फिलिप्पिइ च्वंगु मण्डलीयात
पावलं च्वःगु पौ
पावलं च्वःगु पौ
म्हसीका
थ्व पौ पावलं थःम्हं यूरोपय् दक्वसिबय् न्हापां स्वना थकूगु रोमी साम्राज्यया माकेडोनियाया मण्डलीयात च्वःगु खः। पावलं थ्व पौ थःत झ्यालखानाय् कुनातःबलय् च्वःगु खः। अबलय् गुलिं गुलिं विश्वासीतय्सं वयात मभिंकाः खँ ल्हानाच्वंगु व फिलिप्पिइ च्वंगु मण्डलीइ फताहा गुरूतय्सं वयाः मखुगु मखुगु खँ स्यनाः दुःख बियाच्वंगु खः। थथे दुःखकष्ट फयेमाःसां पावलं येशू ख्रीष्टयात क्वात्तुक विश्वास यानाः लय्ताया च्वनेमाःगु खँ न्ह्यथनातःगु दु।
पावलं थ्व पौ फिलिप्पिइ च्वंपिं विश्वासीतय्सं थःत माःबलय् ग्वाहालि छ्वयाहःगुलिं इमित सुभाय् बियाः च्वयातःगु खः। पावलं थःत व इमित दुःखकष्ट जूसां साहस व भरोसा कायेमाः धकाः अर्ती बियातःगु दु। थ्व पतिइ थःगु जक भिं स्वयाः तःधंछुना मजुसे ख्रीष्ट थें क्वमिलु जुइमाः धयागु खँ नं न्ह्यथनातःगु दु। थ्व न्हूगु जीवन व्यवस्था मानय् यानाः दुगु मखु, बरु ख्रीष्टलिसे छप्पँ जूगुलिं परमेश्वरं बियादीगु वरदान खः धकाः नं ध्वाथुइकातःगु दु। थुकी परमेश्वरं ख्रीष्टलिसे छप्पँ जुइपिन्त बियादीगु आनन्द व शान्तियागु खँ नं न्ह्यथनातःगु दु।
थ्व पतिइ विश्वासीतय्गु चालचलनय् खनेदये माःगु खँ, गथे लय्ताया जुइगु, भरोसा तयेगु, मिलय् जुइगु व सह याना जुइगु खँय् नं बः बियातःगु दु। थ्व पतिइं फिलिप्पिइ च्वंगु मण्डलीइ च्वंपिन्त पावलं तसकं माया याः धकाः सी दु।
धलः पौ
न्ह्यखँ ................................................१:१-११
पावलयागु जुयाच्वंगु खँ ......................१:१२-२६
ख्रीष्टयात विश्वास यानाः म्वायेगु ..........१:२७-२:१८
तिमोथी व इपाफ्रोडिटसया बारे पावलया ग्वसाः ..............................२:१९-३०
ख्याच्वः व होश यायेगु खँ ....................३:१-४:९
भेटी ब्यूपिन्त सुभाय् ब्यूगु ....................४:१०-२०
क्वचाय्कूगु ........................................४:२१-२३
फिलिप्पी
1
पावलपाखें ज्वजलपा
1 ख्रीष्ट येशूया च्यःत पावल व तिमोथीयापाखें फिलिप्पिइ च्वंपिं ख्रीष्ट येशूयात विश्वास याना च्वंपिं, मण्डलीइ हेरचाह याइपिं व ग्वाहालि याइपिं सकसितं ज्वजलपा!* १:१ प्रे १६:१२ 2 झी परमेश्वर बाः व प्रभु येशू ख्रीष्टपाखें छिमित दया माया व शान्ति दयाच्वने मा।
पावलयागु प्रार्थना व सुभाय्
3 छिमिगु लुमन्तिइ जिं परमेश्वरयात न्ह्याबलें सुभाय् बियाच्वनागु दु। 4 छिमिगु निंतिं जिं न्ह्याबलें लय्लय्तातां प्रार्थना यानाच्वनागु दु। 5 छाय्धाःसा भिंगु खँ न्यंकेगु ज्याय् छिमिसं जितः न्हापांनिसें ग्वाहालि यानावयाच्वंगु दु। 6 छिमिगु नुगलय् भिंगु ज्या सुरु यानादीम्हय्सिनं हे येशू ख्रीष्ट झायादीबलय् तकं फुक्क ज्या सिधय्कादी धयागु जितः विश्वास दु।
7 छिमित जिं थःगु नुगलय् तयातयागु दु। छिमिगु खँय् जिं थुकथं मतिइ तयागु पाय्छि हे जू, छाय्धाःसा छिमिसं जितः थथे कुना तःबलय् नं अले मतःबलय् नं भिंगु खँ न्यंकेत व थुकियागु पँ लिनाः साक्षी बीगुलिइ नं ग्वाहालि याःगु दु। 8 ख्रीष्ट येशूं थें जिं छिमित दुनुगलंनिसें माया यानाच्वनागु दु। थ्व खँ परमेश्वरं स्यू।
9 छिमिगु माया अज्जं अप्वयावने मा, अले छिमिसं धात्थेंगु भिंगु खँ छु खः धयागु दुनुगलंनिसें ध्वाथुइके फयेमा धकाः नं जिं प्रार्थना यानाच्वनागु दु। 10 थथे जूसा जक छिमिसं भिंगु भिंगु खँयात ल्यया काये फइ। अले ख्रीष्ट झाइबलय् छिपिं भिंपिं व दोष मदुपिं जुइ फइ। 11 अले परमेश्वरया महिमा व प्रशंसाया निंतिं येशू ख्रीष्ट पाखें वइगु धार्मिकताया फलं छिपिं जाइ।
म्वायेगु हे ख्रीष्ट खः।
12 यःपिं दाजुकिजापिं, जितः थथे जूवःगु दुःखकष्टं भिंगु खँ झन बय्बय् जुयावंगु दु धकाः सीकि। 13 लाय्कुलिइ च्वंपिं सिपाइँतय्सं जक मखु, मेपिं फुक्कसिनं नं जितः ख्रीष्टयागु निंतिं झ्यालखानाय् कुनातःगु खः धकाः सी धुंकल।* १:१३ प्रे २८:३० 14 थुलि जक मखु, जितः थथे कुनातःगुलिं यक्व हे दाजुकिजापिन्सं प्रभुयाके भरोसा तयाः छप्ति हे मग्यासे परमेश्वरयागु वचन न्यंका जूगु दु।
15 गुम्ह गुम्हय्सिनं ला जिं यानागु स्वये मफयाः नुगः मुइकाः व इखं नं अथे ख्रीष्टयागु खँ न्यंका जूगु दु। गुलिसिनं धाःसा यचुगु नुगलं हे न्यंकाच्वंगु दु। 16 थथे यचुगु नुगलं भिंगु खँ न्यंका जूपिन्सं जितः भिंगु खँयागु निंतिं थथे झ्यालखानाय् कुनातःगु खः धकाः सीकाः माया वनाः न्यंका जूगु खः। 17 मेपिन्सं धाःसा जि कुंका तःम्हय्सित अज्ज अप्वः दुःख सास्ति यायेमा धकाः मभिंगु मतिइ तयाः ख्रीष्टयागु खँ न्यंका जूगु खः। 18 थथे न्ह्याम्हय्सिनं न्ह्यागु कथं न्यंका जूसां जि लय्ताः, छाय्धाःसा भिंगु मतिइ तयाः याःसां मभिंगु मतिइ तयाः याःसां ख्रीष्टयागु हे खँ न्यना वनी।
19 धात्थें हे जि लय्ताः, छाय्धाःसा छिमिगु प्रार्थना व ख्रीष्ट येशूं बियादीगु आत्मायागु ग्वाहालिं जितः त्वःतकी धकाः जिं स्यू। 20 अय्जूगुलिं जि छुकी नं लज्या चाये माली मखु धकाः जितः आशा व भरोसा दु। अले न्ह्याबलें थें जि आः नं ग्याये मखु, सीसां म्वाःसां जिगु पाखें ख्रीष्टयागु नां जक तःधना च्वंसां जितः गाः। 21 छाय्धाःसा जि म्वाना च्वनेगु हे ख्रीष्टया निंतिं खः, अले सीसां जिगु हे भिं जुइ। 22 म्वाना च्वन धाःसा जिं अज्जं ख्रीष्टयागु भिंगु ज्या याये फइ। उकिं सीगु बांलाः ला कि म्वायेगु बांलाः धकाः जिं धाये मफु। 23 जि ला बाम्हय् कानाच्वंगु दु। थ्व संसार त्वःताः ख्रीष्ट नाप च्वंवनेगु जिगु तःधंगु इच्छा खः। 24 थ्व जिगु निंतिं तसकं भिंगु खँ खः, छिमिगु निंतिं धाःसा जि म्वाना च्वने हे माः।
25 छिपिं नाप च्वने दइतिनि धकाः जितः विश्वास दु। अले छिमित विश्वासय् बल्लाकेत व अज्ज लय्ताय्केत जि छिपिं नाप च्वने दइतिनि धकाः नं जिं स्यू। 26 जि छिमिथाय् हाकनं वयेबलय् जि वःगुलिं छिमिसं ख्रीष्ट येशूयात अज्ज अप्वः तःधंकी।
27 ख्रीष्टयागु भिंगु खँ न्यंकू थें छिमिगु चालचलन नं जुइमाः। छिमित नाप लाःसां, मलाःसां छिपिं फुक्कं छप्पँ व छगू हे मन जुयाः भिंगु खँय् विश्वास यानाच्वंगु दु धयागु जक न्यने दःसां जितः गाः। 28 दुःख बीपिं खनाः छिपिं ग्याये मते। थुकिं इपिं नाश जुयावनी, अले छिमित मुक्ति दइ धकाः बांलाक सी दु, छाय्धाःसा थ्व परमेश्वरं हे यानादीगु खः। 29 ख्रीष्टयात विश्वास याना च्वनेत जक मखु, वय्कःया निंतिं छिमिसं दुःखकष्ट नं सी माः धकाः वय्कलं थथे यानादीगु खः। 30 छिमिसं न्हापा खंगु व आः न्यनाच्वंगु जिगु दुःखकष्ट छिमिसं नं फयाच्वंगु दु।* १:३० प्रे १६:१९-४०