21
न्हूगु स्वर्ग व न्हूगु पृथ्वी
1 थुलि जुइ धुंकाः जिं न्हूगु स्वर्ग व न्हूगु पृथ्वी खना। न्हापायागु स्वर्ग व पृथ्वी मदयावने धुंकल। समुद्र द हे मन्त।✡२१:१ यशै ६५:१७; ६६:२२; २ पत्र ३:१३ 2 न्हूगु पवित्रगु यरूशलेम शहर स्वर्गं परमेश्वरपाखें क्वहां वयाच्वंगु जिं खना। थ्वयात बिया छ्वयेत्यंम्ह भम्चायात थें समाः यानातःगु दु। ✡२१:२ यशै ५२:१; ६१:१०; प्रका ३:१२
3 सिंहासनं तःसलं थथे धकाः धयाहःगु सः जिं ताल – “स्व, आः परमेश्वर मनूतलिसे दी। वय्कः इपिं नाप हे च्वनादी। इपिं वय्कःया मनूत जुइ। परमेश्वर थः हे इमि परमेश्वर जुयाः इपिं लिसे च्वनादी।✡२१:३ इज ३७:२७; लेवी २६:११-१२ 4 वय्कलं इमिगु मिखाय् च्वंगु ख्वबि सुचुक हुयादी। आः अन इपिं सी माली मखुत, दुःखं च्वने म्वाःल, ख्वय् म्वाःल, अले छुं नं दुःख जुइ मखुत। पुलांगु ज्याखँ फुक्कं मदयावने धुंकल।”✡२१:४ यशै २५:८; ३५:१०; ६५:१९
5 अले सिंहासनय् फ्यतुनादीम्हय्सिनं धयादिल – “स्व, जिं फुक्कं न्हूगु यानाबी।” वय्कलं हानं धयादिल – “थ्व च्वयाति, छाय्धाःसा थ्व फुक्क वचन विश्वास याये बहःगु खः, अले सत्य नं खः।” 6 वय्कलं जितः धयादिल – “आः सिधल। अल्फा व ओमेगा जि हे खः। शुरु व अन्त जि हे खः। प्याचाःपिन्त जिं जीवनया बुंगाःयागु लः सितिकं त्वंके।✡२१:६ यशै ५५:१ 7 त्याकावइपिन्त थ्व हे अंश दइ। जि वया परमेश्वर जुइ, अले व जिम्ह काय् जुइ।✡२१:७ २ शमू ७:१४; भज ८९:२६-२७
8 “भुस्याःत, विश्वास त्वःतूपिं, घच्चायापुगु ज्या याइपिं, मनू स्याइपिं, व्यभिचार याइपिं, धामी झाँक्री ज्या याइपिं, मूर्ति पुजा याइपिं व मखुगु खँ ल्हाइपिं फुक्कसितं गन्धकयागु मि गालय् वांछ्वइ। निकः सीगु धाःगु थ्व हे खः।”
न्हूगु यरूशलेम
9 दुःखकष्ट दुगु ख्वल्चा ज्वनातःपिं न्हय्म्ह स्वर्गदूतत मध्ये दक्वसिबय् लिपायागु दुःखकष्ट दुगु ख्वल्चा कयातःम्हय्सिनं वयाः जितः थथे धाल – “थन वा, जिं छन्त भम्चा क्यनाबी। व भम्चा चीधिकःम्ह भ्याःचाया कलाः खः।”
10 जि आत्मां जाल, अले स्वर्गदूतं जितः तःधंगु तःजाःगु पर्वतय् यंकाः परमेश्वरदीगु स्वर्गं क्वहां वयाच्वंगु पवित्रगु शहर यरूशलेम क्यन।✡२१:१० इज ४०:२ 11 व शहर परमेश्वरयागु जलं झल्लल थिनाच्वन, अले तसकं थिकेगु मणि थी थें फुक्कं खनेदय्कः झल्लल थिनाच्वन। 12 थ्व शहरय् तब्यागु व तःजाःगु पःखाः दनातःगु दु। थ्व पखालय् झिंनिद्वाः ध्वाखा तयातःगु दु। ध्वाखाय् झिंनिम्ह स्वर्गदूतत च्वनाच्वन। इस्राएलीतय् झिंनिगू कुलयागु नां उपिं ध्वाखाय् च्वयातःगु दु। 13 पुर्ब पती स्वद्वाः ध्वाखा, उत्तर पती स्वद्वाः ध्वाखा, दच्छिन पती स्वद्वाः ध्वाखा व पच्छिम पती स्वद्वाः ध्वाखा।✡२१:१२-१३ इज ४८:३०-३५ 14 शहरया पःखाःयागु जग झिंनिथाय् दु। उकी द्यःने चीधिकःम्ह भ्याःचाया झिंनिम्ह प्रेरिततय्गु नां च्वयातःगु दु।
15 जि नाप खँ ल्हाःम्हय्सिके शहर, ध्वाखा व पःखाः नापय् यायेत लुँयागु गज दु।✡२१:१५ इज ४०:३ 16 शहर प्यकूं लाः। हाकः व ब्या उति हे दु। अले वं थःगु गजं शहर नापय् याना स्वःबलय् निद्वः व प्यसः किलोमिटर हाक दु। ब्या व जाः नं उलि हे दु। 17 स्वर्गदूतं व शहरयागु पःखाः नं नापय् याना स्वःबलय् खुइगु मिटर दु।
18 पःखाः जास्परं दय्कातःगु खः। शहर न्हाय्कं थें यचुसे च्वंगु लुं दय्कातःगु खः। 19 पःखाःयागु जग तःजिगु थीथी मणि, हिरा, मोतीं बांलाकातःगु दु। न्हापांगु जास्परयागु, निगूगु निलमयागु, स्वंगूगु हरितयागु, प्यंगूगु पन्नायागु, 20 न्यागूगु आनिक्सयागु, खुगूगु कार्नेलेनयागु, न्हय्गूगु गोमेडयागु, च्यागूगु पिरोजायागु, गुंगूगु पुष्पराजयागु, झिगूगु लसुनेयागु, झिंछगूगु यूयागु, झिंनिगूगु कटेलायागु खः।
21 व झिंनिद्वाः ध्वाखा झिंनिगः मोतीयागु खः। छद्वाः ध्वाखा छगः मोतीं दय्कातःगु खः। शहरयागु लँ न्हाय्कं थें यचुसे च्वंगु मुक्कं लुँयागु दय्कातःगु खः।✡२१:१८-२१ यशै ५४:११-१२
22 अन शहरय् जिं देगः छगः हे मखना। अनयागु देगः हे दक्व शक्ति दुम्ह परमप्रभु परमेश्वर व चीधिकःम्ह भ्याःचा खः। 23 उकिं अन शहरय् झल्लल थीकेत सूर्य नं म्वाः तिमिला नं म्वाः।✡२१:२३ यशै ६०:१९-२० परमेश्वरया महिमां हे व शहर झल्लल थ्यू। अनयागु मत चीधिकःम्ह भ्याःचा थः हे खः। 24 थुकियागु जलय् जात जातियापिं मनूत जुइ। अले संसारयापिं जुजुपिन्सं थःगु सम्पत्ति व महिमा अन हे हइ।✡२१:२४ यशै ६०:३ 25 अनयागु ध्वाखा गुबलें हे ति मखु। अन चा धयागु द हे मदु। 26 जात जातियापिं मनूतय्सं थःगु महिमा व हनाबना दक्वं अन हे हइ।✡२१:२५-२६ यशै ६०:११ 27 पवित्र मजूगु छुं हे अन दुकाइ मखु। घच्चायापुसे च्वंगु ज्याखँ यानाजुइपिं, अथवा मखुगु खँ ल्हानाजुइपिं सुं हे अन दुकाइ मखु। भ्याःचायागु जीवनयागु सफुलिइ च्वयातःपिं मनूतय्त जक अन दुकाइ।✡२१:२७ यशै ५२:१; इज ४४:९
✡21:1 २१:१ यशै ६५:१७; ६६:२२; २ पत्र ३:१३
✡21:2 २१:२ यशै ५२:१; ६१:१०; प्रका ३:१२
✡21:3 २१:३ इज ३७:२७; लेवी २६:११-१२
✡21:4 २१:४ यशै २५:८; ३५:१०; ६५:१९
✡21:6 २१:६ यशै ५५:१
✡21:7 २१:७ २ शमू ७:१४; भज ८९:२६-२७
✡21:10 २१:१० इज ४०:२
✡21:13 २१:१२-१३ इज ४८:३०-३५
✡21:15 २१:१५ इज ४०:३
✡21:21 २१:१८-२१ यशै ५४:११-१२
✡21:23 २१:२३ यशै ६०:१९-२०
✡21:24 २१:२४ यशै ६०:३
✡21:26 २१:२५-२६ यशै ६०:११
✡21:27 २१:२७ यशै ५२:१; इज ४४:९