109
शत्रुतपाखें रक्षाया लागि प्रार्थना
दाउऊदया भजन, लय् तइम्हय्सिगु निंतिं
1 हे जिं प्रशंसा यानाम्ह
परमेश्वर,
छि सुम्क च्वनादी मते!
2 दुष्ट मनूत
व मखुगु खँ ल्हाइपिं मनूत
जिलिसें ल्वाः वःगु दु।
इमिसं जिगु बारे
मखुगु खँ ल्हाइगु।
3 इमिसं जिगु बारे मभिंगु
खँ ल्हाइगु।
म्वाय्कं म्वाय्कं जि लिसे
ल्वाःवइगु।
4 जिं इमित माया याना,
अले इमिगु लागि
प्रार्थना यानागु दु।
अय्नं इमिसं जिगु
विरोध याइगु।
5 जिं यानागु भिंया पलेसा
इमिसं जितः मभिं याइगु
अले माया यानागुया पलेसा
जितः मयय्कीगु।
6 इमिसं थथे धाल,
“वयागु न्याय यायेत सुं
दुष्ट न्यायाधीश ल्ययादिसँ,
अले वयात पाःयाःम्ह मनू
वयागु जव पाखे दनाच्वनेमा।
7 वयागु न्याय जुइबलय्
व दोषी ठहरय् जुइमा।
वयागु प्रार्थना नं
अपराधय् ल्याः खायेमा।
8 वयागु जीवन याकनं फुइमा।
वयागु थाय्
मेम्हय्सिनं कायेमा।*१०९:८ प्रे १:२०
9 वया मस्त मां-बौ मदुपिं जुइमा,
अले वया कलाः
भाःत मदुम्ह जुइमा।
10 वया मस्त छेँ मदुपिं
फ्वगिं जुइमा
अले थःगु दुनाच्वंगु छेँनं
इमित पितिना छ्वयेमा।
11 वं ध्यबा पुले माःपिं मनूतय्सं
वयागु फुक्क सम्पत्ति यंकेमा।
परदेशीतय्सं वं याःगु
ज्याया फल लाका यंकेमा।
12 वयात सुनां नं
दया माया मयायेमा,
मां-बौ मदुपिं वया
काय् म्ह्याय्पिन्त नं
दया याइपिं सुं मदयेमा।
13 वया फुक्क मस्त सिना वनेमा,
अले मेगु पुस्तां वयात
ल्वःमंके धुंकूगु जुइमा।
14 परमप्रभुं वया पुर्खां याःगु
मभिंगु ज्या लुमंकातयादीमा
अले वया मांमं याःगु पाप
गुबलें हुया छ्वयामदीमा।
15 परमप्रभुं इमिगु पाप
न्ह्याबलें लुमंका तयादीमा,
वय्कलं इमिगु लुमन्ति पृथ्वीं
सुचुक हुया छ्वयादीमा।
16 वं गुबलें नं दया माया यायेगु
बिचाः मया।
वं चीमि, मगाःमचाः जूपिं
व नुगः ख्वःपिन्त
सास्ति बियाः स्यात।
17 वं सराः बी यय्कीगु,
व सराः वयात हे लायेमा।
वं सुवाः बी मयय्कल,
व पाखें नं सुवाः
तापाक च्वनेमा।
18 वं वसः फी थें सराः फिल।
सराः वयागु प्वाथय् लः थें जाल,
अले चिकं थें
वयागु क्वँचय् दुहां वन।
19 सराः वयागु लागि
वसः थें जुइमा,
वयागु जँय् मदिक
चिनातइगु जँनी थें जुइमा।”
20 जितः पाःयाइपिं
व जिगु बारे मभिंगु
खँ ल्हाइपिन्त
परमप्रभुं थज्याःगु हे
सिरपाः बियादीमा।
21 अय्नं हे परमप्रभु,
थःगु बचं कथं
जितः ग्वाहालि यानादिसँ।
जितः बचय् यानादिसँ
छाय्धाःसा छिगु
सदां दयाच्वनिगु दया माया भिं।
22 जि चीमि खः,
मगाःमचाःम्ह खः,
जिगु दुने जिगु नुगः
घाःपाः जूगु दु।
23 जि सन्ध्या किचः थें
तनावनाच्वंगु दु,
जितः क्वःबुइँचा थें
ब्वयेकाब्यूगु दु।
24 अपसं च्वँच्वं जिगु पुलि
बमलाय् धुंकल,
जिगु म्हय् दाः मदयाः
जि गंसि जुइधुंकल।
25 जि खनाः मनूत न्हिलिगु
हेला यानाः
इमिसं थःगु छ्यं संकीगु।*१०९:२५ मत्ती २७:३९; मर्क १५:२९
26 परमप्रभु जिमि परमेश्वर,
जितः ग्वाहालि बियादिसँ,
छिगु सदां दयाच्वनिगु
दया मायां यानाः
जितः बचय् यानादिसँ।
27 थ्व ज्या यानादीम्ह
छि हे खः धकाः
जिमि शत्रुतय्त
सीकेबियादिसँ।
28 इमिसं जितः सराः बी फु,
अय्नं छिं जितः सुवाः बियादी।
जितः सास्ति बीपिं मछालेमा
छिकपिनि दास धाःसा
लय्ताये दयेमा।
29 जिमि शत्रुतय्त बदनामं त्वपुइमा,
इमिसं थःगु लज्या जामा थें
फीमा।
30 जिं तःसलं परमप्रभुयात
सुभाय् बी,
मनूतय्गु सभाय् जिं
वय्कःयात प्रशंसा याये।
31 छाय्धाःसा वय्कलं
चीमितय्त रक्षा यानादी
अले वय्कलं वयात
स्यायेत स्वःपिनिगु ल्हातं
बचय् यानादी।