भजनसंग्रह
म्हसीका
थ्व भजनया सफू बाइबलया पवित्र म्ये व प्रार्थना मुनातःगु सफू खः। थीथी ईया च्वमिपिन्सं च्वयातःगु थुपिं पवित्र म्ये व प्रार्थनायात इस्राएलीतय्सं अश्शूर व बेबिलोनय् कैदी जुयाः च्वंबलय् मुनाः थःपिनिगु आराधनाया इलय् छ्यलेगु यात। लिपा थ्व हे भजन मुनायात इमिसं थःपिनिगु धर्मशास्त्रय् नं दुथ्याकल।
थुकी थीथी कथंया धर्मया चिनाखँ दु। थुकी परमेश्वरया प्रशंसा, आराधनाया म्ये, ग्वाहालि, सुरक्षा, उद्धारया निंतिं प्रार्थना, क्षमाया निंतिं इनाप, परमेश्वरया आशिषया निंतिं सुभाय्या म्ये, शत्रुतय्त सजाँय बीत इनाप दु। थुपिं प्रार्थनात मनूतय् थः याकःचिगु व फुक्क इस्राएलीतय्गु नितां कथंया खः। गुलिं प्रार्थनाय् छम्ह मनूया नुगलय् दुने च्वंगु नुगःखँत प्वंकातःगु दु सा गुलिं प्रार्थनाय् परमेश्वरया सकल मनूतय्गु नुगःखँ प्वंकातःगु दु।
थ्व पवित्र भजनयात येशू ख्रीष्टं नं छ्यलादीगु दु। न्हूगु नियमया च्वमिपिन्सं नं न्ह्यथनातःगु दु। अले थुपिं मण्डलीइ सुरुंनिसें हे आराधनाया सफू जुयावःगु खः।
भजन मुनाया न्यागुलिं हे ब्व परमेश्वरयात तःधंक प्रशंसा यानाः क्वचाय्कातःगु दु। उपिं ब्वत थथे दु --
धलः पौ
न्हापांगु ब्व ............. १-४१
निगूगु ब्व ............. ४२-७२
स्वंगूगु ब्व ............ ७३-८९
प्यंगूगु ब्व ............ ९०-१०६
न्यागूगु ब्व ......... १०७-१५०
भजन
न्हापांगु ब्व
1
(भजन १–४१)
धात्थेंयागु लसताया लँपु ्उद
1 धन्य खः व मनू
गुम्ह दुष्टतय्गु खँय् जुइ मखु,
गुम्ह पापीतय्गु लँय् जुइ मखु,
अले गुम्ह कर्पिन्त क्वह्यंका
जुइपिंलिसे जुइ मखु।
2 बरु व परमप्रभुया व्यवस्थाय् हे
लय्तायाच्वनि।
चा-न्हि वय्कःयागु हे व्यवस्थाय्
ध्यान यानाच्वनि।
3 व खुसि सिथय् पिनातःगु
सिमा थें खः।
वं न्ह्याबलें थःगु इलय् फल बी।
अले वयागु हः नं गुबलें सुकू
गनावनी मखु।
वं याःगु न्ह्यागु ज्या नं पूवनी।
4 दुष्टत अथे जुइ मखु,
इपिं छ्वसँ थें खः।
फसं इमित पुइकायंकी।
5 उकिं न्याय बीगु इलय्
दुष्टतय्त दण्ड बी।
न त पापीत हे
धर्मीतय्गु सभाय् च्वने फइ।
6 छाय्धाःसा परमप्रभुं
धर्मीतय्गु लँय् जुइपिनिगु
बिचाः यानादी।
अय्नं दुष्टतय्गु लँय् जुइपिनिगु
नाश जुइ।*१:६ यर १७:८