3
न्ह्यागुं ज्या यायेत नं न्ह्यचिलिगु
1 सरकार व हाकिमतय्सं धाःथें च्वनाः इमिसं धाःगु खँ न्यने माः धकाः विश्वासीतय्त थुइका ब्यु। भिंगु न्ह्यागु ज्याय् नं न्ह्यच्यु। 2 सुयातं मभिंकाः खँ ल्हाये मते, सुं नाप ल्वाना जुइ मते, अले फुक्क नाप क्वमिलु जुयाः मिलय् जुया च्वँ धकाः इमित थुइका ब्यु।
3 झीपिं नं छकः ला छुं मस्यूपिं, अतेरिपिं, लँ द्वंका च्वनापिं, मभिंगु मतिइ तया जुइपिं, मोजमज्जा जक याइपिं, नुगः मुइका जुइपिं व थःथवय् मयय्का जुइपिं जुइ धुन।
4 अय्नं झीत मुक्ति बियादीम्ह परमेश्वरं मनूतय्त दया माया क्यनादीगुलिं 5 वय्कलं झीत मुक्ति बियादिल। झीसं भिंगु भिंगु जक ज्या यानागुलिं झीत मुक्ति बियादीगु मखु, बरु वय्कलं दया यानाः झीत झीगु पाप सिलाः न्हूपिं यानाः व पवित्र आत्मायागु शक्तिं मुक्ति बियादीगु खः। 6 येशू ख्रीष्टं यानाः परमेश्वरं झीत पवित्र आत्मां जाय्कादिल। 7 वय्कलं दया माया यानादीगुलिं झीपिं परमेश्वरया न्ह्यःने धर्मी ठहरय् जुइ फत, अले झीसं आशा यानागु अनन्त जीवन नं काये दत। 8 थ्व खँ धात्थें खः। थ्व खँय् छं अप्वः मन बियाः स्यँ। थथे यात धाःसा परमेश्वरयात विश्वास याःपिन्सं भिंगु भिंगु ज्या यायेत कुतः याइ। थ्व फुक्क मनूतय्त ज्यालगय् जूगु भिंगु खँ खः।
9 म्वाः मदुगु खँय् हाः जुइ मते, तापाःबाज्यापिनिगु नां कयाः फुइँ याना जुइ मते, व्यवस्थायागु खँय् ल्वाः जुइ मते, छाय्धाःसा अथे यानाः छुं भिनि मखु, अले बांलाइ नं मखु। 10 मनूतय्त ल्वाका जुइपिन्त छकः निकः न्वाना नं मजिल धाःसा व नाप जुइ मते। 11 अज्याःम्ह मनू मभिंम्ह धकाः ला छं सि हे स्यू। वं याना जूगु ज्यां हे व पापी खः धकाः धाइ।
पावलया लिपांगु सल्लाह व ज्वजलपा
12 जिं अर्तिमासयात जूसां तुखिकसयात जूसां छन्थाय् छ्वया हये। इपिं थ्यनेवं छं निकोपोलिसय् जितः नाप लाः वयेगु कुतः या, छाय्धाःसा जिं चिकुला ज्वःछि अन हे च्वनेगु मतिइ तयागु दु।*३:१२ प्रे २०:४; एफि ६:२१-२२; कल ४:७-८; २ तिमो ४:१२ 13 जेनास धाःम्ह वकील व अपोल्लोसयात छं फक्व ग्वाहालि बियाः याकनं छ्वया हिँ। इमित छुं मगाः मजुइमा।*३:१३ प्रे १८:२४; १ कोर १६:१२ 14 झी मनूतय्सं मालीबलय् माःकथं भिंगु ज्या याये सय्के माः। ई अथें सितिं छ्वये मज्यू।
15 जि नाप दुपिं फुक्कसिनं छन्त ज्वजलपा धया हःगु दु। जिमित माया याइपिं आम्कन च्वंपिं विश्वासीतय्त नं जिमिसं ज्वजलपा धया हःगु दु धकाः धया ब्यु।
परमेश्वरं छिपिं फुक्कसितं दया माया यानादीमा।