18
बेबिलोन नाश जूगु
1 थुलि जुइ धुंकाः जिं स्वर्गं क्वहां वयाच्वंम्ह मेम्ह स्वर्गदूतयात खना। व स्वर्गदूतयाके तःधंगु अधिकार दु। वयागु जलं पृथ्वी हे झल्लल थित। 2 व ततसलं थथे धकाः हाला हल –
“तःधंगु बेबिलोन शहर
नाश जुल, नाश जुल!
थ्व थाय् ला आः भूतत च्वनीगु
थाय् जुइ धुंकल।
मभिंपिं आत्मात,
घच्चायापुसे च्वंपिं झंगःत
च्वनीगु थाय् जुइ धुंकल।✡१८:२ यशै १३:२१; २१:९; यर ५०:३९; ५१:८; प्रका १४:८
3 छाय्धाःसा वयागु
व्यभिचारयागु ख्वल्चां
त्वंगुलिं फुक्क जात
जातियापिं मनूत
नाश जुइ धुंकल।
पृथ्वीयापिं जुजुपिन्सं
व नाप व्यभिचार यात।
वयागु गुबलें हे पूमवनीगु
इच्छां यानाः
संसारयापिं व्यापारीत
तसकं हे धनी जुल।”✡१८:३ यशै २३:१७; यर ५१:७
4 अले जिं स्वर्गं थथे धयाहःगु मेगु सः ताल –
“जि यःपिं मनूत,
वयाथासं पिहां वा।
मवल धाःसा छिमिसं नं
व नाप व्यभिचार याइ।
वलिसे पाप याये मते,
मखुसा छिमिसं वलिसे तुं
सजाँय फयेमाली।✡१८:४ यशै ४८:२०; यर ५०:८; ५१:६,४५
5 वं याःगु पाप
आकाश तक थ्यंगु दु।
वं याःगु पाप
परमेश्वरं लुमंकादीगु दु।✡१८:५ उत १८:२०-२१; यर ५१:९
6 वं छिमित
गथे यानातःगु खः
छिमिसं नं
वयात अथे हे या।
वं याःगु ज्या सिबय्
निदुगं अप्वः
वयात छिमिसं नं या।
छिमित त्वंकेत ख्वल्चाय्
तयाब्यूगु सिबय्
निदुगं अप्वः कडागु
वयागु ख्वल्चाय् तयाब्यु।✡१८:६ भज १३७:८; यर ५०:२९
7 वं थथःम्हं तुं तःधं जुयाः
गुलि मोज यात,
उलि हे छिमिसं नं वयात
दुःखकष्ट व ख्वबि ब्यु।
वयागु मनं थथे धाः
‘जि ला महारानी
जुयाच्वनागु दु।
जि विधवा मिसा मखु।
जिं गुबलें हे नं
दुखं च्वनेमाली मखु।’
8 उकिं छन्हुं हे वयात ल्वय्,
दुःख, आपत,
अले अनिकाल वइ।
अले वयात मिइ उनाछ्वइ,
छाय्धाःसा वयात न्याय
यानादीम्ह परमप्रभु
परमेश्वर शक्ति दुम्ह खः।”✡१८:७-८ यशै ४७:७-९
9 व नाप व्यभिचार यानाः मोजमज्जा याना जूपिं संसारयापिं जुजुपिं वयात उनातःगु कुँ खनाः नुगः मछिंकाः ख्वइ। 10 वयात जूगु आपत बिपत खनाः ग्यानाः इमिसं तापाकं दनाः थथे धाइ –
“धिक्कार, धिक्कार
तसकं तःधंगु शहर!
तसकं बल्लाःगु शहर
बेबिलोन! घौछिं हे
छं सजाँय फये माल।”✡१८:९-१० इज २६:१६-१७
11 संसारयापिं व्यापारीत नं इमिगु माल न्याइपिं मनूत मन्त धकाः नुगः मछिंकाः ख्वइ।✡१८:११ इज २७:३१,३६ 12 इमिगु मालताल – लुँ, वहः, हिरा, मोती, भिंगु भिंगु कापः, प्याजी रंगया कापः, रेसम, ह्याउँसे च्वंगु कापः, थीथी कथंया नस्वाःगु सिँ, किसियागु वा, थिकेथिकेगु सिँ, कँय्, नँ, व दुरूल्वहँतं दय्कातःगु थीथी सामान, व✡१८:१२ इज २७:१२,१३,२२ 13 दालचिनि, मसला, धुपाँय्, मूर्र, गुँगू, तुयुगु धुपाँय्, दाखमद्य, भिंगु चिकं, नचुगु छ्वचुं, छ्व, सा द्वहं, फै-च्वलय्, सल व रथ, दास दासी, व मनूतनापं आः सुनानं न्याइ मखुत।
14 व्यापारीतय्सं थथे धाइ –
“हे बेबिलोन! छं यय्कूगु
ततःधंगु मालताल
फुक्कं तनावन।
छंगु धनसम्पत्ति व इज्जत
फुक्कं तनावने धुंकल।
आः हानं गुबलें लुइ मखुत।”
15 अन शहरय् व्यापार यानाः धनी जूपिं मनूत वयात जूगु सास्ती खनाः ग्यानाः तापाकं हे दनाः नुगः मछिंकाः ख्वख्वं थथे धाइ – ✡१८:१५ इज २७:३१,३६
16 “धिक्कार, धिक्कार
हे तःधंगु शहर!
भिंगु भिंगु सूती कापः, प्याजी
रंगयागु कापतं पुना च्वंम्ह,
लुँ, हिरा, मोती तिसां
तिया च्वंम्ह छ हे खः!
17 घौछिं हे थुलिमछि सम्पत्ति
फुक्क
छ्यालब्याल जुयाः वन।”
फुक्क लःजहाजया कप्तानत, जहाजय् यात्राय् वंपिं मनूत, जहाज चले याइपिं, समुद्रय् व्यापार याइपिं फुक्कं ग्यानाः तापाक हे च्वनाः✡१८:१७ इज २७:२६-३० 18 अले व तःधंगु शहर च्यानाः कुँ थाहां वयाच्वंगु खनाः थुकथं हाला हल – “थ्व थें तःधंगु शहर गनं हे दइ मखु।”✡१८:१८ इज २७:३२ 19 ह्वाँय्ह्वाँय् ख्वख्वं छेनय् धू बुतुबुलाः नुगः मछिंकाः इपिं थथे धकाः हाल –
“धिक्कार, धिक्कार,
व तःधंगु शहर!
समुद्रय् जहाज चले याइपिं
फुक्कं वयागु धनं यानाः
तःमि जुल।
घौछिं हे व शहर नाश जुयाः वन।✡१८:१९ इज २७:३०-३४
20 हे स्वर्गय् च्वंपिं मनूत,
व नाश जूगुलिं लय्ता!
हे परमेश्वरया मनूत, प्रेरितत
व अगमवक्तात लय्ता।
छिमित गथे याःगु खः
वयात परमेश्वरं अथे हे
न्याय यानादिल।”✡१८:२० व्य ३२:४३; यर ५१:४८
21 अले छम्ह तसकं बल्लाःम्ह स्वर्गदूतं तसकं तःग्वःगु घःल्वहं थें ज्याःगु छगः ल्वहं कयाः समुद्रय् वान्छ्वया हल। अले थथे धाल –
“थुकथं हे तःधंगु बेबिलोन
शहर नचुक वांछ्वइ।
अले गुबलें हे
वयात लुइके फइ मखु।✡१८:२१ यर ५१:६३-६४; इज २६:२१
22 अले वीणा, म्ये, बाँसुरी
व तुरहीयागु सः
अन गुबलें हे न्यनेदइ मखु।
कःमितय्सं दय्कातःगु सामान नं
अन लुइके फइ मखु।
घःक्यःगु सः नं
अन गुबलें हे ताये दइ मखु।✡१८:२२ इज २६:१३; यशै २४:८
23 मतयागु जः नं
अन गुबलें थी मखुत।
भम्चा व जिलाजंपिनिगु सः
अन गुबलें ताये दइ मखुत।
छन्थाय् व्यापार याःवइपिं
फुक्कं पृथ्वीयापिं
ततःधंपिं मनूत खः।
छंगु तन्त्रमन्त्रं जात जातियापिं
मनूतय्त झंगः लानाः
थगय् याना तल।✡१८:२२-२३ यर ७:३४; २५:१०
24 अगमवक्तातय्गु,
परमेश्वरया मनूतय्गु
व पृथ्वीइ स्याःपिनिगु हि
अनं लुया वःगुलिं
बेबिलोन थुकथं नाश जुल।”✡१८:२४ यर ५१:४९
✡18:2 १८:२ यशै १३:२१; २१:९; यर ५०:३९; ५१:८; प्रका १४:८
✡18:3 १८:३ यशै २३:१७; यर ५१:७
✡18:4 १८:४ यशै ४८:२०; यर ५०:८; ५१:६,४५
✡18:5 १८:५ उत १८:२०-२१; यर ५१:९
✡18:6 १८:६ भज १३७:८; यर ५०:२९
✡18:8 १८:७-८ यशै ४७:७-९
✡18:10 १८:९-१० इज २६:१६-१७
✡18:11 १८:११ इज २७:३१,३६
✡18:12 १८:१२ इज २७:१२,१३,२२
✡18:15 १८:१५ इज २७:३१,३६
✡18:17 १८:१७ इज २७:२६-३०
✡18:18 १८:१८ इज २७:३२
✡18:19 १८:१९ इज २७:३०-३४
✡18:20 १८:२० व्य ३२:४३; यर ५१:४८
✡18:21 १८:२१ यर ५१:६३-६४; इज २६:२१
✡18:22 १८:२२ इज २६:१३; यशै २४:८
✡18:23 १८:२२-२३ यर ७:३४; २५:१०
✡18:24 १८:२४ यर ५१:४९