1 छगू अगमवाणी– इस्राएलया बारे परमप्रभुया वचन थ्‍व हे खः। आकाशयात चकंकादीम्‍ह, पृथ्‍वीया जग तयादीम्‍ह अले मनूया आकार दय्‌कादीम्‍ह परमप्रभुं थथे धयादीगु दु, 2 “जिं यरूशलेमयात उकिया जःखः च्‍वंपिं मनूतय्‌गु निंतिं छगू धेधे चुइकाबीगु दाखमद्यया ख्‍वला थें दय्‌काबी। यहूदा व यरूशलेम घेराय् लाइ। 3 उखुन्‍हु हे पृथ्‍वीया फुक्‍क जातित यरूशलेमलिसे ल्‍वायेत मुनी। सकल मनूतय्‌त ल्‍ह्वनेत जिं यरूशलेमयात छगः ल्‍वहं दय्‌काबी। सुनां थुकियात ल्‍ह्वनी वं थःत घाःपा याइ। 4 परमप्रभुं थथे धयादी, उखुन्‍हु हे जिं छम्‍ह छम्‍ह सलयात भ्‍वय्‌भ्‍वय् कंकाबी।” सल गया वःम्‍हय्‌सित वें यानाबी। अय्‌नं जिं यहूदाया मनूतय्‌त बिचाःसंचाः याये, अय्‌नं जिं मेगु जातियापिं दक्‍व सलतय्‌गु मिखा कां यानाबी। 5 अबलय् यहूदाया नायःतय्‌सं दक्‍व शक्ति दुम्‍ह परमप्रभु इमि परमेश्‍वर जूगुलिं यरूशलेमयापिं मनूत बल्‍लाः धकाः बिचाः याइ।

6 “उखुन्‍हु हे जिं यहूदाया नायःतय्‌त च्‍यानाच्‍वंगु सिँया दथुइ मकः वा थूतय्‌गु दथुइ च्‍यानाच्‍वंगु मिप्‍वाः थें दय्‌काबी। इमिसं जःखः च्‍वंपिं सकल मनूतय्‌त भस्‍म याइ। यरूशलेम धाःसा थःगु हे थासय् दयाच्‍वनी।

7 “दाऊदया घरानायागु हनाबना व यरूशलेमयापिं मनूतय्‌गु हनाबना यहूदायागु स्‍वयाः अप्‍वः मजुइमा धकाः परमप्रभुं न्‍हापा यहूदायापिन्‍त बचय् यानादी। 8 उखुन्‍हु हे परमप्रभुं यरूशलेमय् च्‍वंपिन्‍त रक्षा यानादी अले इपिं मध्‍ये तसकं बमलाःपिं दाऊद थें जुइ। दाऊदया घराना धाःसा परमेश्‍वर थें इमिगु न्‍ह्यःने वनाच्‍वंम्‍ह परमप्रभुया दूत थें जुइ। 9 उखुन्‍हु हे यरूशलेमयात हमला याइपिं फुक्‍क जातितय्‌त नाश यायेगु शुरु याये।

10 “दाऊदया घराना व यरूशलेमयापिं मनूतय्‌त दया व प्रार्थनाया आत्‍मां जाय्‌काबी। इमिसं थःपिन्‍सं सुयाब्‍यूम्‍ह मनू, जितः स्‍वइ। अले मनूत याक काय्‌या निंतिं शोक याःगु थें वयागु निंतिं इपिं दुखं च्‍वनी। दकलय् न्‍हापा बूम्‍ह काय्‌या निंतिं थें दुखं च्‍वनी।✡१२:१०-१४ मत्ती २४:२०; यूह १९:३७; प्रका १:७ 11 उखुन्‍हु हे यरूशलेमय् मगिद्दोया फाँट हदद-रिम्‍मोनय्*१२:११हदद-रिम्‍मोन गुलिखय् मनूतय्‌सं थ्‍व मगिद्दोया शहरया लिक्‍क लाःगु यिजरेलया तःधंगु ब्‍यासिया छगू गांया नां खः धकाः बिचाः याइगु खः। स्‍वयादिसँ, २ राज २३:२८-३०; २ इति ३५:२०-२७ ख्‍वःगु थें हे मनूत ह्वाँय्‌ह्वाँय् ख्‍वइ। 12 देशया फुक्‍क कुल दुखं च्‍वनी। छगू छगू वंशयापिं मनूत थथःगु पुचलय् च्‍वनाः दुखं च्‍वनी। दाऊदया घराना थःगु पुचलय् च्‍वनाः दुखं च्‍वनी। इमि कलाःपिं थःगु पुचलय् च्‍वनाः दुखं च्‍वनी। नातानया†१२:१२ नातान नातान दाऊदया काय्‌पिं मध्‍ये छम्‍ह खः, व जुजु खलःयाम्‍ह खः, स्‍वयादिसँ, २ शमू ५:१४; १ इति ३:५; १४:४ घरानायापिं मिजंत थःगु पुचलय् दुखं च्‍वनी अले इमि कलाःपिं थःगु पुचलय् दुखं च्‍वनी। 13 लेवीया घरानायापिं मिजंत थःगु पुचलय् च्‍वनाः दुखं च्‍वनी, अले इमि कलाःपिं थःगु पुचलय् च्‍वनाः दुखं च्‍वनी। शिमीया‡१२:१३ शिमी शिमी लेवीया छय् खः, व पुजाहारी खलःयाम्‍ह खः। स्‍वयादिसँ, नहू ३:१७-१८; १ इति ६:१६-१७ वंश थःगु पुचलय् च्‍वनाः दुखं च्‍वनी अले इमि कलाःपिं थःगु पुचलय् दुखं च्‍वनी। 14 अले थ्‍व हे खँ फुक्‍क परिवार पुचलय् जुइ। मिजंत अलग च्‍वनाः दुखं च्‍वनी अले मिस्‍त अलग च्‍वनाः दुखं च्‍वनी।”