105
परमेश्वर व वय्कःया मनूत
1 परमप्रभुयात
सुभाय् देछा,
वय्कःया नां का,
जाति जातिया दथुइ
वय्कलं छु यानादीगु खः
व न्यंकि।✡१०५:१-१५ १ इति १६:८-२२
2 वय्कःया निंतिं भजन हा,
वय्कःया प्रशंसाया म्ये हा,
वय्कःया फुक्क अजू चायापुगु
ज्याया बारे कं।
3 वय्कःया पवित्र नांयात
तःधंकि,
परमप्रभुयात मालिपिनिगु नुगः
लय्तायेमा।
4 परमप्रभु व वय्कःया
शक्तियात माला स्व,
वय्कःयात माला तुं च्वँ।
5-6 अय्, वय्कःया दास
अब्राहामया सन्तान,
अय्, वय्कलं ल्ययादीम्ह
याकूबया सन्तान,
वय्कलं यानादीगु अजू चायापुगु
ज्या लुमंकि,
वय्कःया अजू चायापुगु ज्या
व वय्कलं न्यंकादीगु
फैसलायात लुमंकि।
7 वय्कः हे परमप्रभु झी परमेश्वर खः।
वय्कःया न्यायया ज्या पृथ्वी न्यंकं जुइ।
8 वय्कलं थःगु बाचा न्ह्याबलें
लुमंकादी,
वय्कलं थःगु बाचा द्वलंद्वः
पुस्तायात बियादीगु खः।
9 व बाचा वय्कलं
अब्राहामलिसे चिनादिल,
अले उकिया बारे वय्कलं
इसहाकलिसे पाफयादिल।✡१०५:९ उत १२:७; १७:८; २६:३
10 परमप्रभुं याकूबलिसें पक्का
यानादिल,
अले इस्राएलनापं थथे धकाः
न्ह्याबलेंया लागि
बाचा चिनादिल।
11 “जिं छन्त हे कनान देश बी,
व छंगु सर्बय जुइ।”✡१०५:१०-११ उत २८:१३
12 अबलय् इपिं ल्याखय् कम,
कनान देशय् इपिं
परदेशी जक खः।
13 इपिं छगू देशं मेगु देशय्
छगू राज्यं मेगु राज्यय्
चाचाःहिलाजुइ।
14 वय्कलं सुयातं नं इमित
दुःख बीके मब्यू,
इमित रक्षा यायेत
वय्कलं जुजुपिन्त थथे धकाः
ख्याच्वः बियादिल,
15 “जिं ल्ययापिं मनूतय्त थी मते,
जिमि अगमवक्तातय्गु छुं
स्यंके मते।”✡१०५:१४-१५ उत २०:३-७
16 परमप्रभुं इमिगु देशय्
अनिकाल छ्वयादिल,
अले इमिगु फुक्क
नयेगु नसा लाकाकयादिल।✡१०५:१६ उत ४१:५३-५७
17 वय्कलं इमिगु न्ह्यः न्ह्यः
छम्ह मनू छ्वयादिल,
उम्ह मनू दास यानाः
मियाछ्वःम्ह योसेफ खः।✡१०५:१७ उत ३७:२८; ४५:५
18 वयागु तुतिइ इमिसं नेवः
न्ह्याकाः दुःख बिल,
अले वयागु गःपतय्
नँयागु सिखः तयाबिल,
19 वयागु म्हगस
पूरा जुइगु ई मवतले
व परमप्रभुया वचनं वयात
सत्य साबित मयातले✡१०५:१८-१९ उत ३९:२०–४०:२३
20 मिश्रयाम्ह जुजुं
वयात त्वःताबिल,
जाति जातियाम्ह शासकं
वयात छुत्कारा बिल।✡१०५:२० उत ४१:१४
21 वं वयात थःगु दरबारया
जिम्मा बिल,
अले देश न्यंकयाम्ह
हामा यानाबिल।✡१०५:२१ उत ४१:३९-४१
22 वं जुजुया हाकिमतय्त
कजय् यात
अले वया थकालितय्त
बुद्धिया खँ स्यन।
23 अले याकूब मिश्रय् वन,
व हामया देशय्
परदेशी जुयाः च्वन।✡१०५:२३ उत ४६:६; ४७:११
24 परमप्रभुं थः मनूतय्त
यक्व मचाखाचा बियादिल,
अले इमित थः शत्रुत स्वयाः
बल्लाकादिल।
25 परमेश्वरं मिश्रीतय्गु मनयात
वय्कःया मनूतय्त मयय्केत
व वय्कःया दासतय्गु विरोधय्
ग्वसाः ग्वयेत हीकादिल।✡१०५:२४-२५ प्रस १:७-१४
26 अले वय्कलं थःम्हं ल्यःपिं
दासत मोशा व हारूनयात
छ्वयादिल।✡१०५:२६ प्रस ३:१–४:१७
27 इमिसं इमिगु न्ह्यःने
वय्कःया अजू चायापुगु चिं,
अले हामया देशय्
अजू चायापुगु ज्या यात।
28 वय्कलं खिउँ छ्वयादिल,
अले देशन्यंक खिउँसे च्वन,
छाय्धाःसा इमिसं
वय्कःया वचनया
विरोध याःगु खः।✡१०५:२८ प्रस १०:२१-२३
29 वय्कलं इमिगु लःयात
हि दय्कादिल।
अले इमि न्यात सित।✡१०५:२९ प्रस ७:१७-२१
30 इमिगु देशय् ग्वाः ग्वाः
ब्यांचा वयाः
शासकतय्गु द्यनीगु क्वथाय्
तकं वन।✡१०५:३० प्रस ८:१-६
31 वय्कलं आज्ञा बियादिल
अले देश न्यंकं
भुजिं व भुयुपतिं जाल।✡१०५:३१ प्रस ८:१६-१७,२०-२४
32 वय्कलं आकाशं वइगु वायात
प्वँ यानादिल,
अले इमिगु देश न्यंकं
हाबलासा थीकादिल।
33 वय्कलं इमिगु दाख
व यःमरिमायात
नाश यानादिल,
अले इमिगु देशया
फुक्क सिमात त्वथुलादिल।✡१०५:३२-३३ प्रस ९:२२-२५
34 वय्कलं आज्ञा बियादिल,
अले अल्याख क्वःबुइँचात
व बुइँचात वल।
35 उमिसं इमिगु देशया फुक्क
वाउँगु व अन्न नयाबिल।✡१०५:३४-३५ प्रस १०:१२-१५
36 वय्कलं इमिगु देशयापिं
सकलें न्हापां बूपिन्त,
फुक्क परिवारया गौरव
व लसतायात स्यानादिल।✡१०५:३६ प्रस १२:२९
37 वय्कलं इस्राएलीतय्त
लुँ व वहःनापं
मिश्रं पित हयादिल।
इपिं कुलयापिं सुं नं धेधेमचू।
38 मिश्रीत इपिं खनाः ग्यात,
मिश्रीत इपिं पिहां वंबलय्
लय्ताल।✡१०५:३७-३८ प्रस १२:२३-३६
39 परमेश्वरं थः मनूतय्त त्वपुयेत
सुपाँय् तयादिल।
अले चान्हय् जः बीत
मि बियादिल।✡१०५:३९ प्रस १३:२१-२२
40 इमिसं फ्वंबलय् वय्कलं
इमिथाय् बट्टाई झंगःत
छ्वयादिल।
वय्कलं स्वर्गं मरि बियाः
इमिगु प्वाः जाय्कादिल।✡१०५:४० प्रस १६:२-१५
41 वय्कलं ल्वहं तछ्यानादिल,
अले अनं लः पिहां वल।
मरुभूमिइ लः खुसि थें न्ह्यात।✡१०५:४१ प्रस १७:१-७; गन्ती २०:२-१३
42 वय्कलं थः दास
अब्राहामयात बियादीगु
पवित्र बचं लुमंकादिल।
43 थुकथं वय्कलं थःम्हं
ल्ययादीपिं मनूतय्त
पित हयादिल।
इमिसं लय्लय्तातां म्ये हाल,
अले सः पिकाल।
44 वय्कलं इमित मेमेगु
जातियापिनिगु जमिन
बियादिल,
अले इमिसं मेमेगु जातियापिन्सं
मेहनत याःगुया फल
थःगु अधिकारय् काल।✡१०५:४४ यहो ११:१६-२३
45 थः मनूतय्सं थःगु व्यवस्था
पालन यायेमा धकाः
व थःगु फुक्क खँ इमिसं
न्यनेमा धकाः
परमेश्वरं थथे यानादिल।
हल्लेलूया!
✡105:1 १०५:१-१५ १ इति १६:८-२२
✡105:9 १०५:९ उत १२:७; १७:८; २६:३
✡105:11 १०५:१०-११ उत २८:१३
✡105:15 १०५:१४-१५ उत २०:३-७
✡105:16 १०५:१६ उत ४१:५३-५७
✡105:17 १०५:१७ उत ३७:२८; ४५:५
✡105:19 १०५:१८-१९ उत ३९:२०–४०:२३
✡105:20 १०५:२० उत ४१:१४
✡105:21 १०५:२१ उत ४१:३९-४१
✡105:23 १०५:२३ उत ४६:६; ४७:११
✡105:25 १०५:२४-२५ प्रस १:७-१४
✡105:26 १०५:२६ प्रस ३:१–४:१७
✡105:28 १०५:२८ प्रस १०:२१-२३
✡105:29 १०५:२९ प्रस ७:१७-२१
✡105:30 १०५:३० प्रस ८:१-६
✡105:31 १०५:३१ प्रस ८:१६-१७,२०-२४
✡105:33 १०५:३२-३३ प्रस ९:२२-२५
✡105:35 १०५:३४-३५ प्रस १०:१२-१५
✡105:36 १०५:३६ प्रस १२:२९
✡105:38 १०५:३७-३८ प्रस १२:२३-३६
✡105:39 १०५:३९ प्रस १३:२१-२२
✡105:40 १०५:४० प्रस १६:२-१५
✡105:41 १०५:४१ प्रस १७:१-७; गन्ती २०:२-१३
✡105:44 १०५:४४ यहो ११:१६-२३