयापिं ल्याःखाःपिं मिजंत ४६,५०० म्ह दु।
22 शिमियोनया सन्तानपाखें – निइदँ व वस्वयां च्वय्यापिं लडाइँलय् वनेफुपिं फुक्क मिजंतय्गु नां इमिगु वंश व परिवारकथं धलखय् च्वल। 23 शिमियोनया कुलयापिं ल्याःखाःपिं मिजंत ५९,३०० म्ह दु।
24 गादया सन्तानपाखें – निइदँ व वस्वयां च्वय्यापिं लडाइँलय् वनेफुपिं फुक्क मिजंतय्गु नां इमिगु वंश व परिवारकथं धलखय् च्वल। 25 गादया कुलयापिं ल्याःखाःपिं मिजंत ४५,६५० म्ह दु।
26 यहूदाया सन्तानपाखें – निइदँ व वस्वयां च्वय्यापिं लडाइँलय् वनेफुपिं फुक्क मिजंतय्गु नां इमिगु वंश व परिवारकथं धलखय् च्वल। 27 यहूदाया कुलयापिं ल्याःखाःपिं मिजंत ७४,६०० म्ह दु।
28 इस्साखारया सन्तानपाखें – निइदँ व वस्वयां च्वय्यापिं लडाइँलय् वनेफुपिं फुक्क मिजंतय्गु नां इमिगु वंश व परिवारकथं धलखय् च्वल। 29 इस्साखारया कुलयापिं ल्याःखाःपिं मिजंत ५४,४०० म्ह दु।
30 जबूलूनया सन्तानपाखें – निइदँ व वस्वयां च्वय्यापिं लडाइँलय् वनेफुपिं फुक्क मिजंतय्गु नां इमिगु वंश व परिवारकथं धलखय् च्वल। 31 जबूलूनया कुलयापिं ल्याःखाःपिं मिजंत ५७,४०० म्ह दु।
32 योसेफया काय्पिंपाखें – एफ्राइमया सन्तानया निइदँ व वस्वयां च्वय्यापिं लडाइँलय् वनेफुपिं फुक्क मिजंतय्गु नां इमिगु वंश व परिवारकथं धलखय् च्वल। 33 एफ्राइमया कुलयापिं ल्याःखाःपिं मिजंत ४०,५०० म्ह दु।
34 मनश्शेया सन्तानपाखें – निइदँ व वस्वयां च्वय्यापिं लडाइँलय् वनेफुपिं फुक्क मिजंतय्गु नां इमिगु वंश व परिवारकथं धलखय् च्वल। 35 मनश्शेया कुलयापिं ल्याःखाःपिं मिजंत ३२,२०० म्ह दु।
36 बेन्यामीनया सन्तानपाखें – निइदँ व वस्वयां च्वय्यापिं लडाइँलय् वनेफुपिं फुक्क मिजंतय्गु नां इमिगु वंश व परिवारकथं धलखय् च्वल। 37 बेन्यामीनया कुलयापिं ल्याःखाःपिं मिजंत ३५,४०० म्ह दु।
38 दानया सन्तानपाखें – निइदँ व वस्वयां च्वय्यापिं लडाइँलय् वने फुपिँ फुक्क मिजंतय्गु नां इमिगु वंश व परिवारकथं धलखय् च्वल। 39 दानया कुलयापिं ल्याःखाःपिं मिजंत ६२,७०० म्ह दु।
40 आशेरया सन्तानपाखें – निइदँ व वस्वयां च्वय्यापिं लडाइँलय् वनेफुपिं फुक्क मिजंतय्गु नां इमिगु वंश व परिवारकथं धलखय् च्वल। 41 आशेरया कुलयापिं ल्याःखाःपिं मिजंत ४१,५०० म्ह दु।
42 नप्तालीया सन्तानपाखें – निइदँ व वस्वयां च्वय्यापिं लडाइँलय् वनेफुपिं फुक्क मिजंतय्गु नां इमिगु वंश व परिवारकथं धलखय् च्वल। 43 नप्तालीया कुलयापिं ल्याःखाःपिं मिजंत ५३,४०० म्ह दु।
44 मोशा, हारून व थथःगु परिवारया इस्राएलीतय् झिंनिम्ह कुलनायःतय्सं मनूतय्त ल्याः खात अले इमिगु ल्याः थुलि हे खः। 45 निइदँ व वस्वयां च्वय्यापिं लडाइँलय् वनेफुपिं इस्राएलीतय्त इमिगु वंश व छेँजःकथं ल्याः खात। 46 इमिगु मुक्क ल्याः ६,०३,५५० म्ह दु।
47 लेवीया सन्तानयात धाःसा मेपिं नापं ल्याः मखाः। 48 छाय्धाःसा परमप्रभुं मोशायात थथे धयादीगु खः, 49 “लेवीया कुलयात धाःसा छं ल्याः खाये मते। इस्राएलीतनापं इमित ल्याः खाये मते। 50 उकिया पलेसा छं लेवीतय्त पवित्र पाल व उकी दुने च्वंगु फुक्क ज्वलंया जिम्मा ब्यु। छिमिसं थाय् हिलाजुइबलय् इमिसं पवित्र पाल व फुक्क ज्वलं क्वबीमाः। इमिसं व बांलाक स्वयेमाः, अले नापलायेगु पालया जवंखवं पाल ग्वयाः च्वनेमाः। 51 थाय् हिलेबलय् लेवीतय्सं हे पवित्र पाल क्वकायेगु यायेमाः अले लेवीतय्सं हे व धस्वाकेगु यायेमाः। पवित्र पालयात न्ह्यःने वने मत्यःम्ह सुं वन धाःसा वयात स्यायेमाः। 52 इस्राएलीतय्सं थथःगु छाउनीइ, थथःगु झण्डाया न्ह्यःने पाल ग्वयेमाः। 53 लेवीतय्सं हे नापलायेगु पालया रक्षा यायेमाः। अले जिगु तं इस्राएलया खलःयात मलायेमा धकाः लेवीतय्सं हे नापलायेगु पालया जवंखवं थःपिनिगु पाल ग्वयाः च्वनेमाः।”
54 परमप्रभुं मोशायात बियादीगु उजंकथं हे इस्राएलीतय्सं फुक्क यात।