रोमय्‌ च्‍वंगु मण्‍डलीयात
पावलं च्‍वःगु पौ
म्‍हसीका
रोमय्‌ च्‍वंगु मण्‍डलीयापिं विश्वासीतय्‌त नापलायेगु मनं तुनाः पावलं थ्‍व पौ च्‍वःगु खः। अन वनाः छुं ई अन च्‍वंपिं विश्वासीत नाप ज्‍या यानाः इमिगु ग्‍वाहालि कयाः अनं स्‍पेन वनेगु पावलया ग्‍वसाः खः। पावलं थःम्‍हं थू थें ख्रीष्‍टियनतय्‌गु विश्वास व थ्‍वयात व्‍यवहारय्‌ छ्यलेमाःगु खँ च्‍वयातःगु दु। थ्व सफुलिइ पावलं थःगु खँयात पूवंक न्‍ह्यथनातःगु दु।
रोमय्‌ च्‍वंगु मण्‍डलीइ च्‍वंपिन्‍त ज्वजलपा याये धुंकाः पावलं थ्व पतिइ थःम्‍हं इमिगु निंतिं प्रार्थना यानाच्‍वनागु खँ न्‍ह्यथनाः “भिंगु खं मनूतय्‌त गुकथं उद्धार याइ व विश्वासं जक मनूत धर्मी ठहरय्‌ जुइ फइ” धकाः न्‍ह्यथनातःगु दु।
यहूदी व यहूदीमखुपिं फुक्‍कं पापय्‌ लानाच्‍वंगुलिं फुक्‍कसिनं परमेश्वरया न्‍ह्यःने धर्मी ठहरय्‌ जुइत स्वयेमाः। येशू ख्रीष्‍टयात विश्वास यानाः हे जक परमेश्वरया न्‍ह्यःने धर्मी ठहरय्‌ जुइ। अले न्‍हूगु जीवन कयाः ख्रीष्‍टनाप छप्‍पँ जुयाः परमेश्वरलिसे न्‍हूगु स्‍वापु तयेखनी। विश्वासीतय्‌के परमेश्वरयागु शान्‍ति दइ, अले पवित्र आत्‍मायागु शक्तिं पाप व मृत्‍युयागु पन्‍जां छुतय्‌ जुइ। अध्‍याय ५ निसें ८ तक पावलं परमेश्वरयागु व्‍यवस्‍था छाय्‌ माल धयागु व विश्वासीतय्‌के पवित्र आत्‍मायागु शक्ति दइ धयागु खँ न्‍ह्यथनातःगु दु।
९ अध्‍याय निसें ११ तक यहूदी व यहूदीमखुपिं मनूतय्‌गु बारे परमेश्वरयागु गज्‍याःगु ग्‍वसाः दु धयागु खँ क्‍यनातःगु दु। यहूदीतय्‌सं येशूयात मुक्ति बीम्‍ह ख्रीष्‍ट खः धकाः विश्वास मयाःगु नं परमेश्वरयागु हे ग्‍वसाः खः। यहूदीमखुपिन्‍सं येशूयात विश्वास यानाः वय्‌कःयागु दया माया काये खनेमा धकाः वय्‌कलं थथे यानादीगु खः। अले यहूदीतय्‌सं येशूयात सदां विश्वास मयासे च्वनी मखु धकाः पावलं पुलांगु नियमयात कयाः क्‍यनातःगु दु।
१२ अध्‍याय निसें १५ तक पावलं विश्वासीतय्‌सं गथे यानाः जुइमाः धयागु खँ न्‍ह्यथनातःगु दु। थःथवय्‌ माया यानाः गुकथं मिलय्‌ जुया च्‍वनेमाः धकाः नं पावलं बः बियाः च्‍वयातःगु दु। परमेश्वरयात गुकथं सेवा यायेगु, सरकारं धाःथें च्‍वनेगु, छम्‍हय्‌सिनं याःगु ज्‍याखँय्‌ मेम्‍हय्‌सित दोष मबीगु व सुयागुं विश्वासय्‌ पंगलः मवय्‌केगु खँ नं पावलं ध्‍वाथुइक कनातःगु दु। दकलय्‌ लिपा पावलं थःगु पाखें अन च्‍वनाच्‍वंपिं सकसितं ज्वजलपा यानाः व परमेश्वरयात तःधंकाः थ्व पौ क्‍वचाय्‌का तःगु दु।
धलः पौ
न्‍ह्यखँ व मूखँ ............................................. १:१-१७
मनूतय्‌त मुक्ति माःगु खँ ................................ १:१८–३:२०
गुकथं परमेश्वरं मुक्ति बियादी ........................ ३:२१–४:२५
ख्रीष्‍टयात विश्वास यानाः दइगु न्‍हूगु जीवन ..... ५:१–८:३९
इस्राएलया बारे परमेश्वरया ग्‍वसाः .................. ९:१–११:३६
विश्वासीतय्‌गु चालचलन ............................ १२:१–१५:१३
क्‍वचाय्‌कूगु व ज्वजलपा याना छ्वःगु ........ १५:१४–१६:२७
रोमी
1
पावलपाखें ज्‍वजलपा
येशू ख्रीष्‍टया दास जि पावलयात परमेश्वरयागु भिंगु खँ न्‍यंकेत वय्‌कलं हे प्रेरित दय्‌कादिल। थ्‍व हे भिंगु खँ न्‍हापांनिसें हे परमेश्वरं वय्‌कःया अगमवक्तातय्‌त धर्मशास्‍त्रय्‌ च्‍वकाः थथे यानादी धकाः धयादीगु खः।
थ्‍व भिंगु खँ वय्‌कःया काय्‌ झी प्रभु येशू ख्रीष्‍टया बारे खः। वय्‌कःया काय्‌ दाऊदया सन्‍तानपाखें मनू जुयाः झायादिल। अले पवित्र आत्‍मायागु शक्तिं वय्‌कः म्‍वाना तुं वयाः परमेश्वरया काय्‌ खः धकाः क्‍यनादिल। वय्‌कःयागु नां दक्‍व जात जातिया मनूतय्‌त न्‍यंकाः विश्वास याःपिन्‍सं वय्‌कःयात मानय्‌ याये माः धकाः धया बीत वय्‌कलं हे जिमित दया माया यानाः प्रेरित दय्‌कादिल।
वय्‌कःया मनूत यायेत छिपिं रोमय्‌ च्‍वंपिन्‍त नं येशू ख्रीष्‍टं सःतादीगु दु। परमेश्वरं सःताः पवित्र याना तःपिं रोमय्‌ च्‍वंपिं परमेश्वरया यःपिं फुक्‍कसित छिमित झी परमेश्वर बाः व प्रभु येशू ख्रीष्‍टया दया माया व शान्‍ति दयेमा।
पावलं रोमय्‌ वनेगु मन याःगु
दकलय्‌ न्‍हापां जिं परमेश्वरयात येशू ख्रीष्‍टपाखें छिपिं फुक्‍कसिगु निंतिं सुभाय्‌ बी, छाय्‌धाःसा सारा संसार न्‍यंक छिमिसं यानाच्‍वंगु विश्वासयागु खँ बय्‌बय्‌ जुयाच्‍वंगु दु। जिं प्रार्थना यायेबलय्‌ छिमित गुबलें हे नं ल्‍वःमंकागु मदु धकाः जिं मानय्‌ याना च्‍वनाम्‍ह परमेश्वरं स्‍यू। वय्‌कःया काय्‌यागु भिंगु खँ न्‍यंकाः जिं दुनुगलंनिसें वय्‌कःया सेवा यानाच्‍वनागु दु।
10 जि छिमिथाय्‌ वये फयेमा धकाः न्‍हियान्‍हिथं प्रार्थना यानाच्‍वनागु दु। वय्‌कलं जितः छ्वया हयादीसा छन्‍हु ला जि छिमिथाय्‌ वये। 11 पवित्र आत्‍मां बियादीगु वरदान बियाः छिमिगु विश्वास बल्‍लाकेत छिमिथाय्‌ वये मास्‍ति वः। 12 थथे झी नाप च्‍वनेबलय्‌ जिं छिमित जक मखु, छिमिसं नं जितः आत्‍माय्‌ बल्‍लाके फइ धयागु जिगु इच्‍छा दु।
13 यःपिं दाजुकिजापिं, जि छिमिथाय्‌ वयेत तःकःमछि हे कुतः याये धुन। छुं खं यानाः वये मफया च्‍वन। जि वयाः मेथाय्‌ च्‍वंपिं यहूदीमखुपिन्‍त थें छिमिथाय्‌ नं परमेश्वरयात म्‍हमस्‍यूपिं मनूतय्‌त वय्‌कःयात म्‍हसीका बी।* १:१३ प्रे १९:२१ 14 ग्रीकतय्‌त व ग्रीक मखुपिन्‍त नं अले ब्‍वनातःपिन्‍त व ब्‍वनामतःपिन्‍त भिंगु खँ जिं मकंसे मगाःगु दु। 15 अय्‌जूगुलिं छिपिं रोमय्‌ च्‍वंपिन्‍त नं भिंगु खँ न्‍यंके मास्‍ति वःगु खः।
भिंगु खँ हे शक्ति खः
16 थथे जूगुलिं भिंगु खँ न्‍यंकेत जि मछाः मजू। छाय्‌धाःसा विश्वास याइपिं फुक्‍कसितं, न्‍हापालाक यहूदीतय्‌त अले यहूदीमखुपिन्‍त नं उद्धार बीत थ्‍व भिंगु खँ परमेश्वरयागु शक्ति खः।* १:१६ मर्क ८:३८ 17 थ्‍व भिंगु खँ परमेश्वरं मनूतय्‌त गुकथं उद्धार यानादी धकाः क्‍यनी। विश्वासं हे जक मनूत धर्मी ठहरय्‌ जुइ। धर्मशास्‍त्रय्‌ नं थथे च्‍वयातःगु दु --
“धर्मीत विश्वासं हे म्‍वाइ।”* १:१७ हब २:४
मनूतय्‌गु पाप व परमेश्वरयागु तं
18 मभिंगु बांमलाःगु ज्‍याखँ जक यानाः सत्‍ययात त्‍वपुया छ्वयेत स्‍वइपिं मनूत खनाः स्‍वर्गय्‌ च्‍वंम्‍ह परमेश्वर तंम्‍वय्‌कादीगु दु धकाः फुक्‍क मनूतय्‌त सीकादिल। 19 परमेश्वर धाःम्‍ह सु खः, गज्‍याःम्‍ह खः धकाः इमिसं अःपुक हे सीके फु, छाय्‌धाःसा वय्‌कलं हे इमित थज्‍याःगु ज्‍याखँ क्‍यनादीगु दु। 20 सृष्‍टिनिसें परमेश्वरयागु खने मदुगु स्‍वभाव, वय्‌कःयाके सदां दयाच्‍वनिगु शक्ति, व दये माःगु गुण, वय्‌कःयागु सृष्‍टिं बांलाक हे सी दु। अय्‌जूगुलिं इमिसं त्‍वहः तयेथाय्‌ मदु।
21 इमिसं परमेश्वरयात म्‍हस्‍यूसां वय्‌कःयात मानय्‌ मयाः। अले वय्‌कःयात तःधंके मालं नं तःमधंकू। थुकथं इपिं थःगु बिचारं यानाः ज्‍यालगय्‌ मजूपिं जुल व इमिगु बुद्धिमदुगु नुगः खिउँसे च्‍वन।* १:२१ एफि ४:१७-१८ 22 सःस्‍यूपिं बुद्धिमान खः धकाः धाधां हे इपिं छुं मस्‍यूपिं जुया वन। 23 अले इमिसं सदां म्‍वाना च्‍वनिम्‍ह परमेश्वरयात मानय्‌ याये मालं झन नाश जुयावनिपिं मनू, झंगः, पशुत व घिस्रय्‌ जुया जुइपिं जन्‍तुतय्‌गु मूर्तियात पुजा यात।* १:२३ व्‍य ४:१६-१८
24 इमिसं थथे याना जूगुलिं परमेश्वरं इमित बांमलाःगु मभिंगु जक याना जुइगुलिइ हे त्‍वःतादिल। ताकि इमिसं थःम्‍हं थःगु म्‍हयात क्‍वह्यंकेमा। 25 परमेश्वरयागु सत्‍ययात इमिसं मखुगु खँ नापं हिलाः सृष्‍टि यानादीम्‍ह परमेश्वरयात मानय्‌ मयासे वय्‌कलं सृष्‍टि याना तःपिन्‍त पुजा व सेवा यानाच्‍वन। परमेश्वर न्‍ह्याबलें तःधनेमा। आमेन।
26 इमिसं थथे याना जूगुलिं परमेश्वरं इमित मभिंगु बांमलाःगु हे जक याना जुइत त्‍वःतादिल। उकिं इमि मिसातय्‌सं थः भाःतपिं नाप द्यनेगु त्‍वःताः मिसात नाप हे व्‍यभिचार याना जुल। 27 अथे हे मिजंत नं मिसात नाप द्यनेगु त्‍वःताः मिजं मिजंत हे व्‍यभिचार याना जुल। थुकथं मिजंतय्‌सं मिजंत नाप लज्‍या चायापुगु ज्‍याखँ याना जूगुलिं इमित पाय्‌छिगु सजाँय बियादिल।
28 थज्‍याःपिन्‍सं परमेश्वरयात क्‍वह्यंकूगुलिं वय्‌कलं नं इमित दकलय्‌ क्‍वह्यंगु मन व मभिंगु बांमलाःगु बिचालय्‌ हे त्‍वःतादिल। 29 थज्‍याःपिं मनूतय्‌गु नुगः थज्‍याःगुलिइ जक जाया च्‍वनी -- पापी ज्‍या, मभिंगु ज्‍या, लोभ, मभिंगु इच्‍छा, नुगः मुइकेगु, मनू स्‍यायेगु, ल्‍वापु यायेगु, थगय्‌ यायेगु, हय्‌काः कायेगु व कर्पिन्त क्वह्यंकेगु, 30 ख्‍वाः ल्‍युने कर्पिन्‍त मभिंकाः खँ ल्‍हाः जुइगु, परमेश्वरयात हेला यायेगु, तःधंछुयाः कर्पिन्‍त हेला यानाः खँ ल्‍हायेगु, घमण्‍डी जुइगु, जि हे खः तःधंम्‍ह धकाः जुइगु, मभिंगु बांमलाःगु जक ज्‍याखँ याना जुइगु व मांबौयात मानय्‌ मयायेगु। 31 बुद्धि मदुपिं, पत्‍याः याये बहः मजूपिं, दया माया याये मसःपिं, 32 थज्‍याःगु ज्‍याखँ याना जुइपिं मनूतय्‌त परमेश्वरं नरकय्‌ छ्वयादी धकाः वय्‌कःयागु आज्ञा सीक सीकं हे इमिसं थज्‍याःगु ज्‍याखँ जक याना जूगु मखु, थथे मभिंगु ज्‍याखँ याना जुइपिं नापं छगू हे मन जुया जुल।

*1:13 १:१३ प्रे १९:२१

*1:16 १:१६ मर्क ८:३८

*1:17 १:१७ हब २:४

*1:21 १:२१ एफि ४:१७-१८

*1:23 १:२३ व्‍य ४:१६-१८