श्रेष्ठगीतया सफू
म्हसीका
श्रेष्ठगीत प्रेमया कवितातय्गु छगू मुना खः। थ्व कविताया मुना अप्वः याना मिजंतय्सं मिसातय्गु निंतिं अले मिसातय्सं मिजंतय्गु निंतिं हाःगु म्येया किपा खः। थ्व सफूयात सोलोमनया श्रेष्ठगीत धकाः नं धायेगु या छाय्धाःसा थुपिं म्येत सोलोमन जुजुं हिब्रू भाषां च्वःगु खः धकाः मान्यता ब्यूगु दु। थ्व सफूया यक्व न्वचु छम्ह भाःत व कलाःया दथुइ जूगु खँल्हाबल्हा खः। इमिसं छम्हय्सिनं मेम्हय्सित तसकं माया याना धयागु बारे खँ ल्हानाच्वंगु दु। तर सफूया छुं ब्वतिइ सुनां खँ ल्हानाच्वंगु धयागु सीकेथाकु। थ्व अनुवाद ब्वनेबलय् पुलांगु हिब्रू भाषा बांलाक अध्ययन याःपिं मनूतय्सं थुपिं म्येत च्वःगु धकाः झीसं थुइकेफु।
थुपिं म्येतय्गु अर्थ यहूदीतय्सं व वय्कःया प्रजातय् दथुइया स्वापु खः धकाः धाःगु खः अले ख्रीष्टियनतय्सं धाःसा ख्रीष्ट व वय्कःया मण्डलीया दथुइया स्वापु खः धकाः अर्थ लगय् याःगु दु।
धलः पौ
न्हापांगु म्ये १:१–२:७
निगूगु म्ये २:८–३:५
स्वंगूगु म्ये ३:६–५:१
प्यंगूगु म्ये ५:२–६:३
न्यागूगु म्ये ६:४–८:४
खुगूगु म्ये ८:५-१४
श्रेष्ठगीत
1
1 सोलोमनया दक्वसिबय् बांलाःगु म्येत थुपिं हे खः।✡१:१ १ राज ४:३२
न्हापांगु म्ये
१:१–२:७
ल्यासेम्ह मिसा
2 वय्कलं जिगु म्हुतुइ चुपा नयेमा,
छाय्धाःसा छिगु माया दाखमद्य स्वयाः नं भिं।
3 छिगु नस्वाःगु अत्तरय् तसकं लय्तायाः
छिगु नां प्वंकातःगु नस्वाःगु अत्तर थें।
अथे जुयाः ल्यासेपिन्सं छितः माया यायेगु अजू चायापुगु खँ मखु!
4 जितः छिनापं हे यंकादिसँ, झीपिं याकनं हे बिस्युं वनेनु!
जुजुं जितः थः द्यनेगु कोथाय् यंकादीमा।
पासापिं
जिपिं छिके लय्ताये अले खुशी जुये,
अले दाखमद्य स्वयाः नं छिगु मायाया प्रशंसा याये।
ल्यासेम्ह मिसा
इमिसं छितः ल्वय्क माया याइ।
5 जि हाकुसे च्वंम्ह खः अय्नं जि तसकं हिसि दु,
हे यरूशलेमया मिसापिं,
केदारया*१:५ केदार यक्व न्हापा केदार इलाकाय् इमिसं दुगुचिया सँनं हाकुगु व सियुगु कापः दय्कीगु, इमिसं थ्व हे कापतं पाल दय्कीगु। पालत थें जि हाकुसे च्वं,
तर सोलोमनया देगःया पर्दा थें बांलाः।
6 जि हाकुसे च्वं धकाः अजू चायाः जितः मस्वये मते,
छाय्धाःसा छाःगु निभालं जितः हाकुसे च्वंकूगु खः।
जिमि मांया काय्पिं जिनापं तम्वःगुलिं
जितः दाखक्यब स्वइम्ह यानाबिल।
थःगु हे दाखक्यबया धाःसा
जिं वास्ता यानागु मदु।
7 हे प्रिय, जितः धयाब्यु,
थःगु फैच्वलय्या बथांत गन ज्वयेयंकीगु?
अले न्हिनय् इमित गन तयेयंकीगु?
छिकपिनि थः पासापिनि बथांया लिक्क
जि छाय् थःगु छेनय् गाचां त्वपुयातःम्ह मिसा थें जुयेगु?
पासापिं
8 हे मिसात मध्ये तसकं हिसि दुम्ह,
छं थःम्हं हे थ्व खँ मस्यूसा,
फैच्वलय्या बथांतय् ल्यूल्यू हुँ
अले छं दुगुचातय्त फैजवाःतयेगु पाल लिक्क ज्वय्केब्यु।
ल्याय्मम्ह मिजं
9 हे प्रिय,
छ फारोया रथया सलत मध्येयाम्ह
मिसाम्ह सल थें बांलाः।
10 न्हाय्पनय् तयेगु चाचां छंगु न्यताः
व सिखलं समा यानातःगु छंगु गःपः गुलि बांलाः।
11 जिमिसं छंगु निंतिं वहलं स्वानातःगु
लुँया चाचा दय्काबी।
ल्यासेम्ह मिसा
12 जुजु थःगु तःधंगु सोफाय्†१:१२ तःधंगु मेच इमिगु परम्पराय् तःमिपिं मनूतय्सं भ्वय् नइबलय् लिधनेत थज्याःगु मेच छ्यलीगु खः। फ्यतुनादीबलय्,
जिं थःगु अत्तरं नस्वा वय्काबिया।
13 जिमि यःम्ह प्रिय, जिगु छातिइ
यग्गायाच्वंगु मूर्रं जाःगु कापःया म्हिचा थें च्वं।
14 जिमि यःम्ह प्रिय, जितः एन-गदीया‡१:१४ एन-गदी थ्व थाय् मृत सागरया लिक्क च्वंगु मरुभूमिइ दुगु तसकं बांलाःगु थाय् खः। अन तःधंगु बुँगाःचा दु। अथे जुया अन यक्व सिमात व सफागु लः दु। स्वयादिसँ १ शमू २३:२९–२४:१ दाखक्यबय्
ह्वयाच्वंगु मेहदीया ज्वाँय् थें च्वं।
ल्याय्मम्ह मिजं
15 हे प्रिय, छ गुलि बांलाःम्ह खः!
गुलि बांलाः!
छंगु मिखा सुकुभत्तुया थें च्वं।
खः धात्थें हे छ गुलि हिसि दु!
ल्यासेम्ह मिसा
16 हे जितः यःम्ह प्रिय! छ तसकं हे बांलाःम्ह खः!
छ धात्थें हे हिसि दुम्ह मिजं खः!
अले झीगु लासा वाउँसे च्वंगु घाँय् थें च्वं।
17 झीगु छेँया धलिं देवदारु सिमाया जुइ
अले सल्लाया सिमाया प्वलः जुइ।
✡1:1 १:१ १ राज ४:३२
*1:5 १:५ केदार यक्व न्हापा केदार इलाकाय् इमिसं दुगुचिया सँनं हाकुगु व सियुगु कापः दय्कीगु, इमिसं थ्व हे कापतं पाल दय्कीगु।
†1:12 १:१२ तःधंगु मेच इमिगु परम्पराय् तःमिपिं मनूतय्सं भ्वय् नइबलय् लिधनेत थज्याःगु मेच छ्यलीगु खः।
‡1:14 १:१४ एन-गदी थ्व थाय् मृत सागरया लिक्क च्वंगु मरुभूमिइ दुगु तसकं बांलाःगु थाय् खः। अन तःधंगु बुँगाःचा दु। अथे जुया अन यक्व सिमात व सफागु लः दु। स्वयादिसँ १ शमू २३:२९–२४:१