1 उखुन्‍हु चच्‍छि फुक्‍क खलः चिल्‍लाय् दनाः ह्वाँय्‌ह्वाँय् ख्‍वल। 2 सकलें इस्राएलीतय्‌सं मोशा व हारूनया विरोधय् कचकच यात। फुक्‍क खलकं इमित धाल, “जिपिं मिश्रय् वा थ्‍व मरुभूमिइ हे स्‍यूगु जूसा बांलाःगु। 3 परमप्रभुं छाय् झीत तरवारं स्‍याकेबीत थ्‍व थासय् हयाच्‍वंगु दु? झी मस्‍त व मिसातय्‌त लुतया सामान थें लाकायंकी। आः झीपिं मिश्र देशय् हे लिहां वनेगु बांलाइ!” 4 अले इमिसं थवंथवय् थुकथं खँ ल्‍हात, “सुं छम्‍हय्‌सित नायः ल्‍ययाः झीपिं मिश्रय् लिहां वनेनु।”

5 मोशा व हारून इस्राएलया फुक्‍क खलःया न्‍ह्यःने क्‍वपुसां पुल। 6 अले चिवा काःवंपिं नूनया काय् यहोशू व यपुन्‍नेया काय् कालेबं थथःगु वसः खुनाः 7 इस्राएलया फुक्‍क खलःयात धाल, “जिपिं स्‍वःवनागु व चिवा काःवनागु देश तसकं बांलाःगु देश खः। 8 परमप्रभु झीपिंलिसे लय्‌ताःसा वय्‌कलं झीत व देशय् यंकादी, अले व दुरु व कस्‍ति बाः वयाच्‍वंगु देश झीत बियादी। 9 उकिं छिपिं परमप्रभुया विरोधय् विद्रोह याये मते! अन च्‍वंपिं मनूतलिसे ग्‍याये मते, छाय्‌धाःसा इपिं झीगु शिकार खः। परमप्रभु झीपिं नाप दु, इमिके आः हाःनाः मदये धुंकल। इपिं खनाः ग्‍याये मते।”✡१४:९ हिब ३:१६

10 अय्‌नं थ्‍व न्‍यनाः फुक्‍क खलः इमित ल्‍वहँतं कय्‌कि धकाः हाला हल। अबलय् हे परमप्रभुया महिमा पवित्र पालय् फुक्‍क इस्राएलीतय्‌थाय् खनेदत।

11 परमप्रभुं मोशायात धयादिल, “थुमिसं जितः गुबलय् तक हेला यानाच्‍वनी? जिं थुमिगु न्‍ह्यःने उलिमछि अजू चायापुगु ज्‍या याये धुन, अय्‌नं थुमिसं जितः गुबलय् तक विश्‍वास याइ मखु? 12 जिं इमित महामारीं स्‍यानाबी। अले जिं छंगुपाखें इपिं स्‍वयाः तःधंगु व बल्‍लाःगु जाति दय्‌के।”

13 मोशां परमप्रभुयात धाल, “थ्‍व खँ मिश्रीतय्‌सं न्‍यनी, छाय्‌धाःसा छिं हे थःगु शक्तिं थुमित मिश्रीतय् थासं पित हयादीगु खः।✡१४:१३-१९ प्रस ३२:११-१४ 14 अले इमिसं थ्‍व देशयापिं मनूतय्‌त थ्‍व खँ कनाबी। इमिसं छि परमप्रभु इमिथाय् चुलिंचू खनेदइगु, छिगु सुपाँय् इमिगु च्‍वय् दिनाच्‍वनीगु, छिं थुमित न्‍हिनय् न्‍हिनय् सुपाँया थां जुयाः लँ क्‍यनादीगु अले बहनी बहनी च्‍यानाच्‍वंगु मि जुयाः लँ क्‍यनादीगु धकाः नं स्‍यू। 15 छिं छम्‍ह हे म्‍वाका मतसे थुपिं फुक्‍क खलःयात स्‍यानादिल धाःसा छिगु खँ न्‍यनातःपिं जातितय्‌सं थथे धकाः खँ ल्‍हाइ, 16 ‘परमप्रभुं थ्‍व मनूतय्‌त थःम्‍हं बी धकाः पाफयातःगु देशय् हये मफुत। अथे जुयाः वय्‌कलं इमित मरुभूमिइ हे स्‍यानादिल।’

17 “अथे जुयाः प्रभु, छिं थःगु तःधंगु शक्ति क्‍यनादिसँ। गथे छिं धयादीगु दु, 18 ‘परमप्रभु तसकं सह याये फुम्‍ह, सदां दयामाया यानादीम्‍ह, अधर्म व अपराध क्षमा यानादीम्‍ह खः। अय्‌नं द्वं याःम्‍हसित वय्‌कलं क्षमा यानादी मखु, अले पुर्खातय्‌सं याःगु अधर्मया सजाँय वया स्‍वंगू प्‍यंगू पुस्‍तायात तकं बियादीम्‍ह खः।’✡१४:१८ प्रस २०:५-६; ३४:६-७; व्‍य ५:९-१०; ७:९-१० 19 बिन्‍ति याये, छिगु तःधंगु दयाकथं थुमिसं मिश्र देश त्‍वःतावःबलय्‌निसें आः तक क्षमा यानावयाच्‍वनादी थें थुपिं मनूतय्‌गु पाप क्षमा यानादिसँ।”

20 परमप्रभुं धयादिल, “छं धाःकथं जिं थुमित क्षमा बिया। 21 अय्‌नं धात्‍थें जि म्‍वाःम्‍ह खः, अले परमप्रभुया महिमां पृथ्‍वी जाः थें ✡१४:२१-२३ हिब ३:१८ 22 मिश्र देशय् व मरुभूमिइ जिगु महिमा व अजू चायापुगु ज्‍या खनाः नं जिगु उजं मानय् मयाःपिं अले तःकमछि जिगु मन स्‍वःपिं थुपिं इस्राएलीतय्‌सं, 23 जिं थुमि पुर्खायात बी धकाः पाफयाः बचं बियागु देश स्‍वये खनी मखु। जितः हेला याइपिं सुनानं व देश गुबलें खनी मखु। 24 तर जिमि दास कालेबयाके मेगु हे आत्‍मा दु। वं जितः दुनुगलंनिसें विश्‍वास याःगु दु। जिं वयात व वनावःगु देशय् यंके, अले वया सन्‍तानं अन अधिकार याइ।✡१४:२४ यहो १४:९-१२ 25 अमालेकी व कनानीत बेँसी बेँसीइ च्‍वनाच्‍वंगुलिं छिपिं कन्‍हय् हे फहिला वनाः लाल समुद्रया लँपु जुयाः मरुभूमिपाखे हुँ।”

26 परमप्रभुं मोशा व हारूनयात धयादिल, 27 “थ्‍व मभिंगु खलकं गुबलय् तक जिगु विरोधय् कचकच यानाच्‍वनी? इस्राएलीतय्‌गु कचकच जिं यक्‍व हे न्‍यनेधुन। 28 इमित धयाब्‍यु, ‘धात्‍थें जि म्‍वाःम्‍ह खः, जि परमप्रभुं धयाच्‍वना, छिमिसं जिं ताय्‌क छु छु धाल जिं व हे छिपिंलिसें याये। 29 ल्‍याःखाःबलय् निइदँ व वस्‍वयां च्‍वय्‌यापिं जिगु विरोधय् कचकच याःपिं फुक्‍क मनूतय्‌गु सीम्‍ह थ्‍व हे मरुभूमिइ क्‍वदली।✡१४:२९ हिब ३:१७ 30 अले यपुन्‍नेया काय् कालेब व नूनया काय् यहोशू बाहेक छिपिं मध्‍ये सुं नं जिं ल्‍हाः ल्‍ह्वनाः छिमित तये धकाः पाफयागु देशय् वने दइ मखु। 31 छिमिसं छिमि मस्‍तय्‌त लुतया सामान थें लाकायंकी धकाः धाल, तर जिं इमित उगु देशय् हये अले छिमिसं हेला याःगु देशयात इमिसं म्‍हसी। 32 छिमिगु सीम्‍ह धाःसा थ्‍व हे मरुभूमिइ क्‍वदली। 33 छिमिसं विश्‍वास मयाःगुलिं छिमि मस्‍त पिइदँ तक, छिमि दक्‍वसिबय् लिपाम्‍ह मनू मसीतले थन हे मरुभूमिइ जवाः जुयाः चाहिलाच्‍वनी।✡१४:३३ प्रे ७:३६ 34 छिमिसं व देशय् चिवा कायेत पिइन्‍हु बिकूगु खः। उकिं छन्‍हुया दच्‍छि ल्‍याखं पिइदँ तक छिमिसं थःगु पापया सजाँय फयेमाली। थुकथं छिमिसं जिगु विरोध छु खः धकाः सी।’ 35 जि परमप्रभुं धयाच्‍वना, जिगु विरोधय् मूंपिं छिपिं मभिंगु खलःया मनूतय्‌त जिं थथे हे याये। थ्‍व हे मरुभूमिइ छिपिं फुक्‍कं सिनावनी।”

36 मोशां व देशया चिवा कायेत छ्वःपिं मनूतय्‌सं वयाः मभिंगु सुचं बियाः फुक्‍क खलःयात मोशाया विरोधय् कचकच याकल। 37 मोशां चिवा कायेत छ्वःबलय् वया मभिंगु सुचं ब्‍यूपिं मनूत परमप्रभुया न्‍ह्यःने महामारीं कयाः सित। 38 देशया चिवा काःवंपिं मनूत मध्‍ये यहोशू व कालेब जक ल्‍यन।

39 मोशां इस्राएलीतय्‌त थ्‍व खँ कंबलय् इमिसं तसकं नुगः मछिंकल।✡१४:३९ व्‍य १:४१-४६ 40 कन्‍हय् खुन्‍हु सुथ न्‍हापां दनाः इपिं थथे धाधां डाँडाय् च्‍वंगु देशपाखे थहां वन, “झीसं परमप्रभुया विरोधय् वनाः पाप याना। आः झी परमप्रभुं बी धयादीगु थासय् वनेत तयार दु।”

41 तर मोशां धाल, “छिमिसं छाय् परमप्रभुया उजंयात मानय् मयानागु? छिमिसं यायेत्‍यंगु ज्‍या ताःलाइ मखु। 42 च्‍वय् थहां वने मते, मखुसा शत्रुतय्‌सं छिमित बुकी, छाय्‌धाःसा परमप्रभु छिपिंलिसे मदी। 43 अमालेकीत व कनानीत ध्‍वदुइबलय् छिपिं लडाइँलय् सी। छाय्‌धाःसा छिपिं परमप्रभुपाखें फस्‍वयावंगुलिं वय्‌कः छिपिंनापं मदी।”

44 अय्‌जूसां इपिं अप्‍वः जुयाः मोशा व परमप्रभुया बाचाया सनू मदयेक हे डाँडाय् च्‍वंगु देशय् न्‍ह्याः वन। 45 डाँडाय् च्‍वंगु देशय् च्‍वंपिं अमालेकीत व कनानीतय्‌सं कुहां वयाः इमित हय्‌क्‍कयाः बुकल। अले होर्मा तक लिनाहल।